上集：https://post.shikoto.com/posts/114759-吻醒睡公主之後，佢變咗一個港女（上）

睡公主學野好快，唔止學識咗廣東話、FB、IG、美圖秀秀，仲賣咗件首飾，買咗iphone、自拍神器......
女朋友融入現代生活，我應該開心，
問題係，佢連手仔都唔俾我拖，話男女授受不親，未結婚前唔可以咁。
但我地又無辦法結婚，因為佢無身份證......其實唔係無嘅，不過就唔係香港身份證，同埋寫住「生於光緒二十七年」（1901年）。

我又唔係王子，王子吻醒睡公主，就有權幫佢辦過張身份證啫，
講到尾，我除咗間劏房少咗一半空間之外，一啲都感受唔到自己有女朋友，
佢連FB都唔Set同我有關係囉！
唔緊要，畀啲時間佢，
等佢接受到現代嘅感情觀，遲早肯同我親密嘅。

點知有一日，我番到屋企，見到佢係度執行李。

「我會搬去個朋友屋企住，多謝你嘅照顧啦。」
我眼都突埋：「朋友？咩朋友？」
「上網識嘅，佢係樓下等我，咪揸紅色跑車果個。」
我冷笑：「人地睇得中你？妳係靚女，不過講緊一百年前嘅標準。」
「佢就係鍾意我，佢仲話我瞓覺個樣特別靚，始終我瞓咗一百年，係比其他女人有經驗......」
我嬲到跳起：「妳連手都唔畀我拖，妳畀佢睇妳瞓覺個樣？妳比綠帽我戴？」

「閘住，我同你清清白白。」
睡公主望都唔望我：「不如你解釋下，明明你嫌我樣衰，又嫌我呢樣果樣，做咩死都要我做你女朋友？」
我唔知點答，睡公主步步進逼：「咪就係因為你樣衰、窮、溝唔到女。咁你連普通港女都溝唔到，點解你覺得你可以溝到公主？」

「妳點可以咁講？係我吻醒妳，我係妳恩人！」
「小矮人救咗白雪公主、獵人救咗小紅帽，佢地得到啲咩？咪句『多謝』囉。
傻仔，唔係王子，無人會以身相許架。只要你係王子，拎隻鞋都娶到老婆。」

佢嘅廣東話，已經流利到呢個地步，我擠出一句：「點解妳會變成咁？」
「係囉，我都想問，點解我會變成住咁細間屋、對住個咁醜嘅男人？依加我咪自力更生，改變命運。」
我垂低頭，企埋一邊，唔再阻住佢執野。
可能，單身，就係我嘅宿命？
睡公主出門口之前，遞咗張紙畀我：「呢度有白雪公主、灰姑娘同小紅帽嘅地址，你再試下啦，唔好話我唔益你。」
佢停一停，加多句：「實在唔得嘅話，仲有拇指姑娘......最緊要唔好嫌三嫌四，又話人細粒。」

我袋起張紙，好堅定咁點頭，
生命滿希望，
女友由我創。

-完-