「去飲好悶？明明同對新人唔熟，又要浪費一個寶貴嘅夜晚，睇你根本唔關心嘅成長片段......
只需三百蚊，還你自由身！」
是咁的，之前我失業，捱咗幾晚面包，覺得生無可戀，
就混咗入人地個婚宴度，大吃大喝。
食到一半，聽到有兩個女人討論：「唉，成九點先開始上菜，十一點都唔知有無得走。」
「係囉，本來今晚同男友睇演唱會，但係經理結婚，又唔敢唔黎。」
「唉，如果可以悶少晚，畀多幾百蚊我都制。」
呢段對話喺我腦海盤旋，散席果陣，我決定要投身呢個拯救人類嘅行業：代人去飲。
由痴飲痴食，升級到又食又拎，我覺得自己係天才。
我喺各大論壇開post，生意相當唔錯，發展「創意產業」果然係岩嘅。
香港每年有幾萬人結婚，就算得10%擺酒，每日都有十場酒席，
而每場酒席，唔想去而又不得不去嘅，你估止唔止十個？
次次擺酒都請幾百人，新郎新娘邊有可能記得，
都係靠門口張簽到紙，加埋數人情，先知邊個無到。
我非常盡責，每次都會影相，即場Send比個客，等佢upload FB、IG，講「新娘好索啊！祝你地白頭到老」。
新人睇到FB，都唔會懷疑個客無去。
至於點解無合照？遲咗黎、咁岩去咗廁所......其實無人會問。
人際關係係雙向嘅，你無興趣去飲，係因為你同對新人唔熟，至少唔係「真心熟」，
所以新人都唔會同你熟，唔會熟到喺芸芸賓客中，發現少咗你個人頭。
我亦遇過小麻煩，例如客人係去同事婚宴，咁我坐落客人個位，同枱都係客人嘅同事，大家被困喺婚宴場地，
難免有八卦女人問：「咦，你係邊個？XX（我個客）去咗邊？」
