社長：中國大陸火車分為無座、硬座、硬臥、軟臥等等，香港地鐵其實都一直有實然硬臥位 ---- 扶手柱。
每日搭車梗係會有啲挨柱嘅仆街，由上環挨到柴灣挨到實兼瞓埋覺，唔講仲以為買咗硬臥票。撞正旺角、尖咀、銅鑼灣等等人多擠迫，想扶都冇得扶，都咪話唔火滾。
今日撞到個奇葩，大約係個五十幾歲呀叔。埋站後，門都未開晒就一馬當先搶閘而入，急步走到車卡中間的一根扶手柱前，有如黃狗般急於覓柱射尿。開頭都冇咩嘢，過多幾個站，有少少人流就開始冇嘢扶，而且你知啦垃圾地鐵一開車果下又chok過林峰，唯一扶手位都俾個呀叔佔領埋。我「摺」咗佢幾聲，佢hang撚晒機咁無法回應，一望，原來塞住個耳筒瞓緊教，仲要瞓着晒，個頭連背脊連屎忽都枕住碌柱，面容好安祥、好安息。
當時呀叔嘅背脊緊貼鐵柱，柱與呀叔之間只露出一線窄罅，面對如斯尤物，佛都會動心……動火先啱……我冇理咁多，用手深深插入，再將手指曲起，希望可以頂住佢背部令其知難而退。殊不知呀叔不為所動，叔柱之間，嚴絲密縫，毫無惺忪之意，我眼見無效，連忙使出一招雙龍出海，即係將雙手一同插入，並且有規律地蠕動，務求挖出一片天空。我屌佢老味佢，佢唔行開不特止，仲喺度磨磨磨，好似啲狗仔咁用柱同門框搲背脊咁，喪磨我隻手，到底我算唔算比呀叔非禮咗？我唔知，只係覺得隻手好似被強姦咁，估唔到我竟然慘到要玩柱交，仲要係用隻手同呀叔玩。
話分兩頭，過多幾個站，終於有人起身落車，而咁啱個位係最近我同個呀叔嘅。我特登喺呀叔耳邊大聲講：
「咦，有空位喎～～」
佢即刻張開雙眼，準備想過去坐，早有心理準備嘅我早就一個箭步坐埋去。佢一面不屑，睥咗我好多嘢，仲口噏噏咁樣，期間仲係一路挨實條柱。
我：「呀叔你就好啦，可以一個人瞓晒成條柱，實好舒服～」「你想坐呀？不如我地交換啦，我都未試過搭地鐵霸柱瞓～ 嘻嘻～」
其他人聽到就喺度笑，而呀叔即刻避開咗我行咗去，冇再痴住碌柱，過多一站仲急急腳走埋，搞到我都趕唔切出去同佢講叔叔你拎漏咗條柱。
本人希望港鐵能夠推出「關愛柱」，鼓勵市民讓柱，或以一人一柱為終極目標，落實有柱齊齊瞓、齊齊有柱瞓，亦建議增建「柱位車卡」，有柱無座，實現硬臥票位。或者發展「自動捆綁系統」，將挨柱嘅仆街以鐵索捆綁，咪比班自私精落車。
=================
香港人，撐潮文。
請facebook搜尋並like《潮文社》專頁：https://www.fb.me/9.Literature/
