每次拜年，都有班三姑六婆問長問短，
由讀書成績，問到做野拍拖結婚生仔生孫生曾孫......
明明一年先見一次，係街撞到都唔認得，果日就「急性關心」，扮到好似好熟咁。
最煩嘅係，親戚仲要專揭傷疤，
你讀書唔叻，就問你考第幾；你失戀，就問你幾時結婚；
你離婚，都可以問你幾時生仔，再加多句高八度嘅：「Sorry！我唔記得你離咗婚添！」
有啲網友會教好串嘴嘅回應方法，例如「關你鬼事」、「特朗普當選總統你又知唔知」，
而事實係，如果我地可以咁有骨氣，唔怕俾阿媽鬧「無禮貌」，根本就唔需要去拜年。
呢個時候，我地要學番幾招武功傍身！
- 乾坤大挪移
「你考到邊間大學啊？」咁樣問，通常都係有野想曬，唔係佢個女考到醫科，就係佢個仔年年考第一。
你嘅答案，只係佢炫耀嘅踏腳石。
一招「乾坤大挪移」，直接將敵勁轉移到佢關心嘅人身上，
例如：「係啊......表弟考成點？」
「係啊」唔係答案，但只要佢得到炫耀嘅平台，就唔會理你有無答到問題，
-
凌波微步
「你有無拍拖啊？幾時結婚？」有啲親戚無野可以曬，純粹八卦。
唔想答，就用凌波微步左竄右閃，提供更值得八卦嘅事，令佢迷失方向，
例如：「咦，聽講三表姐買股票賺咗幾十萬，係咪真架？」
話一出口，你已經逃離戰場了。 -
黯然銷魂掌
如果你唔了解其他親戚嘅情況，甚至連問你野果個親戚，係四表嬸定二舅母都唔認得，
呢個時候......「你有無拍拖啊？」
可以擺出一副「黯然銷魂」嘅模樣：「呃......我唔係好想講，不如講第樣。」
面皮比較薄嘅親戚，就會知趣收聲，
如果你見到佢雙眼閃爍住八卦嘅光芒，就要用下一招啦。 -
三無三不手
無知、無趣、無聊！（原本係無孔不入、無所不至、無所不為）
要知道，八卦嘅時間好寶貴，只要做話題終結者，
表露「無知」，令對方覺得你「無趣」，八卦你係好「無聊」，
對方好快就會放棄你，尋找下一隻獵物。
降龍十八掌
八卦界最強武功，無堅不摧，身為人生勝利組，任何問題都可以暢快回答。
「你考到邊間大學啊？」
「劍橋啫。」
「買咗樓未？」
「上個月買咗五個單位，未揀定住邊度好。」
結果會係.......「不如我介紹個女畀你識？」
祝大家新年進步，八卦愉快！
人人都用到降龍十八掌！
