做一個100分、人人讚嘆嘅女友，到底有咩特點？

1.欣賞對方嘅優點
黃蓉係白富美、琴棋書畫樣樣得；郭靖出場果陣，無才華、愚鈍、仲有點迂腐。
假如黃蓉日日鬧：「你個死蠢，有上進心D啦」，呢段感情一定唔會發展。
兩個人拍拖，總係各有長短，而黃蓉會欣賞郭靖嘅老實，幫佢發展其他優點。
當你揀咗一個對象，就學吓讚美佢。如果你真係覺得佢一無是處，當初又何必揀佢？

2.支持男友嘅夢想
黃蓉本來可以無憂無慮、名利雙收咁過一生。結果因為郭靖嘅家國情懷，陪佢死守襄陽，雙雙戰死。

男人總有D夢想，聽落好唔實際，可能全世界都唔欣賞。女友如果表達小小支持，已經可以令男人好感動。
即使失敗咗，又唔會死。拖住佢隻手，一齊東山再起（唔使擔心，現代應該無乜男人，夢想係戰死沙場。）

3.聰明，會用黎幫男友
有時女人會怨：「我咁叻，點解無男友／男友唔滿意？」
但係，你嘅聰明／手上嘅資源，有冇用黎幫過男友？黃蓉出道後，大部份謀算都係用黎幫郭靖，有咩武功都一齊Share。
未必要100%全心奉獻，喺男友有需要時，盡力畀小小幫助。
如果女人一味用聰明，碾壓男人嘅自尊，好難指望男人會欣賞呢份聰明。

4.同男友一齊進步

支持，唔係一味付出，用晒自己D錢畀男友讀書創業。同時都要兼顧自己，智慧、成就都一齊進步。
否則等佢富甲天下，自己變咗黃臉婆，無錯佢應該不離不棄，但女人點解要挑戰人性，睇埋雙方愈黎愈無共同語言？
拖住佢隻手，陪佢君臨天下，令全世界都覺得You deserve it。

5.唔好要人估估吓
鍾意就鍾意，想要就唔要。唔好要男人費盡心思去估，仲要估唔到。
愛你，同識讀心術，兩者係無必然關係。

最後，以為我會講靚女？
黃蓉好靚女，係bonus，但做100分女友，唔需要靚女。
男人又話要樣又話要身材，但心底，都係想要一個支持自己、一齊進步嘅女友。
靚到絕嘅，叫女神。女神，只係用黎膜拜。