「Lonely, Lonely Christmas......」重播又重播，終於捱過平安夜，
等多24小時，號稱「單身狗魔咒」嘅聖誕節，就會結束。
12點正，音樂突然停咗，電腦上出現咗一行字：
「歡迎加入『聖誕搵女友』活動，任務目標：24小時內搵到一個女朋友。任務失敗，即時人道毀滅。」
要喺24小時內，搵到我24年來都搵唔到嘅「女朋友」？
笑話黎？我一昇起呢個念頭，個頭就好痛，直情好似戴咗金箍嘅孫悟空咁，
雖然我好仰慕齊天大聖，但我係羨慕佢支棒、佢好型，唔係佢個箍！
「好啦，我去搵女朋友。」話一出口，頭痛就停咗。
人類一向怕死，無病無痛都食一堆「健康藥品」，
寧可信其有，不可信其無。
我即刻著上最靚嘅衫......Grad Din果陣買嘅恤衫，出門作戰！
喺最短時間搵到另一半嘅祕訣係乜？
四個字：降低要求。
下下都要女神外貌、文青氣質，再加身材人品......你填張Form，當番十年兵先。
街裡愛人一對對，你餵我一啖雪糕，我叫你一聲BB，
偶爾有女仔一個人企喺度，都係妝容精緻，一路撳電話，一路用銳利嘅眼神掃射四方，唔係等緊男友，就係狩獵緊未來男友。
凌晨一點，我終於遇到我嘅目標：
一個樣貌普通，長袖外套牛仔褲，跌落人羣一定執唔番嘅少女。
「靚女，等人呀？」
「約咗兩個fd食糖水，佢地又唔見人。」少女嘟嘴。可愛嘅表情，佢做起黎就有幾分不倫不類。
我大喜，呢次仲唔到我長命百歲？
我即刻發揮伶牙俐齒，用盡二十四年童子功嘅功力，同佢傾咗半個鐘，足足哄到佢笑咗兩次！
時間緊逼，我出絕招：「你可唔可以做我女朋友？」
我都唔奢望佢馬上同意，應該既驚且喜咁垂低頭，話應該了解吓先，之後約出去睇戲食飯，俾我加強攻勢。
點知，佢退後兩步，見鬼咁望住我：「你傻咗？」轉身就諗住走。
「唔好走！」我唯有一五一十咁解釋。
「即係話，你想我做你女朋友，令你唔使死？」
我點頭。
佢答得爽快：「好，三十萬。」
我幾乎懷疑自己聽錯，小姐，我地條件差唔多，你憑咩收我咁貴？
佢問：「你知唔知，點解D相貌普通嘅女仔，都可以喺網上做女神，受萬人追捧？」
依加係你覺得自己會死，你求我。而我搵唔到男朋友，我唔會死。
即係我提供服務畀你，救你一命啊。你條命值幾多錢？」
我唔知我條命值幾多錢，但我知我戶口有幾少錢，我忍唔住問：「咁你就見死不救？」
「我同你唔熟，點解要救你？」
我幾乎想喊：「我以為，靚女先特別貪錢。」網上成日都話，有D女仔樣普通，性格好好，唔貪錢，好岩做老婆之類。
「靚女係多人肯畀錢，我呢D，三年唔發市，發市食三年呀。」少女睥住我，眼神充滿對窮醜矮毒嘅鄙視。
我一行開，個頭又痛起黎，好似提醒我，我嘅生命倒數緊。
絕境之中，我突然諗到，一日之內，要靠我嘅魅力搵到女友，無可能。
學個少女咁講，人地唔識我，唔會無條件救我。
咁，我應該搵番個識我嘅，賣唔到魅力咪賣可憐囉。
「阿君，妳做緊咩？」阿君係我嘅中學同學，樣就唔好提啦，但性格保守、純品、善良，絕對唔會見死不救。
「我訓咗啦，咁夜做咩？」
聖誕節都咁早訓，果然係乖女。我知道喺電話講呢D，只會嚇親佢，於是我約佢出街。
「我無約人，但咁夜唔方便，不如聽朝十點喺圖書館見？」
我好安心咁番屋企，訓夠八個鐘，儲足精神去搵我第一個女朋友。
「件事就係咁，妳唔做我女朋友，我就會死。」
