上集：https://post.shikoto.com/posts/111069
「件事就係咁，妳唔做我女朋友，我就會死。」
「我唔想你死。」阿君嚇到面都白埋：「但男女朋友，要先了解對方，建立信任，先可以確定關係。我覺得至少要了解番......兩年。」
兩年？我墳頭都長草，「妳可以做咗我女友先，做一日，之後再了解，唔岩咪分開。」
「咁咪即係呃人？」阿君瞪大眼。
「唔呃人我就會死。」
「呃人係唔岩嘅，就算有人要殺你，你都唔應該呃佢。欺騙同殺戮都係邪惡嘅......就算遇到邪惡，你都應該緊守心中嘅正義。」阿君講一輪大道理，順手塞咗幾本書俾我，包括《死前應該做的五件事》、《生命的最後一天》。
結果，我呢個唔想死嘅邪惡份子，倉皇逃離圖書館，
急急忙忙向路過嘅女仔搭訕，無人理我，一個都無。
我先明白到，原來尋晚嘅「三十萬少女」，已經對我好友善。
晚上8點，我等緊死神嘅來臨，
人生，係咪到最絕望果陣，就會有驚喜？
我居然見到我女神，企喺餐廳門口。
我暗戀咗佢四年，但覺得自己襯唔起佢，唔敢表白。
我鼓起勇氣，行去佢面前，合埋眼，深吸一口氣：「我地識咗四年，妳係世界上最好嘅女仔......可唔可以畀個機會我，做我女朋友？」
「我願意。」
係女神把聲，我驚喜到個心都跳出黎。
然後係接吻嘅聲音，咦，點解有接吻聲，明明我都未郁手。
我打開眼，見到女神攬住一個米八嘅俊男，俊男手上拎住一束花，
佢地兩個同我相距只有一米，周圍嘅人喺度歡呼，充滿聖誕嘅甜蜜氣氛。
甜蜜，但唔屬於我。
夜晚11點，喺街頭跌跌撞撞嘅我，撞咗入一個靚女嘅懷抱，
「先生你好，係咪搵緊女朋友？」靚女笑得好甜，遞咗一張傳單畀我：「我地係冬天出租女友服務，畀客人度過聖誕嘅甜蜜氣氛、新年嘅親戚攻勢、情人節嘅放閃炸彈。」
我皺眉：「操控賣淫？好似唔合法。」
「我地唔提供身體上嘅交易。」
「咁邊有人買？」
我接過傳單，見個價錢都負擔得起，買條命真係好抵，
咦，咪住先。「我電腦果個『24小時內要搵到女朋友』嘅活動，係咪你地發佈架？」
「係我地公司嘅廣告。」
我嬲到震：「廣告？搞到我個頭痛到爆炸！」
「廣告並無呢個效果，可能係你睇到廣告之後，有心理暗示，令自己頭痛。」
「咁你地就係透過恐嚇、詐騙，逼人地買租女友？」
「只係一個宣傳手法，無諗過有人會信。」靚女好驚訝：「我地係鼓勵客人盡力去搵女友，努力過先知道咩叫絕望，明白憑自己嘅努力，係唔會有女友。」
「你點知我無女友？你又點知我搵唔到女友？」甚至，你點知我想要女友？
「有好多方法，例如，據我地統計，喺12月24號，你總共播咗124次《Lonely Christmas》，一定好Lonely。」
Lonely, Lonely Christmas......仲有Lonely New Year同Lonely Valentine's day等緊我。
我望住張傳單，決絕咁撕爛咗佢。
真係太過份！我兜口兜面細細聲問：
「如果長期幫襯，會唔會打折？」
-完-
