「阿怡，我唔夠錢，不如搵間平小小嘅酒店，都可以擺得好好睇睇......」
「我個中同阿花，好醜樣，都嫁咗個富二代擺半島！平小小，你叫我點見人？」
「咁你比多幾年我......」
「女人嘅青春好寶貴㗎，我唔理！總之今年無得係四季擺酒，就同你分手。」
　　
我係財務公司門口徘徊，以我嘅人工，人地點會借咁多錢比我？
「先生，你係咪為咗擺酒而煩惱？我岩岩聽到你同女友嘈交。」
一個着西裝嘅女人遞上卡片：「我係拼婚公司專員，
簡單黎講，好多情侶對結婚方式都有分歧，

有人想擺豪華婚宴，有人想簡單食餐飯，有人想旅行結婚，budget所限，好難同時實現雙方嘅願望。
拼婚公司會幫你搵到相同願望嘅新人，一齊搞婚禮。」
「咁係咪可以廿萬擺四季？」我只關心呢個問題。

「我地有個男客人，阿媽好要面，想佢威比親戚睇，但佢唔夠錢。
不如你同佢夾錢，咁你就可以用半價，實現到你女友嘅心願，係四季擺酒。」
「你要我女朋友嫁比第個男人？」
「唔可以咁理解。結婚證書都係各自簽，只係提供另一個新郎做合作伙伴。」
　　
我好嬲，居然有人問我戴唔戴綠帽，
夜晚同阿怡講起呢件事，我以為佢都會好嬲，

點知佢答：「即係我可以係四季擺酒？」
「點同親戚朋友交代？你明明同我拍拖，又同第個擺酒。」
「唏，邊個去飲，會關心你嫁果個人係圓定扁，個個都係睇排場㗎啫！」

第二日，我就打咗比拼婚公司。
一切進行得好順利，阿怡好積極咁試婚紗試敬酒服，我亦都幫手搞wedding planning，加埋貢獻自己全副身家，
就係為咗比女朋友，同另一個男人擺酒。

有人問我點解唔飛咗佢？
佢地唔明，由追佢到拍拖，我已經用咗好多成本，
換過個，一切都要重新付出，
然後到結婚，邊個保證佢唔會想擺四季？
講到尾，我都只係想要個老婆啫。
　　
好快，去到結婚果一日......

下集：https://post.shikoto.com/posts/110698-為咗係四季擺酒，我睇住老婆嫁比第二個男人（下）