揀男人,一定要有錢;揀女人,一定要靚女。
即使你係咁諗,但講出口,一定會比人鬧。
「條件式擇偶」,大家總係覺得侮辱愛情。

咁「感覺式擇偶」呢?有feel,所以同佢一齊。
聽落美好,但長大咗,就知道純以感覺擇偶,根本唔work。 而且我地「有feel」,通常都同條件有關,
無論係樣貌定性格,有某d特質吸引到你。

「對我好式擇偶」,似乎最合理,
揀一個最愛我,最我最好嘅男人,
好多女人都咁講,但好難做到,所以先有咁多長期服役嘅觀音兵。
甚至係拍拖/結婚後,另一半對自己唔好,即使百般抱怨,都唔捨得分開。

其實,仲有「狀態式擇偶」。
同呢個人相處,你嘅心情係點?
一齊之後,你係努力向上,變得更好;定日日抱怨唔滿意,陰沉抑鬱?
有時候,無論對方令你幾有feel,但對你唔好,令你每日係度諗點樣討好佢,點樣投訴,不斷係失敗嘅感情入面輪迴,自己嘅狀態愈黎愈差。
或者,佢對你好條件好感覺好,但你長期同佢一齊,情緒低落(原因不明㗎,可能八字唔夾)。
甚至對方根本唔鍾意你,你暗戀,但你好享受呢段關係,亦令自己變成更好嘅人,
已經好過好多互相埋怨、互相連累嘅「戀人」。

我地成日嘆氣,知人口面不知心, 與其知人地嘅心,不如先照鏡望下自己。
最「正確」嘅擇偶,唔係睇對方,而係睇自己嘅狀態。