如果要我揀一個最無情嘅social network，我會揀Snapchat。
果種一瞬即逝嘅感覺，果種互相欺騙嘅感覺...
用八秒時間睇一幅相，接收資訊嘅時間只係短短八秒。
如果同對方唔熟嘅話，當然係望兩望就睇第二張相啦，
但係如果對方係自己朋友/男女朋友，Snapchat就變成咗友情嘅試練場。

人哋影完張相特登send比你，即係期待有reaction啦，
但係好多時你覆佢之後就唔會再見到notification。
好出奇咩？其實諗真啲，根本好正常。
呢條chemical reaction本身就係不等式：
「女send相數量 > 男send相數量」
「女覆msg數量 < 男覆msg數量」
得出「女願意同男react嘅機會率 < 男願意同女react嘅機會率」嘅結論。
好複雜咩？睇下現實例子就會明。

有一次，Jan同我合照完之後post Snapchat。
我問佢：「點解你要post出去嘅，明明你有男朋友...」
佢個答案真係出奇過出奇蛋。

「我唔想比我啲同學知我男朋友係邊個嘛，所以我咪post我同你嘅合照出去囉。」
你話佢收兵又唔係，佢真正目的係想令到一班人唔知佢真正男友係邊個。
但係你話佢唔係收兵都唔係，佢嘅行為的確令到一班無辜毒撚冇啦啦搭晒糖。
你可能會問，點解佢會肯答我呢個毒撚？
好簡單，因為我同佢係朋友關係，而唔係其他以為自己同佢好熟嘅毒撚。
又或者，可能我唔值得佢欺騙掛，
因為我已經無覆Snapchat了。

見到佢電話上面開始有一個又一個嘅藍色標示，我彷彿見到Jan嘅同學啲驚訝emoji。
「Jan你又有新仔仔喇～～」
「出pool飯！」
「幾時介紹返個靚仔俾我識先 :)」
隱約見到好似有十幾個留言，但係坐喺我隔離嘅Jan淨係睇咗旁邊有星果兩三個。
佢話比我知，其他嗰啲唔使理，因為嗰啲都係hi bye fd。
而有應嗰啲，都只係行貨對答。
然後，就沒有然後了。

唔知道大家小時候有冇玩過一個心理測驗，

將自己所有朋友寫晒出嚟，然後好似箭靶咁畫五個圓形出嚟，
中間圓形係代表自己，其餘幾個代表著唔同程度嘅友情，
最後將啲人名放落五個圓形入面。
之後好多人發現，寫出自己嘅朋友好容易，要強行區分唔同份量嘅友情好困難。
友情本身就存在著區分，正如群體中人與人嘅關係都存在著程度分野。
人總係偽善，總不願將現實說出口，
點知原來一個Snapchat就已經睇到友情係有唔同價。

今日Jan可以喺我面前send合照呃一班hi bye fd，
聽日Jan都可以為咗自己send啲假圖呃男朋友。
好出奇呀？
叫唔同雞都有唔同玩法啦，唔同友情點會有同一個標準？
如果你認同葉念琛嘅現代愛情故事，
咁其實友情都係一樣，都係呃呃氹氹，你瞞我瞞。
Snapchat話畀你知，友情係可以好廉價。

接受現實吧啦！接受唔到對方有嘢呃住自己就無朋友架喇，
因為你永遠唔會進入到中間果個圓形。
因為你唔係佢本人。