Bob頭工友遇著鬼(真人真事改篇)

大家好，我叫阿Bob，雖然係食女無數，但唔係光頭果個。

今日我想同大家講既唔係我既食女史或者心得，而係一件發生係今年農曆七月十三既恐怖經歷。

話說小弟除咗日頭份正職之外，間中夜晚收工後都會搵下外快。咁係事發前一日收到我老死Frankie既電話，佢話：

「Bob！有單荀野益你！XX工業村有單裝修急需夜更替工，三工呀喂！」
「咁荀？點解你唔做呀？」
「屌佢，得果一晚時間要人，我接咗另一單黎緊要踩一個星期呀，如果唔係我自己做撚埋佢啦！」
「散job岩我呀，多謝介紹先喎，下次飲茶我既！」
「提提你，要搵多個人，我晏啲send地址同聯絡比你！係咁先！」

無幾耐，佢就send咗成哥既電話比我。

「成哥！我係廢奇介紹果個阿Bob呀！」
「哦！光頭Bob呀！你今晚食埋飯，八點鐘帶埋個工友到XX工業大廈X樓XX室搵我啦！」
「係既成哥！不過我唔係光頭…喂？喂喂？」

都話撚咗我唔係光頭果個囉，屌…

咁急搵人仲要得一晚，好難搵到人。最後迫於無奈要搵臭腳明。屌，佢一除鞋真係好似死屍咁臭。

準時八點我同臭腳明準時摸到上個單位，果時門口大開，望入去見到已經裝修得七七八八，而有個包住頭巾既大隻佬赤裸住上身係單位中間睇緊圖則。

我先同臭腳明講定今晚佢唔準除鞋，否則反面，以後都唔搵佢做野。

「成哥！」我一邊叫一邊行入去。
「你乜水呀？咪入黎搞搞震啦！」
「我係呀Bob呀！廢奇介紹果個呀」
「哦！光頭…呀…梳利梳利，阿Bob呀，你女朋友一定好大波定，嘻！」
「失敬失敬！呢位係阿明，佢今晚同我一齊開工既！」

之後都係成哥同我地講解下今晚要完成乜，同聽日要點交鎖匙比管理員之類。

「係喇，廁所係出面左轉果條後樓梯度，十二點後無lift搭，要到聽朝六點先有。有咩落去要行樓梯，食煙都唔係要去後樓梯度食，樓下街口有間7仔，就係咁！」

成哥無耐之後就執晒野走人，我同臭腳明就揸緊時間開工。雖然係執頭執尾，但係聽朝就要交返個單位比人。

到十二點、一點左右，去咗揸水既臭腳明突然間衝返入單位係度叫我：

「Bob…Bob爺，好似有啲唔妥呀！」
「你就有唔妥！褲鏈都未拉好仲滴緊水咁！走撚開呀！手又未洗！」
「唔係呀！廁所果邊有唔妥呀！」
「咩事呀！爆屎渠就話驚啫！」
「我…我好似見到啲野呀！」

「妖！我岩岩先去完，撚有野！你跟我黎！」

跟手我迫佢跟我一齊行去廁所。

咦？唔知係咪心理作用，後樓梯果邊又真係陰陰涼咁。入到去廁所，臭腳明死都企係門口唔肯入，最後我一手扯咗佢入黎，佢就成個女人咁縮係我背後。

真係想打撚死佢。

「有話有野？睇下！又係乜撚都無！」
「唔…唔係呢，你聽下第三格廁所，真係唔妥呢，你比我出返去先啦大佬！」

聽完之後我拉住佢衫領位置唔放手，淨係示意佢收聲。之後我側身傾聽，十零秒後都係乜動靜都無。我又準備屌鳩佢果時，突然聽到好細聲既拍門聲。

我第一時間心諗，唔會咁邪呀？我咁大個仔真係無撞過野，應該係風吹到門咋？我地兩個都無再郁，無耐之後又聽到細細聲既：

「啪！」

我放開咗捉住臭腳明手，一步步咁行埋去虛掩住既第三格廁所門。我吞一吞口手，下定決心一推：

無人

我即刻轉身問口屌臭腳明，點知即係見到佢擘大晒口臉都青埋咁死指我身後就跑咗出廁所。

仆佢個街同我玩野？我轉身再望睇下佢想玩乜，點知比我見到：

一個半透明既“人形”物體係第三格廁所門口飄緊出黎，我同佢四眼相對之後果一刻，佢颯一下咁飄咗入鏡。係再下一秒，我都衝埋出廁所。

「嘩屌！好撚邪呀屌！」

我一邊抹汗一邊係咁講粗口，而臭腳明已經驚到唔識出聲，企係度向我露出求救既表情。

「你望住我有撚用咩！快手快腳整撚完佢收工走人啦！飲少啲水同扯少枝煙囉！唔係賠撚死呀！」

有時就係咁，係呢行應承咗人突然走咗去就肯定比人唱衰，之後永不錄用。調轉飲少啖水痾少篤尿又唔會死既，係咪？

最後我地死趕難趕，係四點零就執好漏收拾埋架生可以鎖門走人。

「Bob…Bob爺，陣間我地走都要係後樓梯果邊走呀，不如係度等到六點有lift先走丫？」
「屌，生人唔生膽，我地又唔入廁所，直接經過門口就衝落樓梯啦！得果幾層，你咪仆街就得喇！」
「好…好，你點話點好。」

之後我地一鎖好門就衝落後樓梯，急急腳咁向住地下進發。咁果棟工廠大廈地下果層有停車場，樓底特別高，所以由一樓到地下後門出口果段樓梯特別長。

我地行到一樓望到呢條長樓梯就知終點在望，好開心咁衝埋落去。點知行咗三份之一果時，我見到一團綠色既“人形”半透明物體係樓梯中央…

今次仆街喇！明明成廿幾歲人之前乜都無撞過，今晚一黎就撞兩鑊，有無咁邪呀？宜家點算好？返轉頭又唔係，企係度又唔係，衝落去又更加唔係。

就係我地僵硬晒果陣，團綠色物體高速咁衝埋黎…

我地兩個馬上9秒9咁轉身走人，可惜一切已經太遲：我見到果團野後後穿透過我身體，之後係我前面不遠既黑暗處消失。

今次真係嚇撚死人，我地兩個又再度轉身落返樓梯走人，直到出咗後門到咗行人路先喘晒氣咁休息。

最後我地行去停車場交底條匙比保安就各自返屋企。

第二日我唔使返公司，起身果時已經係下午四點。我拿拿聲打比我阿媽拜開果間廟既廟祝，點知一打開電話就見到9千幾個msg同百鳩幾個miss calls。一睇個秘撈群組先知臭腳明一早刮緊我，同埋佢病咗。

而其實我都覺得唔舒服，拎枝電子探熱針一嘟耳仔先知自己都發緊燒。唉唔理，搵咗個廟祝先講！

去到見到個廟祝，佢叫我查日腳。之後佢神色凝重咁同我講：

「世侄，你呢排當黑呀！你見到綠色果隻好猛呀！唔小心處理分分鐘會有性命危險呀！」
「唔好嚇我啦堅叔！我宜家真係好驚呀！」
「我警戒過你要少啲房事，本來都唔會黑到咁。但偏偏你…唉！搞到陽氣不足，邪氣入侵，所以宜家病埋…」
「堅叔，我應承你，即日開始，我連j都戒埋！你要幫我呀！我仲要娶個大波老婆架！」
「嗱，好彩你搵得我早。我執一份街衣比你，你聽晚六點後七點前好係街度化咗佢，同埋呢排唔好出夜街，仲要斷絕邪念，等陽氣慢慢恢復。過埋呢兩日低潮，之後就會好架喇！」

我拿拿聲拎張五百蚊出黎比香油錢，之後去上晒成間廟香爐既香，再返去拎份衣紙走人。

但唔舒服，始終都要睇醫生，如果唔係燒壞腦就弊。

係診所時我睇返秘撈群組既對話，原來臭腳明尋日一返到屋企就同全世界講呢單野，仲同人講埋地址同詳細位置。咁撞正宜家十四，中午有條友話咁岩經過上去望望，我心諗抵撚死。

點知一路睇落去，條友一邊行返後樓梯果邊、入埋廁所，同行埋後樓梯都一一影返張相掉上黎，痴撚線，出事架嘛！但日光日白無理咁猛既！

最後掉上黎既相係我地見到綠透明物體果段樓梯，一睇都無乜野，又光。係地下因為果日落雨漏水有水漬，點知臭腳明同人講團綠色野尋晚就係水漬果個位出現。有人放大完水漬之後cut出黎比我地睇：

有個兇神惡煞既人樣係水漬上面

屌你老母！我一睇差啲掉咗部電話，之後第一時間delete咗張相，再同佢地講隻野好猛，大家小心之類。點知我一出聲，成班人係咁問我去撚咗邊，話我放飛機唔出黎飲茶之類。

我話病撚咗係屋企瞓到岩岩無耐丫嘛，點知Frankie係群組度講話：

「我十一點打比你又無人聽，打去你屋企伯友又話你半夜返咗屋企後十點左右又出咗門，連電話都無帶，你死咗去邊啊！」

乜我…我唔係返到屋企之後一直瞓到晏晝咩？我真係完全無出過街既印象，由細到大都無聽過屋企人話我有夢遊，金翅仆街鳥！

我都未震完，臭腳明係群組話佢兩點時已經仆到去搵幫襯開間紙紮舖既老闆查日腳，老闆同佢講呢排唔好見我就無事，話係我黑到會連帶身邊人都中招。

屌，有無咁撚邪呀？