是咁的，小弟今日想談談中伏經歷。
留意返，標題入面既港女，並唔係泛指香港女仔，而係以下我講既呢種人。
農曆七月，老子本住什麼鬼都不怕既心態，向香港最多鬼聚集既地方挑戰。
係邊度？之唔係中環蘭桂坊囉。
雖然小弟其貌不揚，但張條淘寶返黎既車匙放上檯面之後，竟然有女士埋身。我當堂嚇左一跳，然後定落黎，開始慢慢端詳呢位女士。
佢著住一襲連身低胸裙，噴上某名牌子香水，加上用濃妝粉飾自己既面蛋，令我既第一印象係—— ＿！
咳咳，你會唔會誤會左啲野？我係想講靚。
無錯，我諗無論咩女人都好，只要擁有花樣年華，再比心機化個靚妝，都好難同個醜字掛勾。
更何況，眼前呢位女士，原本五官就唔錯（應該），所以化妝過後，更是豔麗。
至於點樣同呢位女士搭上既過程，係呢度就唔詳談喇。
問題，出現係一晚之後。
學子華話齋，你落左妝之後我仲認得你既，叫化妝；你落完妝我認唔到你既，叫喬裝呀！！！
望住眼前呢位喬裝前既女士，我望唔透。一晚之前仲成份聖誕禮物咁既佢，一晚之後竟然話我知其實係愚人節呀！
咁樣同我買一打啤酒返屋企，結果一飲先發覺係菊花茶有咩分別呀！！！？？？
不過，我始終決定同佢試下相處。畢竟昨晚飲完杯sex on the beach都主動比返錢我。
但係好快，我已經為呢個決定後悔。
拍拖一日，佢就洗左我五千蚊，係五千蚊呀！我個一刻先發現，原來有錢人既生活，係咁樣過。
就係個晚，我同佢提出分手。
呢個故事教訓我，原來女人，拍拖前同後可以變化咁大。
我追你個陣，你話可以AA制，追到之後，反而成日要我請。
我追你個陣，日日都扮到鬼火咁靚，追到之後，原來可以烏"where"過我家姐。
我追你個陣，明明溫文爾雅小鳥依人，追到之後，原來可以粗獷過我阿媽。
我追你個陣，我話事個陣就讚我有主見，追到之後就成日話我大男人。
我追你個陣，比你話事個陣就話我溫柔體貼，追到之後就話我優柔寡斷無主見。
不過其實，我知既……追到你之前你咁順得人意，只係你唔想失去我之嘛……我知道，你鍾意比我追既感覺丫嘛……
我知道，你應承做我女朋友，係相信我真係愛你丫嘛……
我知道，拍拖之後你毫無顧忌，係唔再怕會失去我丫嘛……
我知架，不過，你可唔可以，搵次，變返拍拖之前咁樣呢……
