"呀女，今晚過11點就七月十四正日，你會唔會早啲返屋企呀，你自己住記住買啲街次燒呀"
"呀媽,我邊識買又落街燒，我仲要返夜，唔會啦，今晚你記住買六合彩就真，幾千萬呀，中左我就唔洗做啦,唔講住啦，我返工啦，下星期食飯啦"
"好啦，總之一定要早啲返屋企啦。拜拜。"
媽媽，你玩我咩，自己落街燒街衣，諗起都淆底，一陣落巴士買個六合彩好過。
我叫安娜，今年三十歲，失變半年，由細到大都好獨立，可能獨女掛，我享受自己一個人既時間，當然我亦喜歡戀愛，但係我亦怕被人管住既感覺。每段關係一過兩年大限，我就會犯賤覺得好悶，所以無咩邊個男朋友係會長，唯一嗰個拍最長拖嗰個男朋友已經移民左英國，已經幾年無見過佢啦。
今日落好大既雨，返工又唔知要加班到幾點，呢排係旺季，所以都唔知加班到幾點最好老細唔好捉住我開會就得架啦，。希望今晚十二點前可以返屋企。
朝早10:00返到上環個天已經超黑，今日肯定落勁大雨，點解我唔坐地鐵又坐巴士呢，唔緊要啦，落車衝返去啦，至多咪濕少少。因為我每日都自願性加班既關係，所以我係永遠唔會準時9點返工同人迫既，瞓遲少少，又塞少啲，輕鬆好多，雖然我只不過係住西環。
朝早終於覆完爆曬mail box 既email，食晏梗係即刻跑去買六合彩啦，中左我聽日即刻賠錢辭職去環遊世界先啦，仲返工？我個人真係無咩大志架咋，理想既年紀已經離我好遠，真係想唱返首"不要離我太遠~~啦啦啦~啦~啦~
我有個習慣一到開六合彩即刻對六合彩就會對一對先，有時啲嘢運氣話哩就哩架嘛，哈哈，今次竟然中左四個字，唉，點解唔比我中多一兩個呢，聽日又要起身返工，好彩我聽日一早請左假同我個best frd去澳門玩樂下，都有啲安慰。
做到夜晚9點幾做到個腦已經實曬，我通常都會落街食支煙抖一抖，順面買杯咖啡，當我落到去既時候，見到好多人喺度燒街衣，遠處有個呀婆放左好多祭品喺長樓梯既地下度，望一望我呢邊繼續燒嘢，我又望一望佢，點解今日啲婆婆既樣咁唔慈祥，咁無表情既。我個心係寒一寒既，雖然自己住左咁多年，但係總有啲嘢會避一避忌，例如自己一個唔會喺屋企睇鬼片，就算係好流既港產鬼片都好啦，我都盡量唔會，廢事自己嚇自己嘛。係喎，今朝呀媽打過哩話聽日正日啦喎，都係快快趣上返去搞埋啲趕既嘢走先。
我公司楝大廈係舊式寫字樓，附近仲會有文武廟又多小店，平時我都幾鐘意呢度架，不過今日我就真係麻麻地，唉仲要啲老爺𨋢要等好耐，真係煩。
「叮」習慣搭𨋢望電話既我一聽到聲好自然就行出去，架𨋢得我一個呀麻，梗係無望直出架啦，e,好似有啲唔對路喎，咁黑既，頂，原來未到就出左𨋢，7樓哩既，玩𨋢呀！都未到我公司嗰層，架𨋢又落左去，等下一架啦。我企喺度等𨋢既時候周圍望一望，嚇一嚇，洗唔洗咁多鏡呀，我望到好多個手提電話燈照住既自己，我有少少標冷汗，得嗰兩層，行唔行後樓梯好呢？都係唔好啦，通常啲靈異嘢都係後樓梯行唔返出哩既。都係諗住其他嘢，等下部𨋢算。我不停開game玩分散注意力，部𨋢呢幾分鐘好似過左一萬年咁，𨋢一到，我即刻衝入去，望住係9樓我先行返出去，我已經成身標哂冷汗，唔理仲有幾多嘢做，都捉左個又係做得夜既男同事同我放工一齊搭𨋢走。
「咩事走得咁趕呀安娜？你啱啱先上返哩，等多我半個鐘好無？包你實坐到尾班車，再唔係claim的士啦。」我個好勤力既男同事依然埋首喺佢堆文件中。
我望一望個電話，吓？10:45???我落左去成個幾鐘？！我一支煙加買咖啡咋喎！
「俊，我幾點落去買咖啡架？」我希望佢比既答案我係睇錯時間
「我無理你喎，點知你幾點落左去，你就放假姐聽日，我仲要交report呀姐姐，半個鐘唔好嘈我，我一陣送埋你去巴士站好無？」呀俊依然望住電腦，我無奈地叫自己冷靜一下，扮無嘢，廁所都唔敢去，坐喺自己個位到等呀俊，我今晚係唔會自己搭𨋢走架！
