話說頭先同老婆一路食飯，一路睇愛回家嘅時候，突然發現有一個啡影喺眼前一閃而過。

我虎軀一震，心知不妙，隨即放低筷子，然後以猶豫之中帶點驚恐嘅語氣向老婆示警﹕「老婆......我頭先好似見到飛曱甴......」然後我指一指近電視嗰邊個櫃。

我頭先係見到個啡影係飛咗去電視隔離個櫃，但由於角度關係，我係睇唔到，而老婆係可以睇到。

佢聞言微微側頭一瞄，然後以約100分貝尖叫了一聲，並臉色鐵青的指著櫃側﹕「喺嗰度！喺嗰度呀！」

好呢個時候我首先要交代一下，我同我老婆都係屬於怕曱甴嘅人類，而我哋雖然怕，但係未至於會驚慌失措，尖叫大嗌以至報警求助嗰隻。我哋都會硬住頭皮拎起拖鞋一嘢拍死佢。

但係要留意，今次我哋面對嘅係飛曱甴。相信怕曱甴嘅各位，都知道識飛同唔識飛，兩者嘅恐怖驚嚇程度係完全兩個層次。而飛曱甴最恐怖嘅係，連隻曱甴本身都唔知自己想飛去邊，亂鳩咁飛嘅飛行路線完全無法估計，簡直仲恐怖過神風突搫隊。

喺呢一刻，我相信自己同我老婆一樣咁驚，甚至可能仲驚過佢，因為我feel到自己心跳加速，隻手有些少抖震之餘，仲有少少企唔穩。雖然我好想推我老婆出去，但係身為屋企唯一一個男人，一個有責任保護自己女人嘅男人，我係義不容辭咁拎起側邊一本雜誌捲成棒狀，然後淆住底咁走入戰場。

大戰過程有驚無險，迴避咗佢幾次自殺式轟炸後，我用咗命中+100嘅武器 – 吸塵機成功將佢收服，自從結婚後無乜展現嘅男子氣概亦都返番哂嚟。

不過我想講嘅係，飛曱甴真係好撚恐怖，可以揀嘅我寧願做一個鳩縮嘅男人。