係咪即係叫你自殺？唔係，係黃子華係《越大鑊越快樂》嘅Show入面，講過一句：「失戀唱情歌，等同漏煤氣關窗。」

「你見過幾多女仔，係卡拉ok度喊，佢做咩？佢失戀，佢咪去卡啦ok唱歌，ok呀，但佢唔係去唱藍天架啵，你試下失戀唱藍藍天空高掛我的夢，包保你喊唔出架啵。」

失戀唱情歌，等同漏煤氣關窗，因為你已經咁傷心，仲唱情歌，其實都同漏煤氣關窗自殺無乜分別。

之後，好多人都覺得，咪係囉，啲人失戀係咪傻架。

我睇過一篇文，佢當中引用一份研究，關於音樂心理學，就係到底點解人會係唔開心嘅情況仲會聽悲情歌，同自我調節、情緒之間嘅關係到底係咩。

當中，大部份人唔開心聽悲情歌都係為咗情緒嘅抒發、好想用歌去掛念離開咗嘅「嗰一個人」、係歌曲搵到共嗚或者係歌曲當中搵力量面對困難。

其實就好似黃子華講，如果你傷心仲唱藍天，你會覺得自己心理變態。點解？因為唔岩feel，同我哩一刻嘅心情起唔到共嗚，情緒抒發唔到。

試下你個朋友失戀，你唱財神到畀佢聽，可能你會藉住佢嘅拳頭明白點先叫一齊痛。

因為人傷心，唔係想聽好好聽、好正面嘅說話。人傷心，就係單純想傷心，直到傷心到一日，佢唔想再傷心，你再鼓勵佢都未遲。

人好脆弱，好容易受傷，亦可以好堅強，可以係歌入面搵到力量支持落下。

傷心時候（漏煤氣），就唱情歌（關窗），因為舊嘅你唔死，就會一直停係原地。