最近搭的士嘅次數,都抵得上之前廿幾年嘅總和。
好多時,OT太夜、接住又會太早返工,個人就會任性。
畀自己瞓多半個鐘,換嚟一程百幾蚊嘅的士。
好似毒品一樣,呢種「金錢轉時間」嘅遊戲絕對會上癮。
換咗一次、就有第二次,到第三次就唔再介意有下一次。
喺的士入面,你唔使擔心唔記得落車、又唔使轉車,不其然就覺得玻璃外面嘅世界都有啲唔一樣。
有錢佬一世都唔會有呢種感覺,因為百幾蚊對佢嚟講接近「零代價」。

相對地,對我哋就「代價太大」,所以我好留戀玻璃外面嘅風景。
一條睇心情而塞嘅東廊、除咗凌晨先唔塞嘅紅隧、未必會郁嘅屯門公路,唔同畫面令我明白「難怪古時啲皇帝會微服私訪」。
真係好多民情,你唔親身行落去,根本係一無所知。
車依舊行駛,有時只係短短幾秒,一條直路都係殘破舊樓,但掟過彎就見到幢豪宅。
我唔在意豪宅嘅人點望住推舊樓;只係心酸舊樓嘅人點面對幢豪宅。
已經唔係「努唔努力」嘅問題;對某啲人嚟講,每個人一日有廿四小時就係最唔公平嘅事。
因為我嘅廿四小時係歷險求生;你嘅廿四小時係體驗人生。
見多幾次、諗多幾諗,就會驚覺「原來香港嘅風景變得咁快。」
比起以前,變得仲快。
點解而家先發現?或者因為呢個車廂入面,唔使擔心唔記得落車、又唔使轉車,終於可以停落嚟。
而正正因為可以停落嚟,你望多咗好多嘢。
你只係一個凡人,都可以從左右兩面發現社會嘅事。
但一班高高在上嘅人,卻從來冇郁過,眼尾都冇望過下面嘅人。
或者佢哋仲忙於「特事特辦」、用紅酒杯慶祝緊高達千億嘅高鐵計劃。
香港最可憐嘅就係,畀一班冇了解社會嘅畜生,去管治社會。

IG: cheungson88