每日無論係返工定係放假。起碼都有粒幾鐘係喺交通工具入面。
　
尤其係去日本同韓國旅行，冬天嘅時候啲巴士同地鐵張凳都有暖氣…
嘩舒服到呢～所以一上車我同女朋友就想訓覺…
　
兩個人點先訓得舒服呢？梗係女朋友挨落我膊頭，我再挨落女朋友個頭上面啦！
　
而且經過長時間訓練同配合，我膊頭嘅高度同角度，簡直係完美啊！不過有時訓得太舒服，個人就愈訓愈低，女朋友就會戚一戚起我隻手，以免佢訓到頸痛。
　
除咗長時間保持完美高度，我仲有一個重大嘅任務！
就係留意住幾時落車…
　

「落車叫醒我啊！」女朋友臨訓前叮囑我。
「我都好眼訓啊。」
「你可以訓啊，不過識落車就得，過咗站我擰甩你個頭！」女朋友講完之後就好安然咁進入夢鄉。
　
平時我大約知道會搭幾耐，都可以訓返陣。
去旅行就慘了！尤其係搭巴士，唔會廣播個站名出黎，就算有都唔會講英文。我只好每感覺到架車停低就擘大眼戰戰競競咁睇吓到站未…相反女朋友就完全將個責任交畀我，訓到100%熟睡。
　
落車時，佢就精神飽滿，我就神經緊張，繼續當天嘅旅程…
　
仲記得第一次女朋友挨落我膊頭，喺巴士上層。
我緊張到腰背挺直全身僵硬，我諗佢都唔會訓得著。
佢話覺得好Sweet，我覺得佢頭髮好香。
　
時間耐咗，兩個人挨住都訓到成隻豬咁…
挨慣咗嘅「私家專屬限量不設外借黃金膊頭」，
就一世都無可能戒得甩。
　
大家有無呢個訓得好舒服嘅黃金膊頭呢？
我覺得呢個簡直係最值得人尊敬嘅職業黎！
因為…男朋友係訓唔到落自己個膊頭度㗎！
所以佢係試唔到有幾舒服㗎！
　
（圖：紅薯夫婦）

－－－－－－－－－－－

最新出版：《無病你呻乜嘢吟》
Ig：BlueGodZi
專頁：http://www.facebook.com/BlueGodzi