我同女朋友都係旅行迷，不過我個人比較膚淺，淨係鍾意飲飲食食，返到黎香港，同事成日問：「嘩！你洗咗咁多錢？淨係去買同食？你有冇去寺廟？有冇行山？咁咪唔可以瞭解當地文化囉？」
　
「哈哈哈，我上次去窮遊洗咗嘅錢唔夠你一半，但玩咗成個月！」
　
心諗關你Ｌ事咩…我就係鍾意飲食買，你畀我窮遊成年都唔及食一餐韓牛開心啦。
　
女朋友係個韓迷，幾乎每年都要返「鄉下」一次，就算每次都差唔多行程，佢已經好滿足。佢仲識得捕住幾時有特價機票，又識上網訂酒店，仲成日都會帶「驚喜」畀我…
　
有日，女朋友無啦啦打黎：「我有份禮物送畀你！」
「咩…禮物…」通常佢話有禮物，都係有淘寶送去我公司要收件，再將淘寶嘅小贈品塞畀我做禮物。
　
「上次咪話去旅行嘅！我搶到平機票啊！喲呵！」聽到佢講呢句，我就虎軀一震！
「等等先，你訂咗幾多點飛機…」
「嘿嘿～」女朋友笑得咁奸，就知道…
　
佢又買凌！晨！機！
凌晨機啊！即係天都未光就起身，啱啱落機到韓國就啱啱天光嘅凌晨機啊！
　
「唔緊要啦，有汗蒸幕畀你提神嘛～」
　
去韓國，女朋友最鍾意就係買凌晨機，因為有個地方叫汗蒸幕，可以畀你沖涼，再好似條屍咁攤喺地下訓覺…訓醒仲可以化埋妝先出發，絕對唔會浪費任何一秒Shopping時間！Yeah！
　
「反正都係畀一日酒店錢啦，但行足全日喎！好抵！」
「但好眼訓…」
「訓咗汗蒸幕唔會眼訓啦！」
　

我唔知其他女仔係咪咁，女朋友一有得行街就成個人精神晒，喺佢補購返一年份量嘅化妝品同護膚品時，我眼訓到幾乎行路都訓得著。
　
「我去隔離飲杯咖啡坐一陣等妳…」
「我好快咋，一陣一齊去，你睇吓我已經寫好晒要買乜！五分鐘搞掂！」
「咁我坐陣先…」入到Innisfree護膚品店，嗰張凳對我黎講簡直係天堂。
「好啦，五分鐘！好快～」
　
我坐低，諗住閉目養一養神，等佢五分鐘。
再擘大眼望一望女朋友…佢仲揀緊…
　
乜五分鐘咁耐嘅？我再閉目，隔一陣再擘返大眼，又揀緊…
再閉！諗咗一陣…
咦？！點解我好似咁精神咁嘅？
我望一望手錶！
嘩！我足足訓咗一粒鐘！
　
於是，我即刻走埋去女朋友隔離。
「喂妳又話五分鐘！」
「我仲揀緊啊～」
「咁妳又話寫好晒買乜？」
「我見佢咁多款…我想試吓有乜分別～」
「我去飲杯咖啡先…」
「等埋我啦好快咋～」
「I Dont Trust You！Liar！」
「搞掂！儲夠錢退稅～嗱無呃你啦，去飲咖啡～Yeah～」(五分鐘後）
　
女朋友對於幾時有特價機票，邊區酒店平，買幾多錢可以退得最多稅，韓國邊一區有平靚衫買都非常熟悉。而我嘅責任就好似隻導盲犬咁，帶住女朋友到達目的地，因為佢唔識睇地圖。
　
富平地下街、高速巴士客運站地下街…呢兩個地方對佢黎講係天堂！對我黎講就好似一片一望無際嘅沙漠咁…
　
尤其是係高速巴士客運站，條地下街長到望唔見盡頭！佢一見到就「滋」一聲笑咗出黎…而我每日最期待嘅，就係起身食午餐，食完午餐嗰一刻就開始期待晚餐，然後期待返酒店訓覺。
　　
講到咁慘，同女朋友去旅行開唔開心？
梗係開心啦大佬！哈哈哈，同女朋友去邊都開心！好開心啊！Yeah！（真話）
　
有次工作關係自己一個人去台灣，我先發覺自己一個人去唔到旅行。
我會食得好求其，玩得好求其，行都唔想行，淨係想返酒店訓覺…
但女朋友喺隔離，佢乜都想試，又乜都想我試…
我先有動力去食同行咁多地方。
　
不過，最好就唔好買凌晨機囉…（心底話）
（如有任何韓國資訊想知，可inbox問我，我再問女朋友）
　
－－－－－－－－－－－－－
前幾日出版：《無病你呻乜嘢吟》
　
14/2（日）簽書會：3:00pm
鑽石山荷里活廣場３樓三聯書店
即場買本《無病你呻乜嘢吟》
預早買記得帶，會送獨藍特製繪馬牌。
　
ig：BlueGodZi
專頁：http://www.facebook.com/BlueGodZi