今年係九年之約，七年之約已經冇去，今次我比F.6,7個女班長兼再見亦是朋友既ex-gf Jenny打左五次電話黎逼我一定要去。大佬呀，我O多一日T賺多少少錢唔好，係要黎re-u體會下咩叫酸過葡萄既滋味？
但係Jenny姐突然講左句：「你估下今年個搞手係邊個？」
「如來佛祖叫本大聖去re-u朕都唔去呀。」
「係咪呀？真係唔去？咁你一定後悔喇。」
又係呢d舊橋，比d創意好冇？不過諗諗下，知左冇壞既。於是我就吊起把聲咁話：「邊個咁把炮呀？」
「你估下……好啦我唔玩喇，咪就係Riley囉。」
「吓？佢？前幾年果次唔係話佢去左美國咩 ？我記得佢一次re-u都冇黎過喎。」
其實講起呢個Riley，我就開始覺得心入面唔舒服……高form果四年同班，對佢留低既印象到而家得翻一個「悶」字。真係估唔到以前內向既佢，今年竟然會走出黎搞re-u，要知年年都係做開班會又受歡迎果幾條友做搞手，又要聯絡人又要諗去邊食咩又要book場，麻煩到喊。我又真係估唔到會係Riley做今年個搞手。
「係呀，聽佢講今年佢間公司調左佢去香港果邊既總部喎。」Jenny愈講愈興奮：「仲有呀，佢今次同我地book xxxxxxxxx Hotel囉，真係痴線架。本身我地班友話太貴，冇乜人會去，佢竟然話佢有方法平d。你諗下啦，三舊水食xxxxxxxx Hotel喎，抵到爛啦！今次連肥強同老王都去喎，你都去啦！」
我當堂有一下呆左，我之前聽人話佢去左美國，仲以為佢係香港撈唔掂。聽Jenny咁講，應該掉翻轉，撈到風生水起先係。呢個時候，本身應該好葡萄既我，唔知點解有少少想苦笑。望一望自己身後面既衣櫃，心諗：又要洗錢買新衫去re-u，好彩我冇囡囡，平時冇咁大開支姐。
諗完都知自己自欺欺人，惟有嘆口氣同Jenny講話：「好囉，去咪去，係三舊水先好呀，唔好引我中伏。」
「嘩，話哂我第一次拖手仔就係比你，你唔係信唔過我吓嘛？」
「得啦得啦，再講連你小六借功課比我抄既人情都要還喇。Send日期地點果堆資料比我啦，我而家唔係好得閒呀。」講完呢句，我已經收左線。望一望個鐘，嘩屌，已經就兩點，拿拿臨訓覺，聽日仲要早d翻去開工。
點知話就話想早d訓，點知全晚係度喪諗Jenny同之前去re-u度聽翻黎既野。老老實實，Riley個人中學時期都幾普普通通，唔算靚，身材就ok既 但係又冇話咩特別。性格就真係怪怪地喇，平時唔多出聲，成日陰陰森森咁望人，真係見到都毛管凍一凍。不過九年前既野都唔係記得好清楚，可能有d自己後期加落去既感覺啦。
可以肯定既係，佢係個好靜既女仔，讀書好勁，但永遠都唔係頭三，最起碼記憶中冇見過佢年尾結業禮上台領獎啦。
對佢既印象一一浮現，我好似仲記得佢有一次PE堂跑圈，佢冇戴眼鏡，跑跑下無啦啦搞錯方向一頭撞埋黎，諗翻起排肋骨仲隱隱作痛添。不過唔係話佢肥，而係佢PE好落力姐 （phy識計momentum既巴絲應該明）
大概就係一個咁既人啦。講真，知道佢係今年re-u搞手之後真係幾驚嚇，個情況同打開電視睇台慶發現司儀竟然係劉以達既感覺。不過點都好啦，有得食又正又平既野，又好似幾著數。至於著衫方面，惟有聽日收工去U記睇下有冇衫見得人啦。唔洗審，果班入到BBA既實係全套西裝著上身，拎一個Hermes公事包，踩一對Berluti皮鞋，懶哂一個個商業奇才咁。
唉，都係葡萄少陣，打好自己份工就算啦。
呢間xxxxxxxx 酒店既大名大家都聽過啦，不過我諗真係唔多人去過呢個廳度食buffet dinner。唔好提呢間酒店，我連呢間酒店過兩個街口果間大排檔都未食過。
到左re-u果一日，朕緊係打扮到極盡霸氣咁出門口啦。朕雖然窮撚一條，但係爛船總有幾分釘既，加埋朕既樣都叫過得去，正正常常一個高登仔咁既樣。
就係咁，我逼左半個鐘頭地鐵。Gel好個頭逼一逼地鐵又塌哂落黎，經過塊鏡一望真係忍唔住屌出聲，即刻有幾個周身名牌既港女充滿輕蔑咁轉過黎睥我一眼，然後又擰過頭去繼續督部iphone/samsung。我托一托眼鏡，心裡充滿自豪感，係心入面同自己講：「你班港女而家咪又係拎幾百蚊去食埋d cheap cheap野？朕而家係去食xxxxxxxx 酒店buffet dinner呀，葡萄呀on9？」轉過頭又諗：「今晚唔講得粗口喇，睇下過左幾年Jenny而家仲有冇男朋友，睇下有冇屬於我的機會 。」
港島夜晚既景觀真係唔同哂，霓虹燈五光十色，名牌促銷既大字報，街邊熙來攘往既黑絲長腿，睇到我眼定定。當然，朕表面上睇黎仍係一個正人君子，黑眶眼鏡襯埋啱啱gel翻好既頭，一件設計簡約用料上乘既u記t-shirt，一條衣櫃底摷翻出黎既西褲同有種臭丸味既西裝褸（冇記錯應該係去大學interview買果條，件shirt唔見左）。如果冇google錯，呢種風格就叫caus唔識串 wear。
行左大概十幾分鐘，終於係幢酒店前面停低。我舉高頭一望，開始淆底。頂，雖然google過，但勢估唔到可以靚成咁，我仲諗住咩麗O酒店、帝O酒店已經夠靚架啦。而家望一望，呢個真係爆哂分咁豪華。
正當我淆底緊咁既打扮點行入去既時候，有個女人突然係身邊擦肩而過。我望左幾眼，睇唔到正面，淨係見到佢紥馬尾，著住衫cutting fit到漏既trench coat，行緊入去。眼見有人係前面行左入去先，我都冇頭先咁淆底，就一臉「屌那星頂硬上」咁跟住佢既腳步行左入去。
我攞住電話行入酒店大堂，前面果個女人已經唔知行左去邊，我東張西望左一陣，跟住d牌既指示搭lift，話咁快就去到book左廳果層。我未出lift，淨係敢伸個頭出去睇水，見到已經黎左一批人，都覺得安心d，就出lift向果個方向行去。
行到埋去，嘩，今年仲有簽到簿，婚禮咩？簽完名，我同企係門口邊既Cher打左聲招呼，行入去就諗住搵下Jenny。點知Jenny就見唔到，現職測量師既肥強就衝左出黎一拳中落我額頭度，痛到仆街。我又想爆粗，但係都未黎得切講野，肥強已經嗌住話：「你條茂里上次又唔黎？警告你呀，你下次再唔黎又打多一拳架！」
講就咁惡，但係我同佢臉上都忍唔住出現笑容，伸手拍左拍佢膊頭：「得啦，我捱左呢一拳真係唔夠膽再唔黎喇。喂，話時話，」我壓低把聲：「你有女未？」
「有呀，plan緊出年結婚囉。做咩咁問呀？」
我有d後悔問左佢呢個問題。我呢個連facebook都唔多上既人，連自己中學時期既老死有左女朋友，甚至會早過自己結婚都唔知。睇黎，肥強會成為我地入面最早結婚既第七個人。佢拎出部手機，陰陰嘴咁笑住話：「睇你都長期唔上facebook架喇，你估下我女朋友係邊個？」
我擰頭話唔知，他就拎手機開左facebook比我睇下佢女朋友既相。不睇猶自可，一睇，頭先入黎果兩把火都熄哂。
相中人竟然就係Jenny。
事到如今我都惟有係心入面搥胸痛哭，自嘆生不逢時。仲諗住可能有機會復合，點知就係新娘結婚了，新郎不是我。不過事到如今，我都只好真誠咁講一句：「勁喎，肥強，估唔到你會同Jenny拉埋天窗。我講定白頭到老早生貴子先架喇……」
肥強笑左笑，望住係另一邊同人傾緊計既Jenny，忽然同我轉開話題：「係呢，你應該仲未有女朋友架可？」
我想承認，但又覺得認自己冇女柒到喊，於是唔出聲。肥強轉過頭望我兩眼：「都預左你冇女朋友架喇，我同你講，機會係要把握架，知道冇？」講完，佢就用力拍左拍我膊頭，行去Jenny果邊。
「吓？咩意思呀？ 」我係佢身後問，我諗我而家個表情都幾豐富，聽得出……肥強咁講野係有背後意思，又困惑但又有少少希望既我，望住肥強背對住我揮左揮手，一句「天機不可洩漏」。
頂，懶神秘做乜。
同以前最friend果堆圍埋吹左陣水，由老闆惡行吹到去中學回憶，乜都講一餐。見到我以前熟果堆都健健康康，心入面都幾慶幸。去到畢業後第九年，已經有兩個舊同學離開左我地 ，有時諗諗下，真係有幾分難受，邊個估到世事變幻，PE年年考第一fit到震果位居然最先中cancer走左。佢以前成日發夢都諗住將來買樓組織家庭，到頭尾辛辛苦苦儲既首期，係用黎左買骨灰龕位。可能有d野係上天整定啦……但係真係好諷刺。唉。
人齊之後，就開始食野，我一路食一路幸福到就快靈魂出竅。不過換著邊個，一個禮拜有五日都係食營多做夜晚果餐，突然間比d好野食佢，我諗佢都會幸福到腳震。我餓狗搶屎咁試哂差唔多每個兜既野，食食下，突然諗起中學時睇過本牡丹亭，入面講個窮老書生果句「剔牙杖敢黃齏臭」。對比翻自己而家又寒又酸既樣，用尋日仲咬完營多既牙，去品嚐呢度既所有美酒佳餚，食既時候竟然會係有錯覺自己仲係咬緊營多。我同果個窮老書生都有幾分相似喎。
食到一半，突然間又有人行入黎。我擰過頭望過去，見到頭先入酒店時係我前面果個女人行左入黎。我果下有d詫異，因為我一開始見到佢既時候，完全認唔出佢係邊個，都冇諗過係舊同學。但係而家佢行入黎，咁姐係我識既人啦，但我點都諗唔起有邊個係咁既樣。
我仲發緊呆，忽而見到佢既目光向我呢邊掃埋黎，我嚇左一嚇，差d整跌碟入面既三文魚刺身。呢個時候，我先留意到全場靜哂，連一路講緊肥強點追佢既Jenny都收左口。
我大概估到個女人係邊個喇 。
係Riley。
佢個樣其實冇乜大變，只不過係裝扮唔同左，顯得成個人同中學時既佢截然不同姐。佢從容自在咁行入黎，望住我地好似O哂嘴既樣，微微笑一笑，話：「唔好意思，我黎遲左少少。」
Riley講完果句，大家都仲未好回得過神，得佢一個神態自如，攞起個盤開始夾野食。我批左以前既波友呀陳一肘：「你做咩發哂呆咁？」
呀陳眼甘甘咁望住Riley，萬分沉痛咁應我：「真係勢估唔到，原來佢係個傳說之中既潛力股。早知果陣時就押哂成付身家落去啦。」
「你都痴線既，你肯出錢，佢都未必肯比你入股啦。」我大大力揼左佢一拳：「食野啦柒頭，小心d龍蝦比人搶哂呀。」
講起龍蝦，佢即刻一副 既樣。就係咁，當我地食飽到覺得濟既時候，又係坐低吹水既時候。今年黎左十四個，唔計已經走左果兩個，都黎左七成幾既人，算係好齊人下。大家擔凳圍左個圈，開始你問我我問你咁吹水。Jenny同肥強公佈左婚訊之後，輪到老王話自己準備移民去美國。講到美國，即刻就有人話：「Riley，你係咪啱先係美國翻黎架？」
她點點頭。我見佢仍然唔多野講，好似仲係中學果陣文文靜靜既樣，唔同既係，佢以前著住洗到白哂既校服，而家就係著住塵都唔多見條既Giorgio Armani。啱畢業既時候都估到我地之中有人會發到圍不特止仲要威到盡，但真係估唔到居然會係Riley。
頭先問野果條友又話：「嘩！講開又講，你而家每個月搵幾多錢？今餐好似話你包底喎，你一定發左大達啦！」
Riley好似好尷尬咁微笑，斟酌左一陣，先話：「淨計人工既話，每個月大概十萬左右。」
突然全場靜過陳靜。
肥強第一個出聲：「嘩！痴線架！你出黎做左六年野已經升到上十萬？」
佢平平淡淡咁點左點頭，跟住又補翻句：「不過中間都有去讀part-time master。」
肥強好似係度喃喃自語咁話：「而家工程好景，我都係得四五萬一個月咋，頂，真係痴線架。睇黎我地成班入面你最威水喇。」
我望住Riley，突然覺得自己渺小到幾乎睇唔到。八萬呀！我地之間既距離至少有八萬呀！
講到錢銀問題，開始就有幾個專業股票炒家開始搭爹，佢地急住話自己炒股炒樓賺左幾多幾多萬，聽住佢地口中一個個萬字講出黎好似仲輕過羽毛咁，我心入面又酸又澀。可能我有d錢既話，就可以好似佢地咁，比一大班女圍住，去到呢d場合，仲可以出黎串下嘴。可能呢d就係男人既尊嚴 ，錢同女缺一不可。
但係我兩樣都冇 。
我成場re-u除左同班熟既friends之外，根本冇乜講過野。佢地講炒樓，我無聲出；佢地講靚車，我無聲出；佢地講人工，我無聲出；佢地講結婚，我無聲出。我開始覺得黎re-u係個錯誤，除左三舊水食正野呢一點。我開始明白點解考唔到大學果幾個每年都失約re-u－－大佬呀，點頂呀？窮撚都有尊嚴架。我唔似得Cher個mk肥婆咁，肯放低面子同骨氣，用自己淒涼既處境黎博人同情博人可憐，換黎少少既spotlight。如果要我好似佢咁扮小丑黎滿足果班友既虛榮心，我真係寧願斷哂聯絡 。
去到最後，佢地開左幾支香檳，有班懶醒既開始發表佢地對支野既評價，當我聽到其中一個亂up咩「有鮮提子香味」既時候我就擰轉過頭，決定塞錢比肥強叫佢幫我比錢，然後執野提早離場。
唔知叫好彩定唔好彩，我既提早離場完全無人注意到。
行到出酒店，先發覺酒店入面充滿虛偽既空氣清新劑味同雪種味既空氣，同出面既新鮮空氣，簡直完全冇得比較。我正打算行返原路搭地鐵走人，呢個時候一直響都未響過既手機忽然叮一聲。
我拎出黎望望，原來係一條不明來源既wtsapp。
我打開黎望左眼，嚇左一大跳。上面寫住：「我係Riley，你陣間九點鐘有冇時間，去學校附近間糖水鋪好唔好？」
佢既口氣好平淡，又冇表情符號，我估唔出佢既諗法，淨係覺得成肚疑惑，諗住覆佢呢，又唔知講乜好。諗諗下都九年喇，就算熟到好似肥強、老王同呀陳咁，而家都變成半生熟，見到面，吹下近況，講下以前既野，就冇野好講，彼此望住都覺得陌生。更何況我同Riley完全唔熟，頂多算係hello-bye friend，要估佢既心理仲難估過肥強欠過幾多J數。
望住佢條wtsapp，我發左一陣呆，先慢慢打左一句簡潔既「ok」。
我冇特登諗佢約我去飲糖水係咩意思，而且都唔重要。我出門口既時候，可能仲諗過可唔可以係呢班一齊捱左幾年既同學身上搵到一d自從入左社會就唔見左既野，但我發現，唔單止我變左（變得窮左，毒左，柒左，蠢左），佢地都變左好多。
我唔會奢想用兩皮人工去同佢地比較，根本就係冇得比。就好似一碗營多同xxxxxxxx Hotel既buffet dinner既分別，又好似U記t-shirt同giorgio armani既分別，亦都好似四個人逼一間公屋同手握四五幢物業放租既分別。
「香港就係咁架啦。」我老豆把聲彷彿係耳邊響起，佢果把因為長期食煙而又沙又啞既聲音，就好似一把啱啱磨利既牛肉刀，督落耳膜度令人極度唔舒服：「窮人預左捱成世架喇。你睇我做左幾十年人，都係咁捱過去姐。」
我望住頭頂已經黑媽媽一片既天空，一粒星都睇唔到。香港就係咁架喇。
逼係地鐵既放工人潮之中，我幾乎抖唔到氣。好唔容易拎部手機出黎睇時間，原來而家仲係八點，我搭地鐵翻到學校附近，應該都差唔多九點掛。我有d好奇，Riley如果等到re-u完，邊度趕得切黎呢邊呀。
坐左幾個站，轉車，再坐幾個站，再轉車。搞到頭都暈埋，先翻到學校附近。正正係落車果一刻，我先發現自己唔記得問佢係邊間糖水鋪。一路行一路開wtsapp，係馬路前面停低，啱先打左幾個字，突然好遠傳黎一種令人心神澎湃既引擎聲－－嗚呀！逢係靚車聲，做男人既一定聽得出！我用極快速度擰頭去望，就見到一架紅色法拉利係我面前停低，車入面個人搖低車窗，Riley探出頭黎，一粒聲唔出，擺左擺手示意我快d上車。
我呆一呆，心諗唔係拐帶我下嘛？眼見呢度唔停得車，惟有好淆底咁急急忙忙上左車，坐係佢隔離。望住佢好專心咁揸車，我遲疑左幾秒先問：「而家去邊架？」
她上脣同下脣緊緊抿住，直到轉過彎位，佢先開口講野，聲線平穩，幾乎唔帶感情：「grad din之後我地成班人去果間。」
我諗左一陣，先記翻起：「哦 ！你話緊果間。你唔提起，我都唔記得仲有呢間野……九年喇喎，租金升左咁多，仲可以做到咁耐，都真係幾勁。」
「你唔記得……」佢好似自言自語咁細聲講左一句，就冇再講落去。我懷疑我踩中雷區，但係又醒唔起果次grad din後去糖水鋪發生咩事，最記得都係成班人著住grad din d靚衫靚裙行去糖水鋪時，將個老闆娘嚇到窒一窒。
就係咁，我好安靜又好侷促不安咁坐佢架車，望住車窗出面撓手攬腰既情侶，仲有照到個天同日頭一樣光既燈火。兩個人粒聲唔出，架車轉到去一間糖水鋪前面。我地落左車，見仲有大班人排緊隊，我就話：「有排排隊喎。」
Riley轉過頭望望我，走去係門口招呼客人既老闆娘前面，好細聲咁講左幾句，個老闆娘笑笑口咁講話：「得啦，入去坐啦，有位架喇。」
我即場O哂嘴：果然係有錢能使鬼推磨。呢個時候Riley好似睇穿我諗法咁，拋左一句：「我一早book左位，唔好以為我會用錢撻人。」
我開始覺得不安。一直以黎，我接觸過既女仔多數都軟聲細氣咁講野，動作又嬌又嗲，好似Riley呢種性格寡淡，講話平板既女仔，真係唔多見。九年前佢已經夠cool，九年之後，佢差唔多只能用chilly黎形容。我唔知我而家既心情係驚定咩，係佢臉前，我總係覺得自己做錯左d咩，但係我偏偏講唔出係咩。
坐低左，佢嗌左碗芝麻糊，我就嗌左兜雪花冰。落完單，我終於忍唔住，單刀直入咁問：「其實你……約我黎食甜品做咩？」
佢好似有少少差意，蹙起眉頭，好似望住我又好似望緊好遠好遠既野咁：「原來你真係一d都唔覺……」
我更加唔明佢想講咩，惟有懞下懞下咁望住佢，等佢繼續講野，點知佢又唔出聲喇。我要既雪花冰已經送到黎，佢冇咩表示，咁我都要顧及紳士風度，等埋佢碗芝麻糊到左，先拎起匙羹開餐。
雪花冰同九年前一樣咁好食，d爆珠同透心涼既刨冰簡直係絕配。雖然美食當前，我都覺得好味，但係唔知點解（可能頭先食得太濟？可能呢兩個鐘頭既壓迫感，令我覺得心口焗住焗住咁），總係冇咩胃口，偷偷地望下Riley，見佢冇搽指甲油、乾乾淨淨既手攞住湯羹，係冒住熱氣既芝麻糊入面攪黎攪去，好似同我一樣冇胃口。
我知道佢想講野，不過恐怕佢同中學一樣，仍然唔多識講野表達自己。無論佢係社會上爬到幾高不可攀，而家係我前面猶豫不決既人，仍然係當年果個文靜既女仔，讀書好落力，唔多出聲，好似與世隔絕咁。但係咁諗又好傻，爬得上佢而家既位，點會仲係以前咁單純咁天真既女仔丫？
換句話講，我仍然停係呢個階段，睇怕我真係天真過天真嬌喇。
夾硬吞左雪花冰山個頂，見佢好似未郁過碗芝麻糊。我放翻低匙羹，係心入面排演左一次對白，先扮鎮靜咁開聲：「其實你係咪有野想同我講？我知你平時唔多識講野……雖然而家應該唔係，」我苦笑左一聲：「但係唔緊要架，你想講就講出黎啦，無謂大家估估下。」
佢動作一僵，都放下左湯羹，垂低視線，望住碗芝麻糊望到實一實。
我屏息靜氣，就等佢開口講野。
過左好耐好耐，可能佢見到我兜雪花冰已經融左一大半，先輕輕咁嘆左一口氣。那種嘆氣既感覺，就好似用鼻腔噴氣咁，隱隱約約有帶住哭腔既感覺，我以為佢喊左出來，拿拿臨伸隻手落褲袋想攞紙巾比佢，點知佢昂高頭既時候，臉上面又冇眼淚。雖然係咁，但我仍然睇得出佢眼圈紅過頭先。
我背脊發寒，比正話更加心虛。我真係完全諗唔起對佢做左d咩，高form果幾年，我地就好似兩條平行線咁，從來冇交接。可能有既，但真係記唔清楚。計埋計埋，我地傾計既時數可能仲少過一場pure maths既考試。
佢側一側過塊臉：「你記唔記得係呢度發生過咩事？」
我茫然咁擰頭。
「係出面，我地行緊過黎既時候，」佢好緩慢，但又好堅定咁繼續講：「我曾經行過去你身邊。」
我有少少覺得暈，我努力回憶重現當日既情景。係，我地成班人沿住條街行過黎。街燈昏黃。路邊停左幾架私家車。同學大聲講大聲笑。Riley既身影。佢欲言又止既臉孔。
我終於記翻起grad din果日既事。
果日我借左老豆套西裝同皮鞋去grad din，全場都係同翻班老友聚埋一齊。就算去到跳舞果節，我都淨係傾計算數。但係，我印象中，Riley好似都冇落場跳舞，淨係靜靜雞自己企係我左手邊幾步之外。好模糊既記憶之中，佢好似係著一條寶藍色長裙。
完左grad din，大班人一齊去迫糖水鋪。當我地一排人落左車，行去間鋪頭既時候，我突然感覺到有人扯左我衫袖一下。我擰轉頭，淨係見到Riley呆呆咁望住我，好似想講野咁。我想問佢咩事，但呢個時候仲係我女朋友既Jenny大聲嗌左我一下，我顧唔得咁多，轉翻過去趕去Jenny身邊。
我諗起更加多野。
好似係有一日朝早佢兩隻手擺係身後向我行埋黎，窒下窒下咁講左句早晨，呆左幾分鐘，就轉過去跑走左。我淨係黎得切睇到佢手上面好似揸住封野。
又好似果次PE堂，考左五年PE尾十既佢，第一次跑圈成為全班最快果個，然後－－佢就撞左埋黎。可能果陣時，我係感覺到佢隻手係環住我條腰，亦有可能，只係我呢一刻自我幻想既假記憶。
再講到公佈大學派位果日，佢企得好遠，望過黎。我果陣時喊緊，因為我入唔到我夢想既學系。我果陣時唔知佢入左咩學系，後來先知，佢入左我原本擺A1既科目，而果科係要數學好好先入到。但係，佢校內成績數學一直唔太好。
畢業禮上面，佢企係門口，對眼好似鎖係我身上面。我以為佢想笑我，全級考得最好果幾個，上台攞埋獎，威到盡啦。我擰埋一邊，望向我班兄弟。好煩，我果陣時係咁諗：考咁好仲要奚落人地？但，我知道佢冇移開視線。
中學生涯七年既點點滴滴，匯成一條河條，指向答案。
我知道自己隻手震緊，但我無意保持鎮定。喉嚨乾到好似被火燒一樣，頭開始昏昏沉沉咁痛起黎。眼前Riley個樣好似散光效果一樣睇唔清楚。
她把聲放到好輕，輕到幾乎聽唔清楚：「你知道喇。」
我簡直唔識點回答，只能夠大力吞左啖口水，點點頭。我唔敢相信我咁多年黎都諗唔到。肥強果句「天機不可洩漏」又係耳邊響起－－惟獨是我自己一直不知不覺。
Riley一直一直都好鐘意我。
我錯過左太多野。中學既時候，條件唔錯既我都叫戰績彪炳，級入面最靚果幾個都做過我女朋友，由三個月到兩年不等。我果陣時，企得好高，我完全望唔到Riley既存在。我記得我同我班friends私底下笑過佢性格怪。我記得有好幾次，佢想同我講野，吞吞吐吐間，我已經走左去。
我好後悔。我忍唔住低頭將塊臉埋入掌心入面。但係邊個會估到最後結果會係咁？佢為左我，谷數學報我既A1，但係就係果一次，我跌左落谷底。而佢就好似一架上左軌道既火車，身不由己咁沿著設計好比佢既路軌向前衝。而我就永遠留係果個谷底。
以前係我行得比佢前，佢係我身後追趕；到左而家，已經變左我望唔到佢遙遙領先既身影。
係咪真係上天整定係咁？
呢個時候，佢又嘆左口氣，搖搖頭：「你係我七年中學既夢想。」
我完全發唔到聲。我懷疑我手掌已經痴住左我塊臉。唔知過左幾耐，我隱約中感覺到佢拎起手袋係我身邊經過左，就好似今日傍晚佢係酒店門口同我擦身而過一樣。
當老闆娘催促既說話傳來，我先慢慢企起身，木然行出糖水鋪。
舉高頭一望，天已經完全黑哂。同頭先一樣，一粒星都冇。我記得九年前仲可以隱約見到幾粒，而家真係一粒都見唔到。
就好似我既未來一樣。
【完】
