【我最鍾意開槍嗰班大隻仔，尤其俾人起晒底嗰個】
全城熱話都鬧緊嗰班人，而我就偏偏鍾情佢哋。利申，我講緊黑社會，唔係你哋所諗嘅制服人。
我係貪佢哋夠頭腦簡單得嚟又肌肉發達，呢種人，最易受人操控。
正合我心。
俾人起底嗰個，夠晒後生同皮光肉白，我好快就用交友app搵到佢，即刻hi咗佢先。
傾咗成晚偈，就成功約到佢出嚟。其實唔難，一開始佢都驚我係連登仔釣狗公咁玩鳩佢，但再講多幾講，send多幾張自拍性感相，我又好同情佢呢種職業咁，佢好快無咁戒備我。
第一次見面，我們約咗晏就，喺party room叫咗外賣，一齊睇DVD。我令佢以為係自己揀咗套戲，其實我一早揀好咗，係一套血腥三級電影。
每每有暴力殺人場面，我留意到佢緊張到狂吞口水、雙眼睜大，呢個絕對唔係驚嘅表情，而係興奮。好好，咁樣加強我今晚同佢做「嗰樣嘢」嘅決心。
天黑後，我哋喺超市買好沙律菜同紅酒，就上咗我屋企。
「你係自己一個人住？」佢極力平淡咁講，但遮唔住佢色迷迷嘅眼神。
成餐飯入面，佢講咗好多關於佢份工嘅嘢，上司點樣Train佢哋呀，話自己做嘅事好有意義等等。
我放低刀叉，問佢：「咁如果俾你開槍射中嗰個人死咗，你有咩感受？」
佢愕一愕然，然後一輪咀正義化自己嘅行為，最後講講吓無啦啦眼濕濕。我唔知呢種矛盾嘅心態點產生，大概喺佢深心處，仲保留一點點人性掛？
但點講都無用，我唔會可憐佢。佢飲完紅酒之後暈咗，因為佢嘅體質我加重咗藥，我好辛苦將佢搬入貼好晒膠布嘅廁所。
肉，要新鮮先最好味。依家先係今晚嘅主菜，我講緊牛肉。
處理好之後，將多餘嘅肉放喺雪櫃，揀咗大腿肉切成一粒粒正方形，加牛油放上平底獲，猛火煎封，鎖實肉汁，我講緊牛肉，一口牛肉。
按經驗，佢啲肉介乎於五成到七成熟就最好味。果然無令我失望，平時有操開體能，夠晒多肉而且彈口，我講緊牛肉。完全唔使調味，煎好加啲海鹽就食得。
============
覺得好睇嘅就花幾秒時間禁個 like丫
當然share埋同留言就最好
👇facebook: 橘子綠茶👇
https://www.facebook.com/greenizmstory/
.
👇ig: greenizmstory👇
https://www.instagram.com/greenizmstory/
