【怨魂索命－速龍篇】
喺林鄭校長嘅管治下，香記中學校風非常差，校園欺凌問題嚴重。人稱「速龍」嘅大隻仔，係其中一個欺凌者。矛盾嘅係，他係風紀隊長，而且深得老師們喜愛。
之所以會咁，因為林鄭校長係性格扭曲嘅老女人。她深信極權統治先係成功之道，但有法律同校規嘅限制，佢唔可以對學生動用私刑，於是就有速龍呢個風紀隊長出現。
欺凌手法不外乎都係嗰啲，呢度唔詳細講，重點係楊同學俾速龍同佢啲風紀隊員長期欺凌後，喺學校天台跳樓自殺身亡。而故事先正式開始。
楊同學本嚟係想以死相諫，但俾校長同校董會以「學業壓力以致自殺」嚟蓋掩真相。不過唔緊要，種因得果。
楊同學過身後，速龍身邊發生一連串怪事。
頭一晚，速龍喺睡房玩電腦嗰陣，覺得身後面有人望住佢，擰轉頭睇又咩都無。當他熄電腦，屏幕一黑反射，竟然見到有個人影喺身後！
回頭一睇，又係空無一物。
當佢話俾風紀隊員知呢件事，隊員不以為然，話速龍可能諗多咗。第二日朝早，隊員就遇到交通意外入院了。
一切都只係巧合——速龍咁樣覺得。
楊同學過身第二日，全班同學去校外泳池上游水堂。落課沖涼嗰陣，速龍覺得熱水涼好舒服，甚至沖沖下昏昏欲睡。呢個時候，忽然傳嚟體育老師大叫自己全名嘅聲音，速龍即刻披條毛巾開門。
「咩事？」速龍一開門，同學們早已沖好澡、著好晒衫，仲有老師，大家一齊用好詫異嘅眼神望住自己。
奇怪，明明沖咗一、兩分鐘啫。
「你頭先去咗邊？」老師交叉雙手放喺胸前。
速龍下意識望望掛牆鐘，時間居然過咗兩個鐘？！
老師話大家搵晒成個泳池同淋浴室，甚至用埋廣播叫佢，都唔見佢身影。速龍支吾以對，最後大家以為佢貪玩就草草了事。
而事實只有佢自己知道，明明佢頭先沖涼，咩都聽唔到......
決定要請法科師傅幫手，基於速龍身上嘅離奇皮膚病。
嗰朝他如常起身，去廁所梳洗準備返學。刷牙中途覺得右手臂痕痕地，一睇，竟然係一大片紅色一點點嘅斑疹！
醫生話佢應該係俾床蝨咬，但係無論速龍查咗咩藥、轉幾多個醫生，或者請滅蟲專家上嚟，速龍嘅皮膚都仲係一達達紅疹，而且仲蔓延去全身。
每日佢最期待就係訓覺，因為每當佢有意識就極度痕。佢滿腦子都係「痕」呢個字，無法思考，甚至控制唔到自己，大大力R痕，搞到成塊面出晒血。
短短幾日，他變成一個爛人咁樣，唔係靈魂壞咗嗰種爛人，而係字面上，全身表皮血肉模糊嗰種，又出膿又出血水。
屋企人幫佢打去學校請咗幾日病假，無計可施之下，請咗法科師傅——高師傅上嚟屋企。
高師傅作法後，望住速龍雙眼，表情凝重咁問：「細路，你老實話俾我知，你係咪得罪咗人，或者做過一啲傷天害理嘅事？」
喺速龍爸媽撲出嚟話無之前，高師傅再講：「你唔怕老實答我，解鈴還須繫鈴人，我會盡力幫你。」
速龍望住自己大肶上滲緊血嘅抓痕，諗起自殺死嘅楊同學，「我嗰班確係有個同學喺前幾日自殺死咗，不過佢係自己讀書唔叻睇唔開囉。」
對於楊同學自殺，速龍絲毫無內疚或同情，他知自己一直蝦緊佢，但唔係咁嚴重，速龍真心覺得學業問題先係主因，楊同學太軟弱喇。
「嗱，」高師傅誠懇地勸道：「我依家就睇到有人對你落咗某一啲陣或者法，所以你先俾嘢搞。我可以幫你作法破陣，不過你得罪咗邊個，最好去誠心道歉。我唔係幫到你好多次㗎咋。」
雖然高師傅唔識速龍，不過高師傅做咗呢行好耐，接觸過唔同人，而且法力高強，佢睇得出速龍呢個後生仔心存歪念，導致個氣場同相貌都係灰灰黑黑，恐怕隨時招嚟血光之災。
高師傅作完法離開速龍屋企之後，楊同學嘅父母即刻收到電話，係泰師傅打嚟。
「喂。」楊爸爸講。
「我係泰師傅，之前幫嗰個男仔落嘅法俾人破咗喇。」泰師傅惋惜道。
無錯，楊氏夫婦知道自己個女因為俾人欺凌而自殺，可奈搵唔到證據，令速龍逍遙法外。有親戚介紹呢位泰師傅，話或者可以令速龍痛不欲生，梗係即刻試下。
楊氏夫婦另外再請私家偵探，暗中監察速龍一舉一動。見到佢塊面爛晒嗰刻，不知幾開心。點知幾日唔夠，就收到泰師傅呢個壞消息。
「點會咁快㗎，」楊爸爸同楊太太對望一下，緊張問：「咁有乜辦法？」
「辦法就唔係無嘅⋯⋯」泰師傅經典地遲疑、停頓一下。
楊爸爸立刻意會到佢嘅意思，話：「我多多錢都俾，最緊要真係Work！」
「好好好，咁我準備一下先，過幾日報個價俾你。」泰師傅匆忙收線。
殊不知，泰師傅未報價，事情又有新發展。
首先係親戚打嚟道歉，話原來泰師傅係神棍，自己都俾佢呃唔少錢。
再嚟係幾份報紙嘅報導：香記中學再多一名學生自殺身亡。
嗰個，正正就係速龍。
報導話佢係因為學業壓力自殺，而楊氏夫婦再明白不過，速龍呢種人點會為讀書煩惱，定多咪升去毅進讀書，再唔係咪中學畢業去考警察。佢根本無諗過要讀大學，何來有壓力。
重點係，速龍自殺當日，正正楊同學嘅頭七。而自殺方式，亦係喺學校天台跳樓。
睇到呢度，楊氏夫婦抬起頭，對望大家，眼神流露一種心有靈犀嘅瞭然；兩個人相視而笑，係搞清楚一件事之後，嗰種釋懷微笑。
最後楊太太用濕潤嘅雙眼，望向半空不捨咁話：「你可以安息喇。」
物極必反。
種因得果，惡人自有惡報。
===完===
👇facebook: 橘子綠茶👇
https://www.facebook.com/greenizmstory/
👇ig: greenizmstory👇
https://www.instagram.com/greenizmstory/
