生日，除咗代表住自己歲數有所增長，亦都代表住自己嘅心境成長。

細細個嘅時候，總係會好期待長大，好想話公布天下，表示自己已經大咗一歲，係大個仔大個女嘅最好證明，仲要用蠟燭嘅數量去代表年齡，期待住蠟燭佈滿蛋糕嘅一日。

「生日快樂！開唔開心啊？」

「開心！」

當屋企人咁樣問，我哋會毫不猶豫、真心真意咁回應。

而我哋最大嘅願望就一定會係去玩具鋪揀份最大最靚嘅禮物，之後向班同學炫耀生日禮物係最新款嘅玩具乜乜乜。咩身體健康開開心心，從來都係願望清單入面最低嘅選項，因為每一日都過得好開心，就算有咩煩惱，喊一喊，另一日就會忘記曬，唔會日諗夜諗，自尋煩惱。

到我哋開始大個，踏入中學、大學，生日，已經係同成班fd去慶祝、唱通宵K嘅最佳選擇，特別係十八歲嘅時候，一定會Call齊朋友，盡情玩到顛曬先叫做享受過青春。係呢個年紀，屋企人似乎已經被我哋遺忘咗，既然都成日見，生日玩幾日通頂都唔過份姐？而且，我哋都係成年人，唔洗再下下聽佢哋請講，有自己嘅主見。

唔知由幾時開始，腦入面會冒起呢個諗法，朋友同男女朋友先係最值得花時間去見嘅人。

到後來，踏入現實社會翻工，每日一樣嘅工作開始令自己麻木，麻木到唔想揾人出嚟玩，只係想好好咁休息，甚至忙到唔記得自己生日，又或者認為生日只需要簡單食餐飯就夠，至於同邊個慶祝，都已經唔重要，朋友又好、另一半又好，有人陪自己去渡過呢個日子已經好滿足。

當我哋已經不知不覺被生活磨滅成齒輪，每日每夜都挨緊重覆又重覆嘅飯盒，每年生日，就會漸漸記起默默守護我哋嘅家人，好想去食翻餐媽媽煮嘅三餸一湯，可能唔算得上非常好食，不過，好想去回憶翻當年無拘無束，可以好好去享受一餐晚餐嘅感覺，笑下當年屋企人因為自己講一句好鐘意食某某飯餸嘅說話，而搞到成個月都係同一碟餸嘅黑歷史，然後再關心下佢哋嘅身體狀況。

之後，你會發現，

咦，點解佢哋啲頭髮白咗咁多？點解隻手多咗咁多皺紋，點解我從來都無發現？

唯一不變嘅係，
佢哋關心自己嘅心意，

「你最近翻工辛唔辛苦啊？夠唔夠錢洗？」

「唔辛苦，夠錢㗎啦，我怕你哋唔夠咋！」

大個咗，唯一唔同嘅係，就算自己有幾辛苦有幾難挨都好，亦唔敢承認，因為怕佢哋擔心，所以情願講善意謊言，都唔肯講事實。

然而，身為家人嘅佢哋，又點會睇唔出？
所以只好用婉轉嘅方法去表達，希望可以幫輕下自己。

「咁好啦，記得得閒翻嚟食飯。」

一句，就已經足夠窩心。

如果，生日代表成長，
咁真正嘅成長應該係，

唔再追求花巧嘅生日禮物，只係希望所有自己愛嘅人都可以身體健康開開心心。

呢樣，係最簡單亦最難達成嘅願望。

咁你嘅生日願望，又係點樣？