你知唔知咩係男閨密？呢個大陸名係幾難聽，所以有人索性歸類做「兵」。
但係我可以話比你知，其實係有分別，因為做男閨密，係慘撚過食屎。
男閨密，別稱「比男朋友更親密的朋友」，同「兵」係有分別，分別在做「兵」係有距離感，係有個身份差異，你係「兵」，唔會係朋友，都唔會係男朋友。
而男閨密，你會係朋友，你會係好朋友，你會係friendzone走唔番出黎。
做兵頂到盡都係浪費左時間同金錢，因為所有野都係基於感情係假既事實上。
但係如果有過一段感情做基礎，朋友以上，戀人未滿，咁先係最難受。
不過當然啦，「朋友以上，戀人未滿」呢啲你諗出黎架姐，可能對方覺得我地只係普通朋友。
點解難受？同賭錢一樣，你贏左好多鋪，但到你認為時機最合適既一刻，重注一鋪，放手一搏，晒冷，點知就輸晒，睇得開既人咪會問：「晒住一半先，得嗎？」
如果我睇唔開呢？我賠上既唔只係一鋪既錢，我間接印證左，所有喜悅都係假既，所有我啱啱認為係真既野，係一刻之間化灰。
做兵其實都係一樣，不過佢地係唔會贏，就算贏都係一鋪，下一鋪就好心急晒冷，所以都死得快。
男閨密就係一場，賭細注永遠都贏，一賭大注呢，個荷官就會話：「其實我唔捨得無左個咁好既朋友。」姐係證實死亡。
所以，表白係一場永永遠遠都唔會贏既賭博，因為真愛係唔撚洗表白。
成日見到啲電影情節，表白完之後就一齊，係老虎蟹都會一齊啵，你就會明，就算佢地跳過左表白呢個過程，佢地都會起埋一齊。
因為表白對於佢地黎講係一個唔太重要既野，互相相愛既表白，唔算得上係表白，充其量都只係個儀式，唔會輸。
叫得做男閨密，就緊係唔係相愛啦，一係個女既單戀個男既，一係男既單戀個女既，如果係相愛既話，我覺得無需要或稱唔上進入閨密呢個階段，因為閨密係要用黎掩飾一啲野，掩飾一個供需既關係。
作為供應一方，當佢個需求上升，個價格上升，你個供應量都會上升。
價格即係話段關係既價值，佢個需求就係對朋友同群體需求，你既供應就當然係時間心機精神，當然，你自己本身腦入都會多左啲激素啦。
不過正正因個市場得一個需求方同供應方，當佢攞夠啦，厭既時候，佢條需求線會「呯」一聲唔見左，你個條向左傾既供應線都會隨之消失。
做兵個市場係得佢自己一個，唔會有需求方，就算無需求，都要生產。
男閨密既弊處正正係條需求線，因為條需求線既存在，係藉住同你條供應線相交，話比你知個價格係邊，做兵既就體會唔到個價格。
我知我地既關係係有個價，我以為個價越高，我地越有機會係埋一齊，點知其實個市場同幣少同你講買FFC係無分別，啲交易記錄都係佢一條友搞出黎，但係其實個幣係唔值咁多錢。
姐係話，個個相交點，係一個騙局，係一個掩飾，所有野都係假。
你地既關係係無價值。
然後我戇居居咁走去表白，你話我個收場會係咩？
你老尾你唔係以為「啲錢係會從天而降」咁戇鳩啊？
我地曾經最好既朋友，但當我有左鍾意你既念頭，所有野都只會係一場自欺既騙局，呃我個個唔係你，係我自己。
一年之後，我去搵你，最後我地仲衰過未識之前，
即使我仲係好鍾意你。
我將呢場騙局，足足延遲左一年三個月。
最後一張合影，我地都係無影到。
我好傻咁等左一年，我希望我地會有和好既一刻，點知，我白等左一年。
要考DSE啦，好快咩都會消失。
原來我同你既回憶都只係一場騙局。
