此為「究竟條友叫PTGF做咩?」結局，請先閱讀「究竟條友叫PTGF做咩?」故事
對面商場個天台無封到，我沿住封塵既商場樓梯，一步一步行到上天台門口。
門柄有啲緊，睇黎荒廢左好耐，要用好大力先勉強開到。
野草橫生，一啲工業既廢棄物比人棄置係呢到，白色帶塵既牆身，灰色既地磚，呢一個地方，將會見證我人生最後既一刻。
我爬上較高既牆身，發現今日天氣好好，咁藍既天同咁暖既大陽，不過呢一切都唔會留得住我，因為我曾經係太陽同藍天底下，受過無數次傷害。
藍天同太陽，只係一個傷痕既見證，我寧願個天係灰色，密佈烏雲，最好落埋雨，因為你唔鍾意落雨出街，咁我先唔會有機會見到你，我唔想比你見到我死係你面前。
我至細就失去雙親，無任何親戚，無兄弟姐妹，我被一個家庭收養左，不過呢個家庭係好黑暗，家暴，比人收數，變態行為，就連係個個家庭唯一對我好，肯聆聽我既阿妹，都比個個獸父性侵左。
但我已經習慣曬獨自一個面對所有。
就係我中學既一段路上，我遇到你，我認定左你係我人生既唯一希望，我花光一生既運氣，只係為左遇見你。
你係一個好受人歡迎既人，唔鍾意人講粗口，做事企理，但係又唔鍾意笑，你眼內亦容不下沙子，我呢種咁一般既人，就算點努力，都唔會高攀得起你。
其實我係幾年前就想離開，不過係因為遇見你，我為左每日都見到你，努力咁活落去，竟然無意地成為左我既精神支柱。
每次見到你，我個受辱既心就會比你既笑容慢慢治癒。
我為左你多活左三年，受苦多三年。
但係，我有多庝你，你不知，你令我有多痛，我卻清楚。
不斷既自卑，令我又重回三年前既陰暗深淵。
你唯一同我講過既一句，亦成為左我人生最後一刀。
我曾經搵左一個人援交妹代替你，但係佢同你真係差好遠，氣質又不及你，做咩都比唔上你，但係個一刻，我當左佢係你。
我將對你既感情投放曬落佢到，將所有野留曬比佢，個堆野就係我三年內痛苦既見證。
竟然一幅咁簡單既合照，我都要搵人代替你，我係有幾咁唔值？
我諗唔到有咩野我可以永遠留係你既心入面，除左死亡。
我既血會乾涸，我既思念會散落係我屍體既附近。
所以既痛苦，會係一躍之內，煙消雲散。
死左之後，我就再無機會打搞你，你既人生應該會比之前更好，因為我既消失。
你係一個天使，我只係一個比人折左翼既惡魔，你唔救我，都唔出奇。
我希望你得知我既死，你會開始愧疚，只要你為左我衰傷過一秒鐘，就可以啦。
突然天色一變，本來青藍既天空比烏雲蓋住，漸漸變得灰黑，水點開始打落我既身體。
「記住好好留係屋企，唔好出街啦，唔好淋濕，保重身體。」我望住對面私樓既其中一個單位，最後一次記起佢。
阿媽，阿爸，我遲左三年先落黎搵你地，對唔住，因為我無勇氣活落去。
我用手止住眼眶入面既眼淚，調整呼吸，蹲身一跳，一躍而下，下墜既衝力將我搞到暈左，「人生走馬燈」出現左。
不過，呢個「人生走馬燈」，無其他人出現過，幅幅畫面都係你既面容，你努力既汗水，你既梨渦，你既水汪汪既眼，每幅都係我面前掠過。
我希望我既靈魂可以永遠守候你左右，即使你只會為我衰傷過一秒鐘。
就算一覺唔好彩，我比牛頭馬面拉左落地府，都仲會有人好落力保護你。
只要我飲過孟婆湯，所有野都會忘記，所有痛苦都會如河中流水逝去。
呢個咁殘酷既世界，冷冰冰既人性，終於可以擺脫一切，安安靜靜咁遇見下一世。
不過我依然希望，下一世既我，係一個配得上你，事業有成，亦再有運氣遇見你既大男人。
死在你附近我會很幸福，因為我既靈魂就會留守呢個地方。
「砰！」街頭一旁發出巨響，有路過既學生嚇得尖叫，屍體附近聚集人群，有途人開始打電話。
一陣陣鐵鏽味散開，血濺到附近既商鋪：「屌那媽，跳樓都搵好啲地方跳啊仆街，唔撚洗賣啦我啲野！」
有學生亦急急忙打開電話相機，再PO上SC IG，貼文道：「RIP」
消息傳開後，再有教育人士指責政府造成學童自殺問題，要求政府負責。
學校禮堂亦傳出校長既聲音：「對於近日有同學自殺，我地校方係表示極度遺憾，希望同學遇到問題，唔係用自己既方法解決問題，而係要搵駐校社工。」
台下同學議論不斷；「我好似無點見過呢個人。」「一定係班訓導逼死佢。」
大家都抱住一種又似著緊，又似不理既狀態。
有老師低頭沉默，亦有老師咬耳仔咁講野。
有一個男同學問一個女同學：「佢係唔係……仲要死係你屋企樓下。」
女同學冷淡回答：「我唔識佢，不如諗下等陣早餐食咩好過啦。」
一陣冷風吹過禮堂既窗簾，窗戶比風吹到左搖右擺。
沒有涉及死亡既感情，不算得上有生命愛情。
這次的死亡，沒有改變任何，只是地上又多了一面血跡。
但卻用死亡見證了愛情，一段不值一提的愛情。
