「唔好意思先生，你八達通唔夠錢。」

「嗯？我張八達通自動增值架喎！」

片刻，我恍然大悟，今早我已經自動增值了一次，已超出了本日的增值上限。

我面帶尷尬地望了收銀姨姨一眼，她那種強迫裝出的笑容教我有點不自在。

「哈哈⋯⋯唔好意思。」

我望著空空如也的荷包，嘗試在身上其他地方尋找應急的零錢。可是我身後的人龍漸漸傳來不耐煩的鼓噪，所以⋯⋯還是算吧。

「哎呀，我去撳個錢先!轉頭返黎俾錢！」

= = = = =

「我仆你個街⋯⋯」

自動櫃員機裡的畫面將我的面目照出一面青光。

結餘：$20。

距離出糧日子尚有三日，然而在這個令人面色發青的餘額下，想要捱過這三天一定比登上珠峰難。

我可以怎麼辦呢？

明天的午餐錢呢？晚餐怎樣處理？車錢呢？還有孩子的零用呢⋯⋯一切本來很易解決的問題，突然間比寫大學論文還要難。

嗶嗶⋯⋯嗶嗶⋯⋯電話聲就好像催命一樣以急速的節奏響著。

「喂？」

「阿匡哥仔，你響邊呀？」電話旁邊是我的上司，發哥。

「發哥，六點鐘啦喎。」

「咩呀？唔撚洗做呀？我都未收工你就走左？我仲幫你執緊手尾呀！」

「我個女病左，我老婆未收工，要返去幫我外母湊呀嘛。」事實上，我內心在數算著我的乖乖女在本月應該「病」了第十次⋯⋯吧？

「我唔鳩理呀！你今個月條數點呀？開夠單未呀？打左cold call未呀？搵到新客仔未呀？」發哥：「你個柒頭，成條team業績比你拉低晒。你聽日同我打夠三百個call,開到單先好走呀！」

卡嚓—！

嗶嗶嗶⋯⋯嗶嗶⋯⋯！電話才剛收線，又再響起。

「又點撚樣呀！喂！？」

「細佬。」

「家⋯⋯家姐？」

「你今個月交左租比老豆阿媽未？」

「對唔住。」

電話一旁來了一聲長長的感嘆。

「你今個月係咪唔係好惦呀？」

「嗯⋯⋯係呀。」

「我幫你交住先。」

「多謝家姐。」

「細佬，你咁大個人，家姐實在唔想鵝你。你知唔知你已經好幸福啦？老豆留左間公屋比你同老婆住，裝修又幫你出埋。而家只係象徵式咁比返幾千蚊租老豆唧？咁都做唔到？」家姐：「由細到大都要屋企人睇住你。你而家有老婆、有仔女，唔可以再係咁啦。買少D無謂野，為自己、為你老婆仔女打算一下啦。」

「知道。」

= = = =

「喂，七叔。可唔可以R枝煙黎食下？」

我抱著擾人的煩惱，不經不覺來到觀塘公眾碼頭旁。

「嗱！咁0岩我食左半枝。」七叔將半支煙遞給我。七叔是住在碼頭裡的露宿者，由於我經常於放工後到碼頭散心，所以不知不覺地與七叔熟稔起來。

「多謝。」我將這半支煙夾在指間，凝視著煙圈。

「酒呀！要唔要呀後生仔！」七叔。

「凍唔凍先？」

「我撚有雪櫃呀柒頭！」七叔飄出一堆粗口，將一枝啤酒放在我旁邊，但他倒是友善的。

我笑一笑，內心很感謝他的慷慨。可能七叔慣於身無一物的生活，所以也不介意與我分享他所擁有的。

其實我不會抽煙，甚至非常討厭煙味。但偏偏我卻喜歡香煙慢慢地燃燒著的畫，還有自由自在飄在半空裡的煙圈。

此時此刻，在喧鬧的都市、在揮之不去的煩惱中，好像找到了一絲的寧靜。

「七叔呀。」我呆望煙圈：「點解做男人咁辛苦既？」

「辛苦就做女人囉！」 七叔打著赤腳來到我旁邊。

「一個星期返足六日工。仲未計ot。已經冇咩自己時間。一個月搵到三萬。係呀，係唔算差呀。又唔洗供樓。但係為左屋企，為左老豆老母，為左仔女⋯⋯唔覺唔覺洗晒。七叔呀，你明唔明一出糧就糧尾既心情？」

「仆街仔你而家係咪潤緊我？」七叔：「不過我明呀！就好似⋯無間地獄咁！」

我無奈地說：「唉⋯⋯點解做男人咁辛苦。」

噠！我將煙尾彈出海面，在空中留下紅色的孤光。

「份工做得唔開心。壓力好大。換轉係細個既我，一定神早走人。但係就算準備晒cv、有人in我都好。臨門一腳我都唔夠膽見。我怕搵唔返而家呢個待遇。」

我喝了一口酒，道：「走又走唔到。壓力要焗食。屋企人好似唔係幾明白我，嫌我比錢屋企少。同屋企人D拗撬多左。」我：「去到三字頭呢個年紀，我開始忘記咩叫開心。唉⋯⋯我好耐冇掂過相機！我好想做自己開心既事之餘，又可以照顧屋企！」

我嘆一口氣，說﹕「其實有份工黎緊會IN我。直頭係另一個行業黎。人工又好唔穩定，又知請唔請。但係呢份係我鍾意既工，可以日日做我鍾意既事！我唔想每日一都行屍走肉呀！⋯⋯七叔呀，其實男人為左屋企，係咪咩都要放棄架？」

「我都冇屋企人你問我托柒呀？」七叔頓一頓，又說：「後生仔，你膀頭攰唔攰呀？你揹住咁多野，點飛呀？」

我不太明白地望著七叔。

「好似呢度咁。幾多老友記響呢度霸地方搭屋仔訓。嗱！旁眼人睇好似好亂！」七叔搭著我肩膀，指著碼頭上形形式式的「木屋」，又說：「事實上，呢度就自己一套規律！」

我看不見亂七八糟的碼頭有多規律，也許這是無家者才會看見的秩序吧？雖然如此，一面污穢的七叔卻笑得滿有自信⋯⋯唉，他又人生教練上身了。

「我地個個都知呢個地方始終係公家野。所以我地就算有幾唔拾得都好，都會間中掉下野。始終太過份，政府就會趕走我地嘛。但係對我來講又唔係難事。」說著說著，七叔從褲袋裡拿出一張發黃的照片他又說﹕「呢度一張櫈一塊木都可以唔要，甚至我人生入面咩都可以掉。但惟獨呢張相就一定唔掉得。」

說著，我聽到了一點酸楚。七叔慢慢地向我展示出這張發黃的照片。年輕的七叔意氣風發，身穿西裝，端裝地坐著。他旁邊是一位有著中國傳統婦女氣質的女性，是七嬸。站著二人四周的，正是七叔的子女，一共有八位。看他們的衣著可知，照片該是拍攝在一五、六十年代，而且他們該是非常富貴的一家。

這一張相正是七叔最珍而重之的全家福。

「男人呀，冇左屋企，就咩都冇架啦！」七叔一笑，彷彿笑出了六十多年的辛酸﹕「所以，後生仔呀！你揹住咁多野，點飛呀？你覺得邊樣野阻住你飛既，你未掉左佢囉！」

七叔拍一拍我都肩膀，就跑到其他朋友身邊繼續閒聊。

我望這個大老粗，好像明白了些甚麼。

此時，我懷中的電話響起。

「喂？」

「老公。 你響邊呀？咁夜都未返。」

「散下心姐。阿女呢？訓左未？」

「訓左啦！你成日唔返屋企，佢就黎唔記得你啦！」

「老婆呀⋯⋯我想⋯⋯」

「想轉工呀？」

「你點知架？！」

「你寄出去既求職信唔夠郵費彈返轉頭呀！唉！」

「對唔住呀⋯⋯ 人工可能會少好多。」

「少未少囉。最多我同你食少D。家用少D。」

「真係？！」

「唉！快D返黎啦！」

卡嚓——！

我深吸一口氣，依希，我的嘴角帶著笑。我喝光啤酒後，便起身將要回家去。

「喂！後生仔！」七叔見我要走，便揮手叫道﹕「你老婆係咪好靚架？幾時帶黎比我識呀？」

「你食屎啦！」我揮著手

「哈哈⋯⋯有咩幸福得過有屋企呀！係咁先啦！」

「下次見啦！BYE！」

（完）