「當一切停下來，當一切停頓，我卻會留在那方……」

咖啡店的揚聲器播放著一首陳白強的歌曲，由林一峰重新演繹一次。一邊聽著歌曲的三位Slow Music成員── Carrie、阿宜及Szeyan，一邊享受自己手中的咖啡。

Carrie眼中的那邊咖啡，泡沫上繪製數片白色的花瓣，一片接一片的圍在中心，彷彿在保護著咖啡師送給客人的願望，等客人將花瓣啜飲後，再慢慢品嚐那份禮物。

「呀……好幸福呀……」

Carrie細味那種微溫，從口腔中感受著淡淡的咖啡夾雜著清新的果香，正是咖啡師精心選購的特色咖啡豆。而坐在身邊的阿宜卻無法欣賞當中的細節，她認為味道應該再突出一點，如自己創作出來的「特色茶走」。而坐在阿宜另一邊的Szeyan卻深深感受到Carrie口中所說的幸福，還跟Carrie露出一模一樣的表情。

「算點呀！妳兩個，點解可以飲得咁幸福架？」

「阿宜……呢種自然嘅味道唔係人造加工可以隨便製到出嚟架。」

「叫咗妳唔好成日咩垃圾都放入口架喇，搞到味覺都差晒。」

Szeyan與Carrie一左一右說，令阿宜更添不滿：

「食得飽咪得囉！係咪我呢種低層次嘅人就飲唔到呢種幸福嘅感覺先？」

Carrie笑過不停，早就習慣這個老朋友的自卑抱怨，但Szeyan卻急著解釋：

「唔係咁架，我哋你好開心可以飲到唔同層次嘅味道，即係好似飲茶咁，雖然茶係分成紅茶白茶綠茶黑茶等等，但當中嘅味道都有好唔同嘅分別，就好似岩茶咁，如果可以分別到唔同地方嘅岩茶，我都會覺得好興奮架！」

雖然Szeyan努力說明，但見阿宜一面茫然的樣子便知道她一點也不明白。Carrie只好說：

「即係好似樂器咁，就算管樂器都有唔同類別，有各自獨得嘅音色，假如妳可以係一個奏演會到聽得出單簧管同雙簧管嘅分別，妳都會好幸福？因為妳發現到呢個世界真係好多好有意思嘅嘢。」

阿宜：「啊！咁我就明喇！」

Carrie馬上展示勝利的手勢，令Szeyan感到佩服。

「Carrie，咁如果要妳同KaKa解釋呢個情況，妳會用咩做比喻？」

Carrie想了一想：

「紅酒！紅酒都係嚟自世界各地，有唔同品種、產區同年份，最重要係我覺得KaKa係會好鍾意呢種貴氣嘅感覺，所以佢應該唔多唔少都識紅酒！」

Szeyan也點頭認同，可是阿宜說：

「貴氣唔係應該用貨幣嚟表示咩？」

Carrie急著反駁：

「嗰個係妳先真！」

阿宜皺一皺眉。Szeyan見二人也沒有再說什麼，便想打圓場：

「咁Zero呢？妳會點解釋俾佢知？」

Carrie盯著窗上一行行的百葉簾，令照射進來的陽光在桌上劃下一段段的影子。想著的同時，阿宜搶先回應Szeyan：

「嗰個人除咗有弦線嘅樂器之外就好似對咩都無興趣咁，有啲難度。」

Szeyan詭異地笑起來：

「咁咪同妳一樣？淨係得音樂有興趣，好襯喎！」

阿宜反應甚大，不斷用手撥走尷尬的空氣：

「唔會唔會……」

重覆的否認，丫沒有清潔說否定的理由。Carrie見狀馬上承接Szeyan的攻勢：

「咁曼頭呢？佢成日係咁蝦妳，引妳注意佢喎！」

「痴線嘅咩！同佢夾歌已經好似個公仔咁俾佢舞嚟舞去，咩都要管住晒，大男人到死！明明係個大大份嘅男人，應該好穩重、好可靠先係，點知成個大細路咁，咩都玩咩都笑一餐，一啲都唔認真。嫁俾佢，一定俾佢激死，頭都想擰甩佢！」

一如Carrie所想，阿宜的反應甚誇張，但意想不到的是阿宜竟然曾經考慮嫁給他！Szeyan說：

「我諗Carrie係想問，可以用咩比喻去解釋比曼頭聽，呢一杯有層次嘅咖啡。」

阿宜呆了一下：

「係咩？又好似係喎。」

Carrie掩著嘴，卻從眼神中透露出笑意，等阿宜繼續說下去：

「如果係曼頭，咪用online嘅card game，用唔同能力值去做比喻話俾佢知，佢一定明嘅。」

阿宜隨心說後，呷了一口咖啡，露出莫名其妙的滿足。不久，她在發現Carrie及Szeyan正盯著她。阿宜馬上向Carrie反擊：

「咁Frank呢？妳又點比喻俾佢知？」

Carrie瞪一瞪眼：

「我……我點知呀？」

Szeyan帶疑惑地追問：

「個個都知，但佢唔知？」

「豈！我同佢都唔係特別熟即……」

「佢係團長，妳同佢住埋同一條村，夜晚又會去妳老豆間冰室食飯，又點會唔熟呀？」

「咁阿宜夠係佢嘅隊友，阿宜夠成日沖嘢俾佢飲，分分鐘佢仲清楚Frank啲口味添呀！」

阿宜急著反駁：

「喂！等等呀，落單嗰個係妳，點計都係妳最了解佢先啦！」

「咁係妳沖架嘛。」

「張單寫住佢個名咩？我點知邊杯係佢呀？」

Szeyan見二人又再鬥嘴，她又忍不住當和事的角色：

「喂喂喂……不如等我估下……佢咁鍾意打鼓，用定音鼓同爵士鼓做比喻妳哋覺得可唔可以？」

阿宜一口將剩下的咖啡一口喝：

「我覺得用港式奶茶同茶走嚟做比喻就最好！」

Szeyan聽著，跟阿宜開始細說起來，但在Carrie的心中還是感到不太對勁：

「我諗佢呢，點講都係會唔明。佢對自己身邊嘅事一啲都唔夠細心，就好似架火車頭係咁衝，唔會特別鍾意感受生活既人，音樂就淨係鍾意重拍子，打籃球又淨係鍾意走籃，飲嘢就係咪都要少甜，我諗就算係打鼓，佢都唔會介意係木箱定係爵士鼓……」

說著，Carrie慢慢感受到二人的眼光，也開始住口，喝一口咖啡。Szeyan靠前從後依著阿宜，將頭放在她的肩上，一起帶笑地看著Carrie。

「係呀……我係鍾意佢呀……」

阿宜點點頭：

「我知喇。」

「我唔知呀！幾時嘅事？」

Carrie尷尬的表情，不敢正面回答Szeyan的提問：

「咪……面試個日……開始啩……唔記得喇……」

「早起咁呀？」

「呢樣我唔知喎！」

Carrie吐口悶氣，再說：

「記唔記得我整親隻手指？妳入咗去interview之後，我就好似等死咁。傷咗手指都唔知點用啲指法去彈結他。係Frank安慰我，教我要放鬆身體，享受音樂，唔好咁執著技巧。於是我放鬆手腳，用可行嘅方法去將首歌演奏出嚟。好似平時係房玩結他咁。結果就Pass咗喇！」

Carrie再深深吸一口氣，抬頭看著天花的射燈：

「我好似因為佢，先可以嚟到呢個地方，同大家一齊開開心心咁玩音樂。」

Carrie漸露笑意，令阿宜有點妒忌，但Szeyan卻羨慕得很。阿宜則頭問：

「咁Szeyan呢？好似好想有男朋友咁喎！」

Szeyan將頭粘著阿宜的頸，無奈說：

「唔知呢……男朋友真係好難搵到個啱心水。就算係到夾Band一齊有共同嗜好都好，反而更加令我唔敢去鍾意佢哋……萬一冷戰起嚟……好煩架！或者就算大家真係好夾，完全了解對方都好喇……重大鑊！好似Begin Again咁，一聽首歌就知道佢變咗心喎！咁大壓力……」

Carrie苦笑起來：

「即係，同一隊Band，最好都唔好拍拖啦？」

Szeyan見狀急於辯解，卻有點詞窮：

「咁又唔一定嘅……」

阿宜卻沒有在意Carrie的面色說：

「我都覺得唔好搵隊員做男朋友，分手就連成個組合都會有影響，累己累人。」

Szeyan用力將下顎壓下，令阿宜感受到刺痛。

「咩呀？唔係咁嘅咩？」

Carrie：

「係啩……」

完

後記：修訂原文暫發佈於「創造館」：https://www.creationcabin.com/小說/slow-music