第一個鐘
「啊！隻腳好痺。」從睡夢中紮醒的我，坐起身揉著發麻的右腳，雖然四周環境黑漆漆，但我並沒有很驚訝，因為我的睡房也是這樣的，又可能是剛醒，沒有留意到四周的異樣，沒有留意到我是躺在地上而不是床上，沒有留意到房間比睡房空曠和大，只專注於解決右腳發麻的情況。
「而家幾點呢？」我下意識望向左面鬧鐘的位置，但遍尋不獲，這才驚覺我身處的地方並不是睡房，而是一個密閉的幽暗空間，唯一陪伴我的只有一枝喝了一口的750毫升礦泉水。
我爬起身，在房間四周查看，發覺只有一扇被木板封實的窗和一道鎖上的趟門，除了這些外，整個房間便空無一物。
「What the……玩乜？發生乜事？」當然我這提問是沒有答覆的。
「呼……而家最緊要冷靜，諗吓究竟發生咗咩事先，琴晚揾完個friend返屋企，行平時條小路，然後……」我摸了一模頸動脈，發覺有點痛，「然後我畀人從後偷襲吉咗一針，身都轉唔切就暈咗，醒返就係呢度。我係咪得罪咗啲咩人？定係畀人綁架？我屋企都無錢，綁我都拎唔到幾多贖金，唔通佢哋得罪咗人？」思路越來越混亂，根本冷靜不到，連手腕也開始感到有點刺痛，才發現手腕上多了一個手環。
「沙沙……」突然有聲音響起，「係開咪廣播？」
「你好呀陳煒，我係今次遊戲主持人CW，我第一次主持，做得唔好請多多包涵。」聲音從我頭頂傳來，此時我才發現原來天花板有個擴音器隱藏著，只露出了喇叭。
「首先多謝你參加今次嘅捉伊因，我相信你唔會唔識玩，為咗令你更活躍，今次遊戲嘅勝出者係會有一百萬美金作為獎勵，畀啲歡呼聲同掌聲我聽吓先，」我根本就不是自願參加，但聽到了獎金後卻有點動搖。
「但有獎就一定有罰，為咗懲罰啲唔認真玩嘅人，失敗者係會死㗎，係咪好公平呢，哈哈哈！」聽到這裡，我不禁心寒，除了是因為他猙獰的笑聲外，還有這不合理的規則。
「玩遊戲都會無命？咩電視台嘅真人show吹到咁大呀？無命揾鬼玩咩，我要退出！」我心意已決，對著喇叭大叫，畢竟他只對我說，所以應該會有攝錄鏡頭和收音器。
「咩話？你想退出？我會好失望㗎。」果然不出我所料，真的有鏡頭和收音器。
「不過我勸你唔好咁諗，因為只有死先可以退出呢場遊戲，哈哈哈！」猙獰的笑聲又再響起。
「如果你真係想退出或者逃走，我都會成全你嘅，到時你左手戴住嘅手環就會吉你一針，咁你就可以係天上繼續俯瞰呢場遊戲喇，我係咪好仁慈呢？哈哈哈！」
「順帶一提，我哋唔係電視台，但你嘅一言一行都會係網上直播，所以請你好好表現，唔好令觀眾失望啊！」
「呢度係荒廢工廠，唔會有人阻礙呢場遊戲，所以你可以盡情咁玩，唔駛擔心任何嘢，係呢度做嘅所有嘢都唔會畀人追究，放手去玩啦，最緊要開心，係咪呀？哈哈哈！」
「哎呀！第一次太興奮差啲唔記得講規則，捉伊因嘅規則就係做鬼嘅要捉人，係捉哂所有人，捉到嘅就要死；而做人嘅就要唔好畀人捉，同時都要解開收埋係工廠入面十個嘅其中六個任務，令到大閘嘅電斷開，咁你哋就可以走喇，手環係逃出大閘嘅一刻就會鬆開。不過可以生存嘅只得一個，如果成功逃生嘅人多過一個，咁就要交畀觀眾決定喇，自相殘殺係禁止嘅，會被吉針啊，哈哈哈！所以你係過程中活唔活躍係好影響你可唔可以存活，記住要盡力而為呀！」
「只得一個生存？真係痴線，痴撚線！」我怒吼，但這次CW並沒有回應我。
「今次有一個人做鬼，六個人做人，每人都有唔同道具幫你逃生，點用就睇你自己喇。但有個温馨提示要留意，人入面有一個係叛徒，係幫鬼嘅，不過只有佢自己知，其他人甚至係鬼都唔知，叛徒要生存嘅唯一方法就係令其他五個人死亡，但佢都無例外唔可以自己落手殺人，一定要交畀鬼落手。」
「仲要有埋叛徒？真係屋漏偏逢連夜雨，要防隻鬼又要防內鬼。」
「仲有仲有，任務成功解完會有公告，但失敗咗要等十五秒先可以再答，而同時呢個任務地點會有十五秒嘅警報響起，你要好好記住喇！遊戲限時十二個鐘，時間夠除咗鬼之外全部都要吉針，唔理你解哂任務未。好喇，講咗咁耐都口乾，我知你同觀眾都好心急㗎喇，而家game start，開始計時！」
「㗳！」門鎖解開了，同時手環也開始倒數，說真的，我還不知道這遊戲是真還是假，但我寧願偏向相信是真的，畢竟我還不想死。
我拿著水趟開了門，雖然還是很黑，但勉強看到門前有一條運輸帶，還有很多不同的機器，而左前方大約一百米處出現了一個人影，但他好像還未看到我。
「究竟係人定係鬼？匿埋觀察下再算，好彩都有啲距離，要走都走得切。」
人影向著我的方向走來，不時四處張望，狀甚驚慌，由這舉止看來，我可以斷定他，不，應該是她是人，但她會是叛徒嗎？是要會合她還是避開她？腦內又再次亂作一團。
「冷靜呀陳煒，諗諗先，如果佢係正常人，咁我哋一齊行動就事半功倍，如果佢係叛徒，但佢又唔可以落手殺我，其實諗落又好似無咩損失，好啦，一於會合佢。」語畢我立即起身向她揮手，然後走近她，幸好她沒有很大的反應，只是像找到失散父母般興奮。
「終於遇到人，你係我第一個遇到嘅人，呢度恐怖到一個點，得我自己一個簡直想死。」說話的是酒店炒散陳煒，當然這時我還不知她也叫陳煒。
「你係咪……」我突然意識到此話不應問，畢竟沒必要打草驚蛇，只要留意她表現便會知她是不是叛徒，所以硬生生把話吞回肚內，牽強的扯道：「你係咪都係畀人捉嚟？」很沒智商的問題，相信沒有人會自願參加死亡遊戲吧？
「我係自願參加嘅，」答案出乎意料，「因為我屋企窮，父母好早死咗，得返我一個畀人當人球咁係親戚間拋嚟拋去，直到我十八歲先可以自己搬出嚟唔駛再做人球，但咁畀人拋法要成日轉校，書都讀得唔好，亦都無心機讀，所以只可以做啲炒散工，揾得好少，後嚟知道有呢個比賽，就自願報名參加喇。」她把自己的一生經歷也告訴我，還說到眼泛淚光。
「Sorry，我唔知你咁慘，對唔住……」我被她感動到了，鼻子也酸酸的。
「白痴！你咁都信？睇大台啲師奶劇睇上腦？邊有人會咁弱智參加呢啲遊戲？嫌命長咩，有錢都無命享啦！」她這峰迴路轉的說法，令我狠狠被打臉，覺得自己太天真、太傻，恨不得鑽進洞內。
「喂！你手上有枝水嘅？係你嘅道具？拎嚟畀我飲兩啖，好口渴。」我還沒答應，她便逕自從我手上搶走了水倒進口裡，還給我時只餘下半枝。
「咁你又有咩道具？」我只好看看能否派上用場。
「得個尿袋。」她回答。
是長方形黑色能作電筒的那種，而且只餘下兩格電。
看來是派不上用場，我便轉話題說快點找到其他人和解任務。
「啱啱我係嗰面見到部著咗嘅notebook，唔知係咪解任務用。」她指著來的方向，然後我們一同前往。
「係呢部喇，check吓係咪任務先。」我邊說邊伸手移動滑鼠，把notebook由休眠狀態喚醒。
「五號機任務：在單車公路比賽中，如果你追過了第二名，你會是第幾名？」螢幕顯示這些字。
「咩話？任務係呢啲題目？會唔會太易？追過第二當然係第一啦！」她手快快的輸入答案，而我卻覺得這答案有點怪，當我想要她更改答案時，警報響了，原來她已快一步按了enter。
「痴線，呢個咩任務？答啱都響，同主持人講嘅都唔同，擺明係唔畀人生存。」她向天花板大叫大嚷，我立即命她安靜，並對她說出答案，顯然她還未明白。
而她這答案亦令我對她生疑：「佢係真係唔識，定係扮唔識特登答錯引鬼嚟捉我殺我？」
十五秒在這空間彷似十五小時，終於警報停了，我立刻輸入答案「第二」按enter，電腦螢幕顯示答案正確，電閘其中一個電源被切斷，悠和輕快的音樂同時在工廠內響起，這音樂有點熟，大約過了十秒，音樂終於停下，主持人CW再次發聲：「恭喜咁多位，你哋成功解咗第一個任務喇，而且仲未有人命傷亡，加油呀，哈哈哈！」
「頂，好討厭嘅笑聲。」心裡說話不吐不快。
突然遠處傳來物件被打翻撞跌的聲音，我的第六感告訴我：「隻鬼嚟咗，係畀啱啱嘅警報吸引過嚟！」
我轉身捉住她的手拼命逃跑，顧不得她是不是叛徒，現階段還是逃命要緊。
跑出工房轉角看到有樓梯，我果斷選擇向上走，上了兩層後躲進一間房，沒有聽到後面有其他腳步聲，應該是擺脫了，而時間亦過了一小時。
