〈關於自我設限這回事〉
自我設限係件卑劣嘅事。
追求成長、追求完美係人之常情啦。雖然唔係話真係要做到完美，但只係想將自己應有嘅實力發揮出嚟，都係一件令人費心嘅事。
係嘅，係時候講到啱啱開始寫作嘅心態。當初我抱住莫名其妙嘅信心去寫文，只管每日不停寫啲有謂無謂嘅文章放上網絡平台。拙劣嘅我當然得唔到讀者嘅回應同讚好，因此心入面又唔甘心，又毛躁。
我睇唔起喺網絡上文章寫得比我好嘅人。我硬係覺得他們嘅文字係花拳繡腿，毫無內涵，內容水平同小學生無異。我逐字逐句仔細比量，都認為自己嘅寫作能力喺他們之上。
我相信自己嘅能力，只係其他人唔識欣賞。只要搵到我嘅伯樂，任何事都會一帆風順。網絡寫手只係按照讀者喜好同寫作公式，量產出大量垃圾作品嘅機器，同高尚而且有內涵嘅我唔可以混為一談。
呵呵！呢啲係咩爛鬼諗法，邊到嚟嘅自信？結果我仲係喺惆悵中茫然若失，一氣之下將平台帳號入面所有文章都刪除，亦冇再寫文章。
自己落咗啖氣之後，仲係無心寫作，就只好去圖書館借啲經典嘅文學小說睇。哈哈！嗰一刻我好似俾一位喺我身後嘅巨人監視住咁。我前所未有嘅覺得渺小、壓迫，就好似發脾氣嘅小朋友咁無地自容。
嗰時睇嘅係《老人與海》同《大亨小傳》。兩本都係出色嘅小說。當我仔細睇呢兩本書嗰時，都會不時起雞皮，心諗：「原來書入面有咁嘅世界！我實喺係太卑微啦！」
𠴱時我開始認真寫作，但問題亦同時出現。我嘗試通宵寫咗約四千字嘅短篇小說，然後第二日睇咗一次就毫不猶豫噉刪除。我亦曾經坐喺電腦前四、五個鐘頭，都係敲唔出一隻字。
我感覺到自己嘅卑微。我認為自己嘅實力連幫海明威遞筆都唔得。我覺得自己冇半點墨水。我一直停滯不前，冇半點進步。我想像好似我咁拙劣嘅人，根本唔適合寫作。我根本一無是處，咩都冇可能達成。
但我又唔甘心……我唔甘心。我帶住自卑同不甘，成天匿喺圖書館睇書。不論係寫作教學、靈感創作教學、名家散文、閱讀文化，總之似乎有關寫作嘅書，我都囫圇吞棗噉閱讀。
係嘅。成天都喺到睇書，但都係冇信心寫落一隻字。對自己愈沒有信心，就睇愈多書；愈睇更多出色嘅作品，就愈冇信心。
直到一次我糊裡糊塗噉睇書，睇到一句奇怪嘅說話。「突破寫作瓶頸嘅方法，就係繼續寫作」，大概係咁樣嘅句子。
我當堂笑咗出嚟！如果我寫到嘢，仲算得上瓶頸咩？但係當晚瞓覺嗰時，我又想起呢句說話。呢句說話雖然滑稽，但又點出咗問題重點。
係啦！我對自己冇信心。我怕表現拙劣。我怕失敗。我因為心中嘅窘迫所以寸步不行。閱讀成為咗逃避寫作嘅藉口；準確而言，係逃避展示同面對自己嘅拙劣嘅藉口。
唉！一旦深陷就只能夠喺痛苦中徘徊。日日好似好忙，但其實冇任何進展。自我設限果然係件可悲嘅事。
＝＝＝＝＝＝＝＝＝＝
想睇返之前嘅文，可以睇：https://www.shikoto.com/i/M4Z
fb：https://www.facebook.com/168781870423363/
