〈關於學習這回事〉
學習。
唉！提到學習呢兩隻字，就不其然諗起學校；諗到學校，就會諗到競爭；諗到競爭，就會諗到壓力。係咪？學習由幾時開始同壓力劃上等號呢？
我自細嘅學習生活都充滿咗競爭。學生唔係鬥名次，就係爭獎項，或者係考證書。對於我呢個成績不佳嘅學生嚟講，每日嘅學習生活都充斥住責罰同壓力。
喺我嘅生活入面，學習彷彿就係責罰。我嘅生活就係被責罰。喺呢個世界上，冇嘢比考到好成績更為光榮嘅事；當然，亦都冇比成績差更為卑劣嘅事。我怕被責罰，怕表現卑劣，所以只好憨實地讀書。
年少嘅我根本對自我、人生同將來毫無頭緒，更冇成熟嘅認知能力去理解人生呢回事，所以我對未來嘅所有認知都係建立於其他人嘅期望下。長輩認為細路仔應該讀書，我就讀書；父母都希望我能夠考上大學，我就考上大學。
我好似浮萍咁隨水飄洋，毫不清楚自己嘅方向。我嘗試探問學習嘅意義，但只換嚟官腔式嘅回應。考好成績係為咗讀大學，讀大學係為咗搵份好工，搵好工係為咗生活。
我明啦！讀書並唔係為咗學習，而係為咗生活。難怪而家學生嘅學習時間好似成年人做嘢一樣長啦！因為大家都係為咗生活而努力。當時我係毫無疑問噉相信其他人嘅諗法；準確而言，係被迫相信嘅。
嘿，幾咁可笑！對於年少嘅我嚟講，學習只係一種責任，甚至係對未來生活嘅威脅。好似考唔到好成績，未來嘅人生就玩完。因此成績唔好嘅我只能夠咬緊牙關，喺窘困底下學習。
讀書誠然係辛苦嘅，但更辛苦嘅係搵唔到辛苦讀書嘅理由。諗到呢一點，我仲係感到心寒。學生為讀書而讀書，為學習而學習，講出嚟都覺得可悲。
我覺得有值得活落去嘅意義係先於求學嘅。如果學生搵唔到值得活落去嘅意義，叫我們點樣說服自己辛勤噉讀書呢？係為咗痛苦噉讀書、工作，去延長痛苦嘅生活咩？
但嗰時我冇諗太多。縱使我喺讀書方面十分拙劣，但旁人總係以成績作為衡量努力同能力嘅準則。因此無論我喺學習上遭受幾多壓力，都好難同父母傾訴。亦都因為咁，我十分抗拒學習。
我唔知點解社會總係鍾意比較。成績最好嘅永遠只得一個，唔通其他人嘅努力同付出，就唔值得受重視同欣賞咩？可悲嘅係，成績一般嘅一群係得唔到重視同認同嘅。喺呢種風氣下，我心入面只有自卑同無力感，又點樣建立自我效能去面對學業困難呢？
我喺學校嘅時候從來冇享受過學習嘅快樂，反而喺退學之後呢兩年，就自動自覺噉拎起書。點解呢？
當我閱讀一本出色嘅小說嗰時，就能夠專注幾個鐘頭閱讀。讀到有趣嘅理論，亦都願意花心機仔細揣摩。內心得到滋潤，就渴望學習同了解更多，亦唔會感到煩瑣同抗拒。
學習係件極美嘅事呀！學習時全神貫注，進入心流狀態，使得每一分一秒都過得非常充實。睇見自己不斷進步，就更加感到鼓舞。尤其係面對困難同挑戰，或者嘗試新事物嗰陣，更加會廢寢忘餐，夙興夜寐。
人有好奇心，亦有進步嘅慾望。滿足好奇心同自我實現本嚟就係快樂而滿足嘅事，唔係咩？點解學習對學生嚟講係壓力嘅來源？
大概係動機嘅轉移啦！我鍾意學習，係純粹因為內在動機。學習係愉快嘅事，因此我會想學懂更多，掌握更多，就算遇上困難，都會花心機面對。在學嗰時我唔鍾意學習，係因為外在動機使然。學習係一種責任或者係自我表現，因此面對困難同壓力就難以堅持。
呼！飲多幾罐啤酒，就不自覺噉囉嗦幾句。唔理點都好，學習都係以快樂最重要。
＝＝＝＝＝＝＝＝＝＝
想睇返之前嘅文，可以睇：https://www.shikoto.com/i/M4Z
fb：https://www.facebook.com/168781870423363/
