〈逃避。面對。〉

攰啦!真係攰啦。估唔到發洩會令人咁疲倦。

你知唔知呀?呢一段時間我係嘔心嘔肺噉將自己解剖,將自己搞到不似人形。而家我係碎片中見到自己嘅唔完整,好似我就係由矛盾組成嘅。

如果我係一個聰明人嘅話,絕對唔會喺呢種迷惘之中掙扎。我睇見身邊好多嘅人,佢哋都好聰明。佢哋有自己嘅世界觀同信念,每天努力噉奮鬥住,唔洗花時間思考人生問題。大概只有我會蠢到咁,咩嘢事都要深思一番,但又搵唔到答案。

回歸現實,需要面對嘅困難仍未解決。我嘅文筆仲係非常粗糙,思想仍然幼稚,性質依舊卑劣。有時候我會將自己同O. Henry〈The Last Leaf〉入面嘅老畫家Behrman做類比。我就算係年輕版嘅Behrman。

鍾意飲酒,生活潦倒。雖然抱住做出偉大傑作嘅願景,但從未開始做出似樣嘅作品。所以話,而家嘅我係帶住美好願景等死嘅人。

講真,我成日感覺到自己就快會死。或者應該咁樣講,我就好似係一條離開湖泊嘅魚,乾燥嘅皮膚暗示我正身陷絕境。

係時候改變啦。我期待住自己嘅改變,幻想住自己回到湖泊,如魚得水嘅景象。我渴望寫作偉大嘅作品,渴望找到自己發揮嘅地方,渴望以後搵到好伴侶,一齊面對人生。

希望係對現實嘅逃避,定係面對?呢一點我唔能夠確定。沒希望嘅人生消極無力,有希望嘅人生跌宕多舛。無論如何,人生都係痛苦嘅,只係人甘心受咩痛苦,得到咩快樂。或者會有第三條路走嘅!只係我暫時未諗到。

Behrman甘心咁樣終老咩?如果佢冇畫嗰一塊葉,佢又會唔會為自己嘅人生畫出彩虹?我諗佢只會寂寂無名、含恨而終。不過任何人死咗都係咩都帶唔走,仲有咩好計較呢?

人生路漫漫,邊個人可以肯定自己嘅未來?都係做好呢一刻嘅自己啦。如果迷失、困惑、任性係年輕人嘅人專利,咁就等我繼續保持喺呢個狀態。
==========
想睇返之前嘅文,可以睇:https://www.shikoto.com/i/M4Z
fb:https://www.facebook.com/168781870423363/