我成日覺得廿五歲到三十歲係令人尷尬嘅年紀。

廿五歲過後，你無辦法再自恃年青
你已經成為別人眼中切切實實嘅成年人
你開始要揹上一啲責任，開始要停止幼稚同任性
開始要計劃將來，開始要建立事業，開始要長大⋯

然而，殘酷嘅現實係我哋處於唔上唔落嘅階段
真正嘅高不成低不就。

職場上無人再當你係新人，卻依然係食物鏈底層
事業未到高峰，亦都睇唔到光明前路
財政上你依然窮依然搵雞碎咁多
買唔起樓，租唔起屋，能夠養活自己已經好感恩
感情上你被期待住要踏入另一階段，卻依然無能為力
友情上你發現朋友都忙住走喺自己嘅路上，
拍拖嘅忙拍拖，搵錢嘅忙搵錢，每個人都好忙好忙

呢個時候，金錢同夢想一直角力
細個最重要嘅夢想，去到現實世界原來如此不堪一擊

後來你發現夢想幾大都無法飽肚
想去過理想嘅生活，前提就係要擁有足夠嘅金錢
於是去到一個階段，好怕自己向現實低頭
好怕自己妥協、好怕自己變成自己曾經最討厭嘅大人
好唔甘心，但係生活上嘅無力感一直拖住你嘅尾巴

終於去到你細個最嚮往嘅年齡
細個見到廿幾歲嘅哥哥姐姐都好羨慕
可以擁有金錢擁有自由，曾經你都如此渴望長大
但當你到達到曾經想要嘅長大，卻發現成長嘅代價好大
可惜你已經走過了可以撒嬌嘅年齡
一直被身邊嘅人同事督促你要長大要發奮要為未來努力

我嘅二十六歲就係過得如此無力。

之前我會諗點樣先可以盡快去過到想要嘅生活
要搵幾多錢要做幾多年嘢先可以過到生活
但最近我開始明白，一直憧憬住未來嘅美好

細個想長大，長大後又想中年事業有成
一直靠住呢種幻想去生活，
只會令自己現在同將來都一樣不堪
只會一直錯過現在，然後又一直不滿現狀

所以我想好了，
我嘅二十七歲唔再為銀行嘅數字而拼命
亦都唔再為所謂嘅將來而浪費青春
我想把眼睛放回我嘅二十七歲
唔為三十歲嘅自己，只為二十七歲嘅自己而努力
去做一啲「現在不做這一輩子都不會做了」嘅事。

「從前只想裝懂 裝做什麼都懂
懂得生存的規則之後 卻只想要 都不懂

如果人類的臉 長得全都相同
那麼你和人們的不同 就看你怎麼活」

願我們都能成為更好的人.
/
港女友Facebook：https://www.facebook.com/hkgirlfriend/