〈同理心。同情心。〉
呢段時間寫咗幾篇文，好似將怨氣都吐晒出嚟。我唔清楚你哋係點睇我呢個卑賤嘅人，亦冇興趣知道。大概唔係抱住同情心為我痛哭流涕，就係充滿同理心，與我同行。
能夠從其他人嘅臉色得知喜怒哀樂係人與生俱嚟嘅超能力。呢種超能力嘅程度因人而異，有啲人比較敏感，亦有啲極為遲鈍。
我係屬於後者啦！情感遲鈍，對情感嘅反應微弱。有人睇愛情電影會喊，但我只會起晒雞皮；有人讀情詩會哽咽，但我只感到噁心；有人睇見其他人喊，自己就唔自覺噉喊埋一分，但我只感到莫名其妙。
我並唔係冇情感，只係唔太受情緒影響。如果有人要求我扮嬲、憂鬱、困惑、苦惱，我實在做唔到。我做唔出情緒化嘅表情，臉部肌肉幾乎都冇活動能力，所以皺眉頭就代表晒一切不悅嘅情緒。正因為情感嘅遲鈍，我習慣不停揣摩自己和別人嘅情感。
能夠準確噉感知其他人嘅情緒，甚至同喜同悲，應該係極美嘅事啦！社會嘅凝聚力同和諧，咪就係同理心嘅產物。
但請唔好混淆同情心同同理心。同情心係好愚蠢嘅事，純粹係自私嘅行為！
退學後我遇到一班咁樣嘅人，佢哋貌似明白我，但實際上只係可憐我。佢哋睇到我痛苦，同病相憐，就情不自禁噉安慰我，為我講好說話，為我辯護，但從不過問因由。
醒下啦！你哋安慰嘅唔係我，係你哋自己！佢哋只係將自己嘅情感投射喺我身上，藉住對我嘅安慰去滿足內心渴望被安慰嘅需求。
當然，喺卑劣嘅我身上偷走丁點優越感嘅人亦唔少，但總冇上述呢種人噁心。佢哋總係將自己渴望嘅加諸喺我身上。喺我睇嚟，佢哋比我更需要安慰，內心更加脆弱。
真正具備同理心嘅人，大概就係嗰啲對情感唔敏感嘅人。正因為唔敏感，先至唔會盲目噉同情，唔會將自己嘅情感投射喺其他人身上，唔會感到優越感，真正企喺對方立場思考。
情感唔敏感並唔係沒有情緒，只係情緒起伏小，能夠有效噉管理情緒。佢哋嘅自覺能力極強，所以能夠及時調整言行，免受自己嘅情緒同價值觀影響。
講真，呢種人我好少遇見，有呢種素質嘅人世間少有。同佢哋傾偈，好似將潛意識入面嘅一切都浮出水面，可以深入噉認識自我。
無可否認，得到其他人無條件同盲目嘅同情就好似止痛藥咁有效，但呢種情感虛構嘅假像係唔健康嘅，都係少碰為妙。
