〈他人的話。自己的話。〉

呢段日子，說教嘅話聽咗唔少，當中不乏批評嘅聲音，亦有真心直諫嘅說話。我無意評論佢哋說話嘅正確性，但我硬係覺得佢哋講嘅嘢都係講畀自己聽嘅，而唔係講畀我聽嘅。

點解咁講？佢哋就好似小朋友咁喺幼稚園學咗唱一首歌，放校後就急不及待噉唱比父母聽。喺佢哋心目中，根本冇考慮過其他人想唔想聽，亦冇判斷過自己唱得好唔好聽。佢哋就係咁自然而然噉做咗。

尤其喺我打算退學嗰時更加係咁。身邊總有一堆莫名其妙嘅人同我討論，好似有一種無形嘅責任喺佢哋背上，驅使佢哋要改變我嘅諗法。佢哋都提出自己嘅見解，想將我呢隻羔羊拖返入圍欄。

皇帝唔急太監急，佢哋比我對事情更加熱忱，我就更加感到窘迫。幾時我嘅決定會成為議案，被放到議會上辯論決議？係為咗喺同我討論嘅過程中得到優越感？

最後我諗通咗，佢哋嘅說話係講畀自己聽嘅。佢哋表面上係為我分析形勢，但實際上係想表達出佢哋嘅世界觀，自說自話。

佢哋認為唔可能嘅事，就會話我做唔到；佢哋認為有利嘅事，就會話係為我好；佢哋期望嘅事，就會話我應該咁做。佢哋認為年輕人應該讀書，就認為我應該讀書；佢哋認為讀書好，就認為讀書一定對我好。

邊個話開心一定係好事？邊個話幸福一定係好事？你哋享受快樂同幸福就好啦，點解係都要將自己嘅諗法去判斷我呢？話唔定我鍾意過又頹廢又糜爛又窮嘅生活呢？

我好好奇，人真係能夠了解其他人嘅利益咩？佢哋只不過係將自己嘅價值觀視為普世價值，不停套諸喺其他人身上。佢哋各自站喺自己嘅框架中窺看世界，根據自己嘅目光判斷所有事物。

我好嬲，真係嬲。你哋要相信自己所相信嘅嘢，冇所謂，但利用我嘅事當做強化自我信念嘅憑藉，實在係無恥！

喺情感上，其他人愈係反對嘅，我就愈有實行嘅衝動；喺理智上，其他人嘅思想愈係單一，喺決策上就更難宏觀審視。兩者都為未來鋪上薄紗。

另外仲有一種人更為單純。佢哋幾乎冇思考能力，一切都以情感直覺判斷。佢哋認為退學好可惜，就一味叫我唔好退學，但又講唔出原因，又唔會同我討論。無論你講咩都好，都唔可能等佢哋明白，因為佢哋只會不停呢喃：「雖然係咁，但你唔覺得好可惜咩？我覺得咁樣好可惜呀。」

我抵受唔到呢啲說話，並唔係因為佢哋嘅自私，我亦冇批評之意，甚至仲好多謝佢哋嘅真誠添！只不過有時我只係想佢哋可以靜靜哋聽我講嘢，而唔係一味表達自己嘅意見。我只係想有人企喺我身邊同我一齊睇呢個世界，而唔係高高在上噉話我應該點，唔應該點。

講真一句，傾聽其他人嘅心聲真係咁難？站喺對方立場思考真係無可能？有！但真正能夠聽我嘅憂慮，又能夠企喺我嘅角度分析嘅人，真係寥寥可數。

睇嚟大家嘅同理心都唔足夠呀！個個只會用自己嘅觀點出發。好心唔好自以為是噉安慰其他人，隨時傷咗人都唔知。