〈認同。沒自信。〉
認同感係件恐怖嘅事。
想得到其他人嘅認同係件平常事啦！大概每個人都喺唔知唔覺間追求住呢樣嘢。尤其係喺青少年時期，得到其他人嘅接納和欣賞就係每日生活嘅目標。
人喺唔同嘅團體活動中追求進步，不論音樂、運動、學業、甚至電玩遊戲同扭計骰等等，都想有自己獨特嘅風格，搵到自己喺群體中嘅位置，然後從別人嘅反饋中認識自己。
當群體間組成密不可分嘅連結，好似蜘蛛網咁黏住各人嘅情感，就能夠喺生活和成長嘅迷惘中搵到依靠。
但係認同感有時會令人更加迷失。
我打算退學嗰陣，曾經問過幾個朋友嘅意見。嗰時呢團火燒得熾熱。我每日埋首寫作，無聊嘅嘢都會寫上幾千字。我只有一腔熱血，根本咩嘢都聽唔入耳。
我同朋友講：「與其漫無目的噉上學，不如早啲退學，為理想一戰，最少嘗試過都唔會後悔。」冇咁親密嘅朋友會講：「咁就得啦！你搵到自己嘅理想，又有熱誠去做，咁就去做啦！」知己好友話：「無論點都好，我都會撐你！」
有咁樣嘅朋友幾咁好！無論我做咩都好，佢哋都會喺自己身邊支持自己、鼓勵自己。但係問題就出現喺呢到。喺呢種氣氛下，我更加強化咗呢個任性同衝動嘅諗法。
得到旁人嘅支持令我信心倍增，同時亦衝昏頭腦。我喺情感上得到極大動力，就更難以冷靜落嚟看待事情。我沉醉喺認同、支持同鼓勵中，彷彿已經達成目標咁樣，但事實上咩都冇做過。
我高估咗自己達成目標嘅能力。由當初熱忱洋溢，胸有成竹，到認知到現實狀況嘅困難，信心就被動搖。隨住日子過去，內心更愴惶窘迫、意志力下降，甚至開始縱容自己嘅懶惰。直到三個月前，我已經鬥志全失，只能羞恥噉匿喺房入面渡日。
認同感係幾咁恐怖呀……我冇責備誰嘅憑據，因為一切都源於自我內心嘅缺失，想怪都怪唔到人。但係回想過嚟，自己好似着咗魔咁，連自己都感到莫名其妙。
親密朋友嘅說話真係可信咩？大概唔可能。大家都彼此依靠住，若果講出半點令人唔舒服嘅說話，就會打破關係嘅和諧。喺關係中嘅各人都盡量避免呢點，所以就逐漸形成咗單一而且表面嘅團體思考。可悲嘅係，呢種唔健康嘅關係係穩固而令人嚮往嘅。
我好怕再同呢啲朋友接觸，亦漸漸將自己從各群體隔絕。一方面係源於自卑，一方面係對人際關係感到困惑。
我好攰。喺未對自我有清晰認知之前，大概人際關係會係最易令人感到惘然。
