樹洞報復!鬼叫你唔開心先諗起我!(1)

我係班朋友嘅樹洞,但冇人係我嘅樹洞,打開Whatsapp,唔開心都唔知同邊個講。

好在喺討論區嘅心事台,我搵到啲同我一樣嘅陌生人取暖。

我叫「冇誰共鳴」,背景唔講喇,上得網,係男係女係豬係狗都唔重要啦。

一開心事台,就見到「萬世當兵」嘅留言:「今日我又陪兄弟去劈酒,佢又分手,但佢都叫做咀埋先走,有冇諗過我咁多年冇人睺,係咩感受?」

其實我唔明佢成日呻嘢都要押韻係咩玩法……

但「傷心大JJ」似乎受佢影響,覆:「On99。」

「谷底人生」同「失敗王」都跟隊:「On99。」

我忍住跟隊嘅本能反應,心諗:咩料呀……呢度明明係心事台,我哋對住放負嘅巴絲要包容同鼓勵,先政治正確㗎嘛。

我安慰「萬世當兵」,點知「傷心大JJ」就覆我:「我哋練習緊呀。」

我仲諗緊點解,佢就覆咗:「你尋日冇On唔知。我哋呢班樹洞決定,要將班Hihi由天堂拉返落嚟人間!既然佢哋唔開心先諗起我哋,我哋一於搞到佢哋唔開心!」

「班Hihi係……」

「嗰啲有佢講,冇人講,一味以為自己係全宇宙最慘,要全世界安慰佢嘅On9仔。」

「傷心大JJ」仲分享咗好多報復方法,其他人都附和佢。

吓?即係要我害我班朋友?

我嚇到即刻撳上一頁。

唉,世界變,樹洞都變樹妖。嗚嗚……我唯有搵過第二度落腳,點知「傷心大JJ」好得閒,已經先我一步,洗曬我所知嘅討論區嘅「樹洞」腦!

我想掟低件心事啫,點知班巴絲就當正訴苦嘅我,係佢哋嘅殺父仇人,係咁留言鬧我。

我唔知好嬲定好笑,今鋪真係冇誰共鳴喇。

算喇,反正我都慣咗「把所有問題都自己扛」。

個心屈住屈住,我乜都唔想諗,聽日做奴隸又唔想咁早瞓,唯有繼續碌Facebook同IG。

電話突然響起,係我中學老死阿蚊。

咁橋嘅?唔通係心靈感應,佢知道我唔開心,專登打嚟關心我?

「家家,瞓未呀?」但一聽到呢句,我就醒曬,佢肯定係有嘢呻。

「未呀。」

果然,佢叫我落樓下陪佢解悶喎。我得啖笑,鬼叫我同佢最Friend又住得近咩?

嚟到公園,阿蚊已經坐咗喺張長凳度,望住班夜青打波。

佢見到我,就笑住咁話:「咁慢㗎!」

唉!死喇今鋪。如果佢一嚟就喊曬口,咁頂籠陪佢喊一粒鐘,我就可以返上去瞓覺。但佢而家咁嘅樣,肯定捉住我傾到凌晨兩點先肯走。

我試探佢,「你隻死嘢,今鋪失戀定失業呀?」

佢耍太極勁過啲官,「邊有啫,係咪叫你落嚟吹下水都唔得先?」

講完明星八卦、做埋體育判官、再感嘆下啲慘情新聞,阿蚊似乎真係為傾計。既然係咁,輪到我好想訴苦。

但無聊話題轉咗幾個,我都仲係搵唔到機會開口,或者始終覺得將自己嘅傷口揦高俾人睇,好瘀啩。又或者「有人問我,我就會講,但是無人來」……

點知一咁諗,阿蚊就問:「你呢排點呀?下個月就讀返書追夢,辭咗份工未先?」

佢望實我,雙眼流露出關心。

我呆曬,估唔到聽多過講嘅樹洞,都有被人重視嘅一日。

我覺得好溫暖,又有啲扭擰,望嚟望去,我決定用呢句開場白:「冇乜點呀──」

「唉,我有呀。」阿蚊打斷咗我。

──前排我老豆工傷入咗院,好彩執返條命,但屋企突然冇咗一半收入,佢間縮骨公司又唔肯賠錢。阿媽成日喊,我猶豫緊Quit唔Quit咗副學士,繼續返而家份牛工。反正讀完出咗都可能升唔返大學,冇錢學咩人講夢想啫?

我將成段嘢吞返落肚。好似用十年時間準備咗個表演,上到台,唔夠一秒就俾人「叮」走咗。

慣咗啦,次次都係咁㗎啦。

「我覺得阿邦好似有第二個……」然後阿蚊就一輪咀咁同我呻,由一個月前,阿邦忽然轉咗Facebook密碼開始講起。

又嚟?哦,原來關阿邦事,唔怪得搞咗半晚先肯講出口啦。阿邦係我哋中同,仲係阿蚊成世人最愛嘅初戀,佢哋愛到入城大就分咗手,上年撞返就極速復合。

問起我嘅嘢,只係佢嘅開場白,同我句「冇乜點呀」一樣係廢話。

突然間,我覺得好厭,「傷心大JJ」番說話同啲報復方法,喺我腦入面徘徊。

阿蚊真係唔開心先會諗起我?真係有佢講,冇我講?我哋呢啲樹洞,係咪注定俾人用完即棄?

從前嘅我,一定會默默聽曬阿蚊呻,仲要一路好認真咁點頭、附和,所以佢先咁信我,淨係同我講秘密。

但而家我打斷咗佢:「既然係咁,同佢分手囉。」

「吓?」

我要報復。

(待續)

(2):https://goo.gl/W2Qgk9

想知「冇誰共鳴」點報復,請LIKE & SHARE!
Facebook Page夠200個Followers就聽晚出手 XD 否則後晚 XD

重申:另一半鍾意影相,好想話佢知配圖我影㗎!配圖我影㗎!配圖我影㗎!突然覺得自己嘅影相眼光唔係零呀哈哈哈哈哈哈!同埋電腦白痴表示而家終於知道用小畫家加字喺圖上面,個底原來可以唔係白色哈哈哈哈哈!我都想整得靚啲,但我部老爺機開其他勁過小畫家嘅修圖程序係會死機哈哈哈哈哈!
成日上網搵圖真係好煩,但如果一篇文章冇配圖,係FB會有幾多人睇?朋友話:0 XD

鳴謝:我舊木、我個耳機同我櫃桶塊板。完。
*啲網名係我亂作嘅,如有雷同,你唔好彩 :)

#余該隱 #短篇 #小說 #廣東話 #短篇狂想 #短篇小說 #樹洞 #報復 #心事台 #講心事最緊要係對象 #心事