落到凡間我先明，點解而家啲人冇乜想像力，因為有都搵唔到食。
有技能先實際，但我除咗可以用法力將自己變成其他嘢，同對節日好熟悉之外，就乜都唔曉。
就好似將自己變做提款卡，但作為一張卡，我塞到自己入卡槽，都冇手撳密碼。試過搵人幫，當搵到個貪錢貪到唔驚我係怪物嘅人（其實好易搵，冇嘢得人驚過窮），點知佢拎完錢就走佬，仲嚟手將我撻落地。
十足十我舊腦細玉帝咁，搾取完原料，理L得我哋班奴工死。
唔通我做人做神都冇運行？
好在仲有鬼佬節。過完中秋，又係時候Halloween。我想去啲主題公園扮鬼，點知冇身分證冇人請，唯有落老蘭，將自己變做一個極有東方美嘅靚女，仲著埋紅色旗袍添。
唔駛唱歌，唔駛俾人摸，我淨係企喺度同啲遊客、鬼佬Selfie，收返良心價$20一次，晚晚都賺到幾舊水，好過打份牛工做餐死。
班鬼佬不知幾冧我，又請我食嘢、飲酒，又話欣賞我識融合中西文化。
「Oh! Your makeup is excellent, who made it for you?」（不專業翻譯：「你有makeup，我想make love，受唔受溝？」）
我梗係唔同佢講係我自己變出嚟㗎啦，笑笑口答佢：「I go to school by bus.」（不專業翻譯：「我架巴士行紅隧。」）
佢呆一呆，見我咁慘，即刻俾咗$500貼士我搭的士（但我始終都唔行西隧）。
我啲錢除咗買嘢食，就冇乜用。攰嘅我就去寺廟過夜，再唔係將自己變細，搵個門口土地痴屋瞓，仲舒服過啲劏房硬板床。
成個十月，我日日都同大家慶祝Halloween，抖足成個十一月，到咗十二月就日日扮聖誕老人。二月最正，農曆新年同情人節真係兩條大水喉。到驚蟄就扮阿婆幫人打小人，扮完復活兔，再扮埋玉兔，咁就一年，我儲咗第一桶金。
我跟住啲商場佈置、名店推廣日程嚟返工，我先知原來365日入面有一半日子都過緊節。而原來發節日財，係咁爽歪歪㗎！
我開始諗，自己密密做，搵嘅錢始終有限，點解唔學啲商家，推出產品，等人塞錢入我袋呢？
聽英國研究講，人類搵嘅錢，有百分之十都會駛咗落去節日度。我唔知佢啲數據點嚟，但真係好有啟發性！我直頭聽到銀紙啪啪啪咁疊起嚟嘅聲！
我要推出一款產品，仲要全年所有節日都啱買！
咩產品好呢？例如朱古力，係就係幾個節日嘅送禮佳品，但到底新年、聖誕、情人節、萬聖節同復活節有咩共通點，次次都要食咁甜？真係行貨。仲有呀，冇理由鬼節、重陽、清明要人食朱古力㗎，真係「打鬼要用朱古力」咩？
至於月餅同粽呢啲，太季節性喇，冇得賣足全年。
咁煩，間廠生產多幾款產品，咪滿足曬大眾嘅要求囉。但咁又有乜咁創新，可以喺市場分一杯羹？
最後我用筆錢，研發咗「百變禮盒」出嚟，賣點係喺唔同心情、時節食，就有唔同嘅味道，一年四季都啱曬送禮。
其實件產品係咪真係咁神奇，唔重要。重點係，我變身做所有KOL、粒粒巨星、大公司CEO（總之係所有能夠影響你同你父母隔離鄰舍親朋戚友阿陳太個表妹個細佬隻狗點諗嘢嘅人），然後喺各大平台力推呢隻產品，發動咗「節日革命」！
又真係人人都信喎。
跟風買嘅人全部都食神上身，話隻禮盒有初戀、暗戀、苦戀、失戀、異性戀、同性戀、結婚、婚外情……嘅味道！
自此，香港人過節，只會送錢俾我駛，仲要係好多錢添！
所謂成功，就係要企喺巨人嘅膊頭上，多得Marketing咁多年嚟都洗大家腦，話過時過節一定要送禮、食餐好，我先咁快發達。
我仲變埋英國佬，發表研究，預測全人類未來只會買我嘅禮盒，竟然引發全球搶購熱潮。我公司好快上市，開到全球都係分店。
我呢個小小嘅神仙，唔止做咗「節日大嬴家」，仲報復埋我舊腦細添。
因為當全世界都只會「想像」我嘅「百變禮盒」，一成不變，就令原料收獲銳減，天庭個個冇飯開，唯有暴動，搞到玉帝都著咗草。
而家班Intern落曬嚟凡間跟我搵食喇，我一嚟就升曬佢哋做公司高層，個個讚我係良心老闆。
賣下廣告先：「百變禮盒」，係地球人嘅手信，你今日買咗未？
（未完）
為咗呼應「百變禮盒」嘅概念，我決定每個大小節日都會Loop返呢個故仔，將「嫦娥」改做「聖誕老人」、「財神」、「復活兔」、「屈原」、「牛郎織女」……再搞啲成功人士分享會，實發上加發！
（真係完）
（真係好鬼無聊XDDD）
鍾意嘅，請LIKE & SHARE！
〈個天話我涼薄，要收返我有嘅嘢！〉（1）：https://goo.gl/t6s3fG
鬼叫我炒散「千祈唔好同朋友講人工！」：https://goo.gl/JPS8YH
