一年容易又中秋，之前我返過月餅包裝，算係返得比較密同耐。
工作期由六月到九月，實際返到幾號，就睇下嗰年幾時中秋節。唔少人都會返到尾，因為做完約而請假日數唔過一定日子嘅話，就有多幾千蚊約滿獎金。
中學阿Sir話佢細個做過工廠，知道日子難過先發奮圖強。計我話，而家咁多嘢Made in China，香港地仲有幾多生產線我估都數得出，想體驗社會都唔係咁易。
我嗰陣放暑假，零工作經驗，喺等俾無良僱主剝削嘅狀態下，見到月餅廠請人。
之前先笑完同事要見工，其實我呢次經歷先悲慘。轉咗幾程巴士，去到勁遠嘅門市，先知招聘廣告講緊舊屎，去到商場，間鋪喺邊冇、人、知！
頂！原來嗰間分店一早摺咗！撞咗次板，我先發現屋企附近間鋪有得apply……
落到場，其實做嘅嘢真係好X悶。由搓蓮蓉、用膠袋包裝到入盒，生產線個個位都企滿人。大家全日都冇得坐，對手冇停過，個腦瞓著咗。靠同同事吹水，先過到日晨。
十足十差利嘅《摩登時代》，生產線速度唔到你話事，仲永遠快過你做嘢速度，咁先叫有效率同幫到GDP。
我主力做月餅入盒，前面條Line嘭嘭聲咁出餅，我哋下面班友仔手腳慢，有啲盒未塞齊四隻月餅，有啲盒衾唔切蓋，結果要將半完工嘅月餅盒放喺地，諗住有時間先做返，點知Line長開，就越堆越多。
直到Line長大叫：「呢邊『瀨屎』呀！」條Line先會破天荒咁踩個靚Break。
望住啲黃棕色嘅月餅一坺坺好似屎咁撻喺地，真係覺得班老屎忽形容得好抵死。
講起同事，唔係未畢業嘅90後尾，就係已經有仔女同我差唔多大嘅Auntie。
年輕人梗係玩得埋啦，最難得係唔少Auntie都好風趣，佢哋不知幾in呀，一放Break就打機、煲韓劇勁過啲後生女。
最搞笑係，佢哋好鍾意調戲後生仔，有一次某仔仔做嘢唔小心，令Auntie整親手指公，個Auntie冇嬲，仲大大聲話：「XX（名）整親我子宮呀！」搞到仔仔耳仔都紅埋，全Line人笑到格格聲。
真係難得兩代人關係咁融洽。平時後生仔女返到屋企，食完飯就匿埋喺房，對住街外人偏偏乜都肯講。唔知點解，我都係咁……
至於工作環境就唔多歡喜，日日聞住陣蓮蓉味，下世連月餅係乜都唔想記起，做冰皮嘅就同舊冰玩遊戲，玩到手指都麻痺。
最經典係做咗個幾月後，正當我哋成班掛住吹水，石屎天花竟然冇啦啦跌咗幾舊碎石落嚟！
嘩頂！危樓呀！正所謂「我欲荷包豐滿，又恐危樓就冧，有錢冇命享。」咁危險，點算好？唔通返工都要戴頭盔（根本份份工都要）？
我記得我哋當時係有驚過、避過、擔心過、失望過，但Line長催兩催，我哋就好快又企返埋位，仲笑笑口估邊個會中頭獎先……好彩最尾都冇人受傷。
區區彼岸花、紙傘有幾心寒啫，工友們，抬頭望下個天花板仲心寒呀！
（完）
公告：《鬼叫我炒散》系列將於逢星期一更新，多謝支持。
鍾意嘅，請Like & Share！Follow埋專頁，睇文快一截！
更多短篇狂想、鬼叫我炒散、愛情散文：https://goo.gl/QcXrPe
Facebook專頁：https://goo.gl/FVN3Pb
#余該隱 #鬼叫我炒散 #炒散 #月餅 #中秋節 #包裝 #月餅包裝 #危樓 #戴頭盔返工得唔得
