上集:https://post.shikoto.com/posts/138644-我腦裡面有個炸彈(上)

亦因為我四處求醫,件事好快就揚咗,坊間稱我做「炸彈男」。
老闆炒我,親戚疏遠我,街上行人遠遠見到我都繞路,
朋友慰問我,但只敢用Whatsapp慰問。
甚至連我阿媽都好委婉咁同我講,叫我搬出去:「阿媽唔係唔錫你,但我地屋企咁多人,你細佬年紀仲細......」
我可以點做?我唯有搬出去,諗住租間劏房過日子,但其他住客一認得我,死都唔畀我住入去。
我唯有瞓街,露宿者都讓位。

其實個炸彈咁細,可以有幾大威力?其他人嘅反應,好似我可以炸毀地球咁。

如果個炸彈真係咁勁,警察捉咗我好耐啦。
但個炸彈未爆炸,已經令我失去一切。
我不斷同自己講,只要拆到個炸彈出黎,一切就會回復正常!
我日以繼夜咁查資料,研究炸彈同腦科,其他乜野都唔理。
連我隻智慧齒痛到腫晒,吞口水都痛,面同頸都腫晒,我都無去理。
世界上有咩厄運,恐佈過你腦裡面有個炸彈?

終於有一日,我眼前一黑,暈咗。

醒番果陣,我望住眼前個醫生,好艱難咁問:「我個炸彈爆咗?」
「乜野炸彈?」醫生好嚴肅咁望住我:「你隻智慧齒蛀咗,拖得太耐,侵蝕牙髓牙骨,形成頸部和胸腔膿瘍,死亡率高達四成。我地要做手術,切開你條頸,引出膿液......」
我接受手術,雖然成功引引出膿液,但細菌已經進入血液,引發敗血症,都係搶救無效。
即係手術成功,病人死咗。

我腦裡面有個炸彈,但我死喺一隻智慧齒手上。
人生,就係你一直預計到會發生咩事,偏偏到最關鍵果樣先估錯。
你忽視咗嘅,往往係最重要嘅野。

後記:寫呢篇文嘅時候,我等緊剝智慧齒,因為太緊張,想寫文放鬆下。
寫完之後,我更加緊張了......

-完-