上集：https://post.shikoto.com/posts/138369-執到女神裸照（上）
我發咗一張裸照畀Jennifer，直接開價。
佢好震驚，不斷咁問我裸照點黎，又要我發誓簽紙，畀咗錢就會幫佢保密。
無問題，我份人最守信，點會做啲損人不利己嘅野。
我同Jennifer約好幾時畀錢，我滿心歡喜，已經計劃緊點樣用筆錢。
點知第二日起身，我畀Jennifer嘅奪命追魂Call嘈醒：「你擺晒我啲裸照上網？你係咪癲咗？咁想一拍兩散，我依加就去報警。」
我呆一呆：「我未收到錢，仲簽咗紙話保密，大家都有對方把柄，我點會玩妳。」
Jennifer情緒好激動，我勸咗佢好耐，佢先冷靜少少。
我上網一睇，果然各大論壇都流傳緊「IG清純女神自拍裸照」，真係手機入面果啲相。
我問Jennifer：「會唔會係第部手機，或者電腦洩密啊？」睇佢份人咁唔小心，連丟手機都唔刪資料，會洩漏裸照又有幾奇。
「無可能！果輯相我係用果部新手機試影，根本無入落電腦。」Jennifer斬釘截鐵咁答。
我去質問阿鋒，點知佢認得好爽快：「整好部機後，我睇完啲Whatsapp，見到個Jennifer咁玩你，簡直眼火爆，咪幫你散播佢啲裸照報復，點啊，爽唔爽？」
我點答好？話我本來諗住勒索Jennifer，俾你破壞咗？
到Jennifer再問我，我都唔知點答。
如果佢知係阿鋒洩密，喺佢眼中，都同我洩密無乜分別，佢一樣會報警告我勒索。
於是，我死咬住話，我都唔知點解。
加上Jennifer諗黎諗去，都唔覺得我會「未收到錢就爆裸照」咁傻，唯有將件事定性為「手機被Hack」嘅意外。
問題又黎啦，依加我手上已經無Jennifer嘅把柄，而佢手上仲有我勒索佢嘅證據，佢隨時都可以報警。
我求咗佢好耐，真正打動佢嘅，係呢一句：「我坐監對妳又無著數，不如妳捉住我把柄，我一世做妳奴隸啦。」
好彩，Jennifer同意咗。
唉，人生真係報應不爽，本來我想勒索佢，依加我俾佢控制番轉頭。
但我慢慢發現，做奴隸嘅生活，無我想像中咁慘。
一來我屋企好窮，我番part-time先得最低工資，果少少錢Jennifer都懶得拎。
結果，佢只可以叫我做吓體力勞動，幫手搬下野，同我做兵果陣無分別。
但Jennifer愈大愈靚，愈黎愈多觀音兵，佢開始嫌我樣衰，連搬野都唔想叫我。
終於有一次，我等咗幾個月，都等唔到佢嘅吩咐。
我忍唔住發訊息問：「主人妳有無咩吩咐？」
佢答：「有，你死開啲。」
自此之後，Jennifer就無再搵過我，亦無再提起勒索嘅事。
我呢個奴隸，正式被開除。
我應該慶幸，但我無開心到，反而有一種淡淡嘅失落。
到底要幾一事無成，先可以送上門任人宰割，人地都懶得割？
唉，人生嘅野，唔好怕俾人利用，
有人利用你，證明你仲有利用價值。
－完－
