我係一個好普通嘅男仔，無乜特別之處，除咗特別窮之外。
我婆婆係執垃圾嘅，我放假果陣，都會幫婆婆分類垃圾，偶爾都會發現啲未爛嘅日用品，幫補下家計。
今日，我發現咗部手機！
準確黎講，係一部跌爆咗Mon，開唔到機嘅手機。
呢個型號有啲熟口面，睇真啲，咪係我女神Jennifer之前開post，話過想要果個型號？
我暗戀咗Jennifer好耐，但佢又靚又多人追，我只好默默當兵，付出體力勞動，搏佳人一笑，已經好滿足。
但依加居然畀我執到部爛手機，如果我整得番，刪晒啲資料，扮新手機送畀Jennifer，佢咪會好開心？話唔定仲會同我行街。
好彩，我老友阿鋒係整手機嘅，手藝出神入化，堪稱旺角一絕。
佢可憐我嘅坎坷情路，肯免費幫我整呢部手機。
過咗幾日，佢還番部手機畀我，真係整得番！
點知，我一開機，就見到Jennifer張相係Wallpaper。
唔通呢部本來係Jennifer嘅手機？可能佢開post後，已經有人送新手機畀佢，點知佢跌爛咗，又費事整，就咁丟咗。
我逐個逐個睇Jennifer啲whatsapp，我知偷睇人地私隱係唔岩，
但道德，係因為受到嘅誘惑唔夠多啫。
機緣巧合都俾我執到佢部爛手機，仲要整得番好，仲唔係上天嘅旨意，畀我真正了解Jennifer？
不過，我愈睇愈嬲，我雖然知自己係兵，但Jennifer間中都同我講，我係佢心入面有好重要嘅地位，同其他人唔同。
睇到佢嘅whatsapp，先知佢同個個男仔都咁講，甚至對其他兵更親切，同工不同酬。
觀音兵都有尊嚴架，我好嬲，真係要考慮下退役。
順手打開手機資料夾，有好多Jennifer嘅靚相，一路碌......我碌到一堆裸照！
睇場景，應該係浴室自拍，仲有幾張聚唔到焦。
喺雄性本能嘅興奮過去後，我開始諗，我應該點樣利用啲裸照？
之前我諗住送手機，都只係奢望由「二等兵」升為「一等兵」。
但憑住呢輯裸照，我仲使當兵？直情可以做佢主人啦！
無錯，我就係打算勒索Jennifer，報復呢個玩弄我感情嘅女神。
不過，勒索都要講技巧。
首先唔可以貪得無厭，逼到對方一拍兩散。
果啲勒索坐監嘅新聞，通常都係勒索者得寸進尺，令被勒索果個走投無路，知道自己點都擺脫唔到，寧願去報警，犧牲自己嘅把柄。
其次，個要求要短期內實現。
我都有諗過，要求Jennifer做我女友。
但「女友」係一份長期工作，之後我要不斷威脅佢履行女友職責，我都唔會開心。
所以，我決定要錢。
勒索錢，簡單直接一筆過，簡直集合咗人類嘅智慧。
雖然Jennifer係我女神，勒索錢好似好庸俗，但有錢，又使乜驚做唔到男神呢？
Jennifer屋企幾有錢，加埋啲兵咁多進貢，我估勒索一百幾十萬都無問題，就當係佢玩弄我感情嘅精神損失費啦。
