上集：https://post.shikoto.com/posts/129106
但阿峰都係悶悶不樂，意料之外嘅係，佢更加要求各位「綠帽俠」放過佢前妻。
我忍唔住問：「做咩事？你大徹大悟立地成佛？」
阿峰苦笑：「我日日絞盡腦汁，以為佢黑仔，我就會開心；點知見到佢咁慘，我一啲都無開心到。」
「你同情佢？」我好驚訝。
阿峰搖頭：「係無咗目標。報復，本來就唔係想佢衰，只係想自己開心番。」
而且，日子耐咗，其他綠帽俠成員都有呢個現象。
於是，經過一眾成員嘅商量，綠帽俠推出咗第二個行動，代號「尋歡」。
我曾經見過一句說話，忘記舊愛有兩個方法，一係新歡，二係時間，
如果忘記唔到，就係時間唔夠長，新歡唔夠好。
咁我地咪一齊搵新歡，唔一定係女人，其他興趣都得架，例如行山打波咁健康......
結果，我地一齊北上尋歡。
用最具刺激性嘅野，令自己忘記傷痛。
初時係好開心嘅，但無論乜野娛樂，都有停落黎嘅時候。
極致嘅刺激過後，成個人冷靜晒，就更加會諗唔開心嘅事，諗自己點樣戴綠帽，諗以前同老婆點樣甜蜜.....
唔得，呢個唔係好方法。
我以前以為，每個人都係特別嘅。
但我開始發現，原來人嘅心情，有好多位會突然一樣。
例如，戴咗綠帽會好傷心；又例如，戴完綠帽再尋歡，一樣唔開心。
身體上嘅刺激，彌補唔到心靈嘅傷害。
各位綠帽俠再坐埋一齊傾，已經諗唔到新方法。
突然有個師兄講：「我上網呢，見到個人生乜乜乜課程，好似話可以改變自我，脫離傷痛。」
「嘩，係咪果啲洗腦傳銷課程黎？聽講呃錢架喎？」大家議論紛紛，仲拎埋新聞報導出黎睇。
又有人話：「事到如今，不如讀幾堂試下啦，最多我地小心啲，唔好俾人洗腦。」
有人同意，有人反對。
我自己就參加咗果個課程，為綠帽俠探路。
都有幾分挑戰嘅心態，我就唔信，我幾十歲人，仲會俾人哄幾句就交晒全部身家出黎。
上完一個課程，喺導師嘅引誘下，我參加咗一個又一個嘅課程，唔夠錢就碌卡找數。
佢地話個課程可以改變人生，但我為咗上課無晒精神，連份工都無埋，直到我連Min pay都找唔到，我先驚覺我嘅人生變成點。
日日捱面包，諗方法借錢找卡數......
導師同我講，我可以介紹其他朋友參加課程，抽佣，解決我嘅問題。
咁咪即係害我啲朋友？我好糾結。
但呢排，綠帽俠嘅師兄紛紛問我，參加完個課程有無用，有無忘記戴綠帽嘅傷痛。
果一刻，我先驚覺，戴綠帽果件事，早已被拋諸腦後，當你連基本生活都維持唔到，絕對唔會諗任何感情煩惱。
同一個就餓死嘅人講失戀？唔好玩啦。
於是我答：「呢個課程好好架，保證你唔會再為過去而煩惱。」因為你要煩惱嘅，係未來。
佢地聽到我咁講，一個接一個咁畀錢參加，我果堆信用卡帳單終於可以解決少少。
忘記一個人，係唔需要努力嘅。
如果夾硬要努力，去擺脫一個煩惱，只會迎來一個更深嘅煩惱。
－完－
