雙生_畢業生(下b)完

小琴始終都冇詳細同家姐講果日發生咩事，淨係同佢講，自己比人識穿左，果個人好嬲，不過唔係嬲自己，係嬲打電話約佢果個。然後，將張戲飛比左小弦，就乜都唔肯講。

其實小琴都好唔開心，明明係自己上次同人道歉果陣，應承左以後唔會再扮家姐呃佢。

「到底佢點知我係扮咖?」小琴諗極都唔明。

小弦見佢唔係好想講，都冇再追問落去。佢知道，以小琴嘅性格，佢唔想講，問都冇用。

於是小弦同尚志又回復以前咁，不相往來，見到面當對方透明。無論係畢業禮定謝師宴，兩個人都係零交流，冇影相，冇講野，冇打招乎。好似陌生人咁。

其實尚志都唔係咁小氣。起碼佢已經原諒左有份諗呢條屎橋班friend，但係對住小弦，佢真係唔知點開口同佢講第一句說話。

「可能人地都費事睬我呢。」佢同啲friend講。

放榜日，大家都好緊張。
大朝早學校未開門已經有家長同學生係門口等，然後學校開左禮堂比中六生入去，分班坐好，講左少少勝不驕敗不餒之類嘅廢話(其實冇人有心機聽)，就開始派成績。

禮堂前端傳來一陣歡呼。尚志一如意料考得好好，老師話，而家係佢揀大學，唔係大學揀佢。佢自己都好開心，立即打比番緊工嘅阿爸。

當尚志仲解釋緊比阿爸聽點解Level 5會好過Level 1嘅時候，禮堂後方傳來一聲巨響。

「一個又係咁兩個又係咁，你點做人阿媽呀?」一個家長埋怨佢老婆，拍枱大罵。

「你日日掛住間公司，你有理過兩個女咩?」

「我唔理公司啲野邊個理? 你嘅責任就淨教好兩個女。好啦，而家一個擺明唔讀書咖啦，呢個又係冇出色嘅，咁點呀? 養大佢地有咩用呀?」

個老婆眼泛淚光，「你叫我點同親戚朋友交代呀?」，跟住攞條手巾仔出黎抺眼淚。

一個戴眼鏡，扎長馬尾嘅女學生，擔左張凳比佢坐，「媽咪你坐。」然後企係佢地面前，粒聲都唔出。

「你擔張凳有屁用呀? 你早知就比心機啲讀書啦唔該你。」個男人行近個女仔，啲口水係咁噴落個女仔塊面度，但係佢一啲反應都冇。

「你知唔知我同爸爸對你幾大期望呀?。」個女人一路喊一路講，「小琴我就一早預左，咁我地有心理準備吖麻，我地對你期望好大，點知......」，個女仔滿眼淚水，但仍然唔敢喊出聲。

「你跟細妹去英國讀啦!」

個女仔搖搖頭，「我想... 留係香港讀...」

「你咁嘅成績係香港讀得啲咩呀!」

「我... 我要係香港讀，我邊度都唔去!」

「衰女，駁咀!」個男人舉起隻手，想一巴打落個女仔塊面度。

尚志幾乎要衝埋去拉開個男人，但比就近嘅幾個老師搶先，分開左佢地三個，個別同佢地傾。

突然有隻手拉一拉尚志，佢擰轉頭，係小琴。

佢冇着校服，着住一件外套、短裙同波鞋，全身都係黑色。

尚志有少少愕然，小琴望一望佢，又望一望禮堂門外，示意有野要出去講。

尚志望住抽泣中嘅小弦，好唔放心，小琴拉住佢，一定要佢出去講。

佢地上左一層樓，企係走廊上面。

因為其他同學已經放緊暑假，成層樓都冇人。

「志，我係小弦。」

「...」

「你兩姊妹又搞咩呀?」

「我真係小弦呀。」

「好，你係小弦，咁你話比我知，你到底鍾意食雞蛋仔定夾餅?」

「吓?」

「你答吖。」

小弦諗左一諗，認為唔應該再呃佢，咁小嘅野都唔應該呃，「夾餅。」

「咁點解你個個星期一請我食雞蛋仔呀?」

「係你請我，我都冇請過你。」

「...」

「我係鍾意食夾餅，不過我知你唔鍾意食甜野，同埋我唔想比你見到我食到好論盡...所以先話我想食雞蛋仔...」

「...... 好，我信你係小弦，你同你細妹… 你地做緊乜呀?」

「係細妹諗到代我比佢地鬧，等我可以搵你。我... 我冇諗過佢地今次會嬲成咁... 細妹…」，兩行眼淚劃過小弦嘅面，尚志最怕見到佢喊，忍唔住雙手輕輕扶住小弦雙臂。

「你… 想搵我，可以打比我…」

「我冇勇氣打比你…我驚你重嬲我，我又驚自己過左今日，唔知幾時先見到你。我係頭先，見到細妹為左幫我咁都肯忍，我先至鼓起勇氣搵你…」

「你… 有野想同我講? 頭先你阿爸話… 你細妹去英國，你都要去?」尚志諗到呢度，就好後悔，之前做乜唔睬佢...

「我... 」小弦透一大啖氣，捉住尚志雙手，「我好想同你講，對唔住。」

你同我講對唔住有咩用... 你都走啦。

「上次，叫細妹扮我去赴約。我知你一定好嬲。」

尚志迴避小弦嘅眼神，低頭望住佢對手。

「果日之後，我... 每個星期五，自己一個人，去同一間戲院，買番兩張相同座位嘅戲飛，睇一次原本我同你睇果套戲，睇到落畫，一共睇左五次。」小弦對眼又開始充滿淚水，「我坐係戲院度，諗我係唔係傻左... 諗左好耐先明... 其係我真係好鍾意你... 」，小弦壓抑住情緒，深呼吸，想冷靜啲講埋先喊。

「小弦…」

「我由細到大，都唔明細妹做乜咁反叛，唔好好地讀書。其實佢一直都好清楚自己鍾意做啲咩，所以寧願激嬲爸爸媽咪，都要去玩劇團，唔肯讀死書。相反我，一直都好聽父母話，佢地鍾意我讀書，我就盡晒力去讀，從來冇諗過自己鍾意啲咩，想做啲咩。我一直咁聽話，係因為我未搵到一樣值得我去反叛嘅事。但係... 直到遇到你...... 我真係好鍾意你，我唔想再成日淨係理爸爸媽咪點諗......」，講到呢度，小弦係咁喊，尚志抱實佢，感受小弦急促嘅呼吸慢慢平復。

「如果你，唔介意我入唔到港大，仲想同我一齊... 我就留係香港，我唔會理佢地點諗...」

「傻妹，一直都係你話要入港大先同我一齊，我都冇要求過你...」

「即係你唔介意呀?」小弦抬頭望住佢。

「可以同你一齊我開心都黎唔切啦，點會介意。」尚志一邊講一邊幫佢抺面上嘅眼淚。

「你唔嬲我?」

「本來... 有少少，但而家，唔嬲啦。原諒你啦。」

「咁我地，可以一齊?!」

「(仲問?)係呀!」尚志雙手環抱住小弦，兩個人塊面好近，尚志第一次咁近望小弦個樣，小弦甜甜一笑，尚志個心好似比佢融左咁，視綫停留係小弦雙唇上，塊面慢慢靠埋去...

「吖!我要番去禮堂啦... 」小弦突然記起可憐嘅細妹。

尚志表情失落，擠出一個尷尬嘅微笑。

「唔可以比小琴自己一個人撐咁耐咖!」邊講邊抺乾剩低嘅眼淚，尚志鬆開手，跟住小弦行。

「佢對你真係好。」