愛到極致，就係恨。
尋日，我為咗David自殺。
其實朋友一早告誡我，覺得佢唔係好人，但我貪佢靚仔、貪佢啲甜言蜜語，墮入情網，
最後呢？佢趙完鬆，我太傷心而跳樓。
但落到地府，我先知道死後一樣有意識，我嘅傷心、憤怒，一啲都無少到。
我仲係好憎David。
「小姐，呢度係報應中心，有咩幫到妳？」
咦，地府居然有報應中心？
職員微笑：「非正常死亡嘅人，心中通常有執念，本中心專門超渡亡魂，令你地消除心魔，安心投胎。」
「好，個賤男應該有報應！」我一五一十咁將David嘅惡行講出黎。
職員諗咗一陣：「明白，咁我設計一個靚女，用甜言蜜語同美貌勾引David，得到佢嘅身體，之後拋棄佢，妳滿意嗎？」
職員皺眉：「點解一模一樣嘅遭遇，就係益咗佢？你地鼓吹男女平等，係假架？」
我都唔知點解釋，總之唔可以咁。
「咁啦，你設計到David都自殺，就係有報應啦。」
職員搖頭：「妳自殺係妳嘅決定，又唔係佢殺妳，佢只係導致妳失戀。報應，一報還一報啫，最多設計一樣嘅失戀畀佢，自唔自殺就睇佢承受能力啦。」
「咁無天理？」
「如果有個男人單戀妳，得唔到而自殺，妳係咪應該受報應而死？」
「唔係，但係......」我嬲到喊：「佢負心、賤格、人渣，點可以畀佢好過！」
職員睇住我喊，嘆氣：「好彩我地仲有祕密武器。」
職員遞個頭盔畀我：「呢個係『4D立體全景聲報應頭盔』，妳戴住個頭盔，諗妳要報復嘅人，就可以設置佢嘅結局，當然只係幻境啦。」
我唔係幾滿意：「下，即係現實嘅佢，唔會受到任何傷害？咁無聊？」
「妳試下先啦，包妳爽歪歪。」職員推我入去：「大部份人報復，都係想自己爽啫，唔通真係想為民除害咩。」
我半信半疑咁戴頭盔，眼前就浮現起David個樣。
衰人應該有咩報應呢？五馬分屍？萬箭穿心？一於兩個都試下。
先黎一個萬箭穿心，David悠閒咁喺條街度行，突然四面八方射出利箭，貫穿佢嘅身體，佢嘅慘叫短促但極淒厲，血濺到我成身都係......
唔得，真係好嘔心，快啲停低！
但個報應器居然無暫停掣，話咁快又到五馬分屍。
馬路上嘅車突然消失晒，David嘅四肢同頭分別綁喺五隻馬度，馬一跑......
今次嘅血係向天噴，仲有死不瞑目嘅人頭。
「救命啊！」呢句係我喊嘅，我一手除咗個頭盔，嘔到成地都係。
「喂，唔好整污漕個頭盔。」職員嘆氣：「佢有報應，妳又接受唔到，妳想點啫？」
「太......太嘔心啦。」
職員建議：「咁五馬分屍同萬箭穿心，係咁嘔心架啦。定妳想試下親自斬死佢？」
我搏命搖頭，睇到David咁慘，講真，我一啲都無舒服咗。
我似乎知道自己想要乜，我重新戴上頭盔，設置另一個幻境。
