上集：https://post.shikoto.com/posts/123437

我似乎知道自己想要乜，我重新戴上頭盔，設置另一個幻境。
幻境入面，David為我浪子回頭，同我結婚生仔，白頭到老，最後子孫滿堂，各自死去......
甜蜜、幸福、中間嘈交嘅不滿、生活嘅瑣碎，一切都好真實。
「幸福版？呢個就係妳想要嘅結局啦，點啊，有無開心啲？」
我依然搖頭：「我發現，原來David同其他人無咩唔同，就算佢變番好男人，之後嘅生活......同我嫁第個男人，一啲分別都無。點解我要為佢死？」
職員聳聳肩：「大部份人都係差唔多架啫，兩隻眼一個鼻，想要名想要利，係墮入情網，先覺得對方好唔同。」

見職員服務咗我咁耐，我有啲尷尬：「係咪隻隻亡魂都好似我咁麻煩？」

職員長嘆一口氣：「『報應中心』開咗幾千年啦，古人好簡單，通常係被害到家破人亡，一命還一命就得。
現代人邊有咁轟烈，通常都係受情傷、爭下家產，就想報復，自然嫌報應唔夠啦。」
我問：「所以你地就整咗個報應頭盔？」
「個頭盔都歷史悠久，因為報應系統好複雜，未必可以馬上見效，可能要幾世先有報應。秦始皇漢武帝殺得夠多人啦，咪一樣做一世皇帝。為咗滿足即時需求，先有個頭盔。」
我好洩氣：「原來衰人真係會無報應。」
「有就有，但一來你未必見到，二來未必係妳渴望嘅報應，人總係放大自己受嘅傷害嘛。所以想報復，都係自己郁手實際啲。」

我恍然大悟：「我好好過自己嘅人生，就係對David最大嘅報復！」

職員欣慰咁點頭：「呢條路轉右，妳就可以離開啦。」
「我明白咗大道理，係咪可以復活啦？」我放下仇恨，覺得人生充滿希望！
「下，邊有得復活，呢個世界唔係乜都有得番轉頭架。我嘅意思係，妳可以去投胎。」
我呆咗。
「不過，妳可以帶住呢段記憶去投胎。」

人生，有好多錯誤都無得回頭，不過每次犯錯，都可以汲取教訓，唔再犯同樣嘅錯誤。
我昂首闊步咁走向投胎之路，我知道，下世我一定唔會再為情自殺。

結果，下一世，我因為過馬路玩手機，而被車撞死咗。
我又汲取多一個教訓：
其實汲取教訓無乜用，因為你一定會犯新嘅錯誤。

－完－