上集：https://post.shikoto.com/posts/122372

講遠咗，問題黎啦，點解新人肯參加呢個賭博？
無啦啦背上一個風險，要賠錢架喎。
老闆無答我，默默打開新人界面：
「你相唔相信，你地會白頭到老，永不分離？敢唔敢證明你地嘅決心？」
港女最鍾意要男人「證明決心」，見到呢個版面，如果未婚夫拒絕，
即係對感情無信心啦，即係諗住離婚啦，即係唔愛我啦......

明白晒，我又問：「唔係所有女人都係咁架嘛，有啲女人怕蝕錢呢？」
老闆碌一碌個界面，
原來，新人可以設定入場費（幾錢人情先可以賭離婚），調節賠率，
比如設定一賠一百，入場費一萬，
咁賓客俾一百萬吸引，就要畀一萬蚊人情，先可以賭離婚；
畀八百，就只可以賭白頭到老，即係無得回水。

於是，新人為咗多收人情，參與呢場賭博，

咩話？你話賭輸咗要還？
如果個個都咁理智，賭場執晒笠啦。
同埋所有人結婚果陣，都覺得自己唔會離婚，個信心仲大過賭神。

呢個apps愈黎愈流行，唔肯參與嘅新人，會俾人笑對婚姻無信心，
出於羊羣心理，成為繼玩新郎之後，「大家都好憎但大家都會照做」嘅港式婚禮習俗。
作為創辦人之一，我都預咗遺臭萬年，
點知有一日，我地收到個牌匾：「惠澤萬民」，仲有封感謝信。

原來有位女士，結婚果陣玩大咗，設咗離婚賠率一賠一百，
結果離婚投注額係十萬，三年後離婚，要賠一千萬，
法庭判賠款一人一半，搞到佢老公破咗產。
佢非常感謝我地，搞到佢老公破產，佢雖然都賠咗五百萬，住緊劏房，但「睇到個衰佬折墮，真係好爽」，
呢種「殺敵一千，自傷一千」嘅分手精神，我就唔多理解，但幫到人，我都開心嘅。

個apps嘅影響愈黎愈大，好多人離婚，都俾筆賠款搞到破產、跳樓，
影響愈大，新人就愈鍾意set高個賠率，展現絕不離婚嘅決心。

亦有賓客靠準確投注離婚，成功買樓，有人歡喜有人愁，
依加大家去飲，已經唔再埋頭玩手機，
而係專心睇成長片段，分析新人嘅對話、眼神、經歷，
判斷佢地會唔會離婚，從而決定投注額，
「賭婚」，成為賭馬一樣嘅潮流。

十年後，我獲選為十大傑青，
我成功將香港嘅離婚率降低10%，維持婚姻嘅穩定和諧，
呃，即係大家怕賠錢，就算心入面想斬死對方，都唔會離婚，
咁樣好辛苦？日日番工夠辛苦啦，都係為咗錢啫。

我結婚果日，全部賓客翹首以待，到底我會set個咩賠率？
結果我推出咗個新apps，畀大家賭生仔，
我知道呢個apps無乜賣點，唔會紅，只係用黎分散下大家注意力，
因為我無開到賭婚果個apps，我唔敢啊！作為一個見慣世情嘅現代人，我真係唔敢保證，
我唔會離婚。

－完－