今日去飲，悶緊果陣，聽到隔離個OL講：「依加離婚率咁高，你估佢地會唔會離婚？」
咁大膽，我當堂打咗個突，醒晒。
我公司係寫Apps嘅，老闆係賭徒，鍾意冒險，成日叫我地創新創新創新，
假如我咁有創意，就唔使打你工啦。
但呢一次，仲唔到我出風頭？
當晚我就通宵寫proposal，指出香港離婚率高達35%，新apps可以畀賓客匿名投票或留言，估新人會唔會離婚。
婚宴結束後，新人可以睇到賓客嘅信心度，反思呢段婚姻有咩問題，努力改善，步向幸福，促進社會和諧，係家居暈浪屙嘔肚痛嘅必備良apps......
再連接婚姻註冊系統，新人離婚後，賓客會收到通知，話你知估得岩唔岩。
我本意係，既然去飲，要被逼睇一堆唔關事嘅成長片段，不如增加賓客嘅參與度。
老闆睇完份proposal，拍案叫絕，話做小小修改，就會推出個apps。
我之前提出嘅功能都存在，只係多咗賭博系統，賓客拎份人情出黎，匿名賭博，可以揀「白頭到老」或者「估計沒多久，你倆就分手」，
賭白頭到老嘅，當祝福新人，份人情無得退；
賭離婚嘅，會得到一張彩票；新人如果離婚，要退番一倍人情，賓客憑票去中介公司兌錢。
當新人其中一方死亡後，張彩票就宣告無效。
網上嘅負評鋪天蓋地，日日都有人鬧：「去飲就應該祝白頭到老，點可以賭人離婚？」
呢個講法好似古代皇帝，覺得人地祝佢「萬歲萬歲萬萬歲」，就真係會長生不死，
事實係，你唔講，唔代表件事唔會發生架嘛。
咁當然，個賭博有好大問題，首先就係離婚無時限，
事實證明，當涉及到賭，人類係會迎難而上......令自己有得賭。
根據使用者回饋，有人話：「拎份人情黎賭，人情係咪都要畀，賺得一蚊得一蚊。」
咁又係，如果你落街買飯盒，送一注下期六合彩彩票，你都唔會拒絕架？
「呢隻笑面虎，我心底好憎佢，賭下佢離婚都好。」
「個富二代娶咗我女神！我要落重本賭佢地離婚。」
唔係所有賓客都鍾意對新人，咁梗係啦，啲人下下要筵開三五十席，平時你出個post先得三個like，點會三五百人鍾意你？
賭佢離婚，絕對係「深得中國傳統文化（打小人）精髓」嘅詛咒方法。
結果，每一場婚宴，賭離婚嘅都多過白頭到老，怨氣幾重，
只要提供匿名嘅平台，就可以睇到人類嘅黑暗面......
講遠咗，問題黎啦，點解新人肯參加呢個賭博？
無啦啦背上一個風險，要賠錢架喎。
