上集：https://post.shikoto.com/posts/119208-浴缸有女人頭髮（上）
又係黑色長頭髮？我影低咗，whatsapp畀青青：「妳可唔可以解釋下？」
青青打畀我，破口大罵：「你做咩睇人私隱？果堆頭髮係我染紅色之前，留低做紀念架。唔通你想屈我，話浴缸啲頭髮我擺落去？」
鎖匙得我地兩個有，唔通有鬼？
雖然下午我同青青都唔喺屋企，但就算有賊入屋，都無理由唔偷野，喺浴缸擺頭髮架。
我抽起幾條青青嘅頭髮，帶埋浴缸果啲，交畀一個喺化驗所做野嘅朋友。
化驗結果係，果兩組頭髮，出自同一個人。
真相大白，好明顯，成件事係青青自編自導自演，擺自己啲黑頭髮落浴缸。
點解？咪為咗屈我去滾，名正言順同我分手，所以佢反應先咁大。
我做最後嘗試，打畀青青：「不如我地當頭髮果件事無發生過，重新開始？」
青青大喊：「你喺我地屋企出軌，可以當無發生過？」
OK，我明白，呢種女人唔值得我再留戀。
同青青分手後，為咗治療情傷，我好快同咗老朋友小圓一齊。
雖然我對小圓無咁有感覺，但佢溫柔體貼、棕色頭髮，唔會好似青青咁動不動就呷醋，我地好快結咗婚。
我大受打擊，果一刻，我先發現，我仲好掛住青青。
我日思夜念，直到有一日，我喺浴缸個塞度，見到一堆黑色長頭髮。
呢個景象......似曾相識，青青番黎搵我？
我收埋果堆頭髮，自此之後，我半夜去廁所，都隱約見到青青嘅鬼魂閃過。
過幾日，黑頭髮又再出現喺浴缸。
然後，我成日瞓唔著，開始甩頭髮，我覺得我就黎癲。
我不斷諗，如果我同青青無分手，佢同我住，係咪就唔會出車禍？
當年嘅事，我會唔會有誤會？我好想問下青青，係咪好僧我？
於是，我喺廁所裝咗針孔攝錄機，我想見番青青。
點知，我居然影到，小圓拎出一包黑頭髮，放落浴缸個塞度。
點解關小圓事？我同青青一齊果陣，小圓都成日上我地屋企玩，突然，所有謎團都解開晒。
「當年妳發現青青收埋自己嘅舊頭髮，就偷偷複製條鎖匙，趁我地唔喺屋企，上黎擺落浴缸，就係想挑撥我同青青！」
我再問：「妳好成功，同我結咗婚。我只係唔明，青青都死咗，妳仲要擺頭髮？」
「果個賤人，死咗你都仲掛住佢，發開口夢都叫佢個名，我就係想試下，你會唔會為咗個賤人而痴線。」小圓面容扭曲，比呷醋嘅青青更恐怖，我從來唔知佢有呢一面。
「妳鍾意我，就用陰招拆散我地；我有少少掛住青青，妳就想害到我發神經。」我想像唔到，我娶咗個咁狠毒嘅女人。
小圓冷笑：「乜都怪我？如果你地有信任，係一把頭髮就拆得散？如果你唔係有愧於青青，會一把頭髮就有幻覺？」
可能佢講得岩，一切都係我嘅心魔，但呢一刻，我嘅心魔叫我報復小圓。
離婚等佢分我一半身家？殺咗佢，等警察查我？
No、No、No。
無幾耐，小圓喺浴室撞親個頭，全身癱瘓，講唔到野。
我接佢番屋企，悉心照顧，個個都讚我好男人。
你以為我會偷偷虐待佢？傻啦，傷痕唔止有機會被發現，呢個方法仲太低級。
只係每一晚，我都會剪一束小圓嘅頭髮，放落浴缸個塞度，拜祭青青。
每一次，我都會好溫柔咁同小圓講，佢嘅存在，只係用黎做青青嘅祭品。
懲罰嫉妒嘅人，最好方法係令佢分分秒秒，都生活喺自己嘅嫉妒裡面。
－完－
