上集:https://post.shikoto.com/posts/116852-我嘅職業係:幫人自殺(上)

呢件事有古怪,我決定親身去查探,
我叫個精神科朋友,幫我轉介去尋找快樂公司。
「你好,我想自殺。」我儘量令自己嘅神情顯得憂鬱啲。
經理彬彬有禮咁問:「你想點樣做?」
我想點?乜唔係你地教我咩?唔通佢地睇穿咗我嘅卧底身份?
「唔......跳海?」我答得有啲遲疑。
「根據資料,跳海後,水會直灌呼吸道,心口劇痛,甚至耳鼻流血,持續一至三分鐘。」經理拎咗一疊File出黎,全部都係俾水浸到發脹嘅屍體。

我望一眼,連黃膽水都吐埋出黎。
跟住我陸續提出跳樓、燒炭、吊頸,佢地啲相一疊比一疊恐怖。
咩意思?趕客?

我真係頂唔順,我做開中介,唔使面對呢啲場面架嘛,
我起身走,面都黑埋:「唔使啦,我唔死啦。」
個經理頓時笑容滿面,跟住再講多一堆「生命滿希望」,平時聽就無乜感覺,
睇完果堆人肉相之後,我相信無人會想變成其中之一。

我明啦!佢地表面上係幫人自殺,實際上係勸人唔好自殺嘅,
咁當然慳番唔少營運成本,但收入呢?
我開口試探:「咁我依加唔幫襯,使唔使畀諮詢費?」
我估,佢地諮詢一定收好貴,咁先營運到。
「隨緣樂助啦。」經理笑笑口,好似慈善機構咁樣。
佢招呼咗我一個鐘,我擺低個一蚊銀就走咗,咁筍?咁都營運到?

事後我諗完又諗,得出一個結論:

真係想死嘅人,俾佢地係鬼門關救番黎,會好感動,畀好多錢佢地。
唔通真係有天意?原來,真正嘅祕訣,係兩個字:正義。
結果,我執咗間公司,我懷疑自己真係做錯咗,當然更重要嘅係無生意。

為咗彌補我嘅過錯,我去咗間防止自殺嘅慈善機構做義工。
直到有一日,我聽到兩個員工傾計:「尋找快樂公司就好啦,個個月收幾十萬funding,我地就得雞碎咁多。」
我忍唔住問:「佢地係收funding嘅?」
員工點頭:「我地個個都知,佢間野都收唔到錢,點營運?
咪靠拎funding囉,拎funding好啊,唔使追數,個個月有錢收。」

靠乜野天意正義?原來打贏我,係靠有水喉!
任你扭盡六壬、千盡算計,都敵唔過兩個字:
有錢。

-完-