加入呢個行業,都係源於一場誤會。
話說我做社工果陣,半夜有個我負責嘅學生,打畀我講夢想。
講咗成三個鐘,我眼瞓到迷迷糊糊,得番本能反應:「你想做就去做啦,我支持你!」
第二朝收到佢死訊,聽番電話錄音,先知佢最後果句,係話想自殺!
後來段錄音仲要公開咗,釘牌之餘,我被控告教唆自殺,
好不容易脫罪,個名已經臭晒,網上俗稱「自殺男」。

咁搞法,我當然搵唔到工,居然有人諮詢我,點樣自殺最好。
我把心一橫,開咗間「自殺工作室」,
原來有好多人都想自殺,但怕痛、唔知點死好、唔敢行動。

而我,就幫佢地一把。

我同外國一個火葬場合作,推出「早登極樂套餐」,
包機票住宿火葬費,畀你去旅行玩到心滿意足,再爬入棺材俾人火葬,仲會寄埋骨灰番你屋企,一條龍服務,
無須痛楚,無須勇氣,包你早登極樂。
其實係咪無痛呢,我就唔太肯定,可能死前都有半秒痛楚,
不過我公司嘅投訴率係零啊!喺呢個年代,有咩行業可以做到零投訴?
只有我,幫襯過嘅客人,無一個投訴,證明我服務周到。

我提高咗香港嘅自殺率,有人話我係殺手,
但我覺得「殺一個想死嘅人」,同「殺一個唔想死嘅人」,應該有唔同。
簡單啲講,唔想死嘅人,唔會喺約定時間爬入個棺材度。

生意唔錯,但收入唔高,因為想死嘅多半係窮人,
乜野「有錢人好空虛寂寞」,只係宣傳口號,令大家無咁仇富。
窮之餘,仲要覺得對唔住屋企人,希望留番啲錢,所以死都特別孤寒。

做得呢行,梗有幾個朋友做精神科,轉介啲客去我度。
最近生意少咗,我一打聽,先知有間新公司叫「尋找快樂」,改到咁好聽,咪又係自殺公司。
估唔到,自殺都有人爭生意!
咁商場戰爭,來來去去都係果幾種方法啦,減價戰、推出增值服務、二人同行一人價錢......
我已經蝕住做,客人都係愈黎愈少,對家就紅紅火火,口碑就愈黎愈好,聽講好多人幫襯完,會介紹朋友去......
咪住先,點解會有口碑?幫襯完人都死咗,仲有得介紹?
呢件事有古怪,我決定親身去查探。

下集:https://post.shikoto.com/posts/116982-我嘅職業係:幫人自殺(下)