上集：https://post.shikoto.com/posts/116340-如果，你可以直接ps自己塊面（上）

我退咗兩步：「阿光，做咩搵個整容醫生黎？我又無諗住整容。」
阿光好深情咁望住我：「我希望，妳整到最佳狀態，做我最靚嘅新娘。」
我完全唔理解：「你唔係鍾意我好真好pure好true？你想要靚女，街上個個都係！」
阿光雙眼發晒光：「我想要真，但我都想要靚。只要妳整咗容，妳頸上又無號碼，到時人人都知妳係『純天然美女』。
我計劃咗好耐，好不容易先搵到妳，
再請黎退休多年嘅張醫生，佢研發嘅新技術，啲紅腫好快散，結婚果日包妳靚......」

我打斷阿光嘅說話：「整容都叫純天然？」
「個個都素顏，化妝就係假；個個都化妝，執相就假；到個個女仔都執相，整容先係假。

三十年前，已經無人問『明星有無執相』，只會問有無整容咋。
依加個個都『美臉秀秀』，妳只係整容，就好真好pure！」
「你真係傻咗。」我對阿光好失望，正諗住走，張醫生就拮咗我一針，我瞬間失去咗意識。

我一醒番，即刻去照鏡，望住呢副精緻嘅臉孔，我幾乎唔認得自己，
無錯，個個女仔都係呢個樣，但......我條頸上面無號碼，即係話我無用過「美臉秀秀」。
其他人會覺得我係一個純天然、天生就咁靚嘅美女，
邊個唔想做天然美女？
「割咗雙眼皮、加埋隆鼻削骨，幾完美。」阿光滿眼讚歎，好似望住最精緻嘅藝術品。

雖然我塊面好似被車輾過咁痛，但望住塊鏡，我鬧唔出口。
「想唔想再試下婚紗？」阿光把聲有幾分誘惑。

結果，我都係嫁咗畀阿光，
婚禮果日，所有人都讚我係「千年難得一遇美人」。
人類搏晒命要靚，都只係想俾人讚，
而我追求嘅「天然」，講到尾，就係想與眾不同。

無幾耐，阿光打本畀張醫生，重開整容醫院，而我就做咗代言人。
我地專門去小學做推廣，話畀啲小學生聽，除咗美臉秀秀之外，仲可以整容，
只要忍得住痛，你就可以做頸上無號碼嘅，
純、天、然、美、女。

吃得苦中苦，
方為美上美。

－完－